0478

የግብረ ሰላም በዓል በመንበረ ጸባዖት ቅድስት ሥላሴ ካቴድራል በድምቀት ተከበረ

0478

ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት፣ ብፁዓን ሊቃነ ጳጰሳት፣ የጠቅላይ ቤተ ክህነት የመምሪያ ኃላፊዎች፤የአዲስ አበባ ሀገረ ስብከት ዋና ሥራ አስከያጅና የክፍል ኃላፊዎች፣ የአዲስ አበባ ገዳማትና አድባራት የሥራ ኃላፊዎችና ሠራተኞች በተገኙበት ቅዳሜ ሚያዝያ 22 ቀን 2008 ዓ.ም የግብረ ሰላም በዓል በታላቅ ድምቀት ተከብሯል፡፡
ወለመልአከ ሕይወትሰ ሰቀልዎ ለዘተንስአ እሙታን ገብረ ሰላመ በመስቀሉ ትነሣኤሁ አግሀደ የሚለውን ያሬዳዊ ቃለ እግዚአብሔር ተረኛው የቦሌ ደብረ ሰላም መድኃኔዓለምና መጥምቁ ቅዱስ ዮሐንስ ካቴድራል ሊቃውንት በዘንግ ዝማሜና በጸናጽል ዘምረዋል፡፡
እንደዚሁም የካቴድራሉ የሰንበት ት/ቤት ወጣቶች፣ ይትቀደስ ስምከ በኃይለ መስቀልከ  በዕፀ መስቀልከ ዘአእበይኮ ለስምከ ስብሐት ለከ ለባህቲትከ የሚለውን ያሬዳዊ ቃለ እግዚአብሔር  በወረብ አቅርበዋል፡፡
ብፁዕ አቡነ እንድርያስ በበዓሉ ላይ ለተገኘው ታዳሚ በሰጡት ትምህርት ስምኡ ሰብአ እስራኤል (የሐ. 2÷21) የእስራኤል ሰዎች እግዚአብሔር የገለጠላችሁን ስሙ አስተውሉ ልብም አድርጉ በሚል ርዕስ ተነስተው ምስጢር ሲገለፅ በልማድ የኖረ አእምሮ ይረበሻል፤በጨለማ የተዘጋውን ቤት ለመክፈት ነቢያት አበው በመስዋዕታቸው ዓለምን ማዳን አልቻሉም፡፡ ይህ የምናከብረው በዓል ሰላም፣ በረከት፣ አንድት የተሰጠበት፣ የክርስቶስ ሥጋ የተቆረሰበት፣ ደሙ የፈሰሰበት በዓል ነው፡፡ ክርስቶስ ዓለምን ሲመራ ብዙ ችግር ደርሶበታል፡፡ ቤተ እስራኤል በገጠማቸው ዘመን ለመጠቀም አልቻሉም፡፡ ከሞት ወደ ሕይወት ለመመለስ አልቻሉም፡፡ ዘመንን ማወቅ ከእግዚአብሔር ጋር አላመጣላት አስፈላጊ ነው፡፡
ለክርስቶስ ደንጊያችና እንጨቶች መስክረዋል፡፡ ሰዎች ግን አላወቁትም፡፡ የሞት ቁራኝነትን አስወግዶ ተነሳ እግዚአብሔርነቱ አስነሳው ሞት ለይዘው አልቻለም፡፡
ሰይጣን በነፍስ በሥጋ የሚያሰቃያቸውን ሰዎች ጌታ በደሙ  ቀደሳቸው አከበራቸው ገብረ ሰላ በመስቀሉ ትንሣኤሁ አግሀደ፡፡ ዛሬም ሰይጣን ዓለምን እያፋጀ ነው ያለው፡፡ ሰይጣን ሰዎችን ለማጥፋት  በነፋስ ተጭኖ ይመጣል፡፡ ጌታ  በመስቀል ተሰቅሎ ሕይወታችሁ እኔ ነኝ አለ፡፡
በቅንአት የመጣ በቀል ያለ ደም መፍሰስ አይለቅም፡፡ ሰይጣን አዳምና ሔዋንን በሸሙጥ ቃል አሳታቸወ፡፡ ሳይማሩ የተማሩ ሳይረዱ የተረዱ ብዙ ናቸው፡፡ በክርስቶስ አደባባይ  ፍርሃት  የለም፡፡ ሞተ በሥጋ ወሀይወ በመንፈስ (1ጴ 3÷14) በሥጋ ሞተ በመለኮታዊ ስልጣኑ ተነሣ ይህ ቃል ለመናፍቃኑ አይመችም፡፡
በ6 ሰዓት ፀሐይ ከብርሃን ተለየ፡፡ ጨረቃ ደም ሆነች ከዋክብት ረገፉ፡፡ እነዚህ ብርሃናት ምስክርነታቸውን ለፈጣሪያቸው ሰጡ አይሁድ ግን ካዱት፡፡
 ዓለም የሚተራመሰው በቋንቋ ነው፡፡ ወደ ዕውቀት  አልደረሰም፡፡ ጌታ ግን ታሥረው ወደነበሩት ወረደ እሰረኞችን ፈታ ነፃነትን ሰበከላቸው በጠላት እጅ ተይዘው እየተገረፉ ላሉት ደረሰላቸው ጌታ ቀጠሮ አክባሪ ነው በቀጠሮ መጣ ሰላም ለሁላችሁ ይሁን አላቸው፡፡ ስደት ባርነት ቀረ ነፃነት መጣ አላቸው፡፡
በመጨረሻም ብፁዕ ወቅዱስ አበታችን  የሚከተለውን  መልአክት አስተላልፈዋል፡፡
ፈሪሳውያን በጲላጦስ አደባባይ ተሰብሰቡ በ3ኛው ቀን እነሳለሁ ብሎ ሲናገር ሰምተነዋል አሉን፡፡ መቃብሩን ዘጉት አተሙት አይሁድ ፈጣሪያቸውን መሰሐቲ አሉት አዳኞቸው መሆኑን ስለ ልተረዱት ነው፡፡
የክርስቶስን አዳኝነት እንዳይቀበሉና ወደ እግዚአብሔር መንግሥት እንዳይገቡ አደረጉአቸው አውቀውትስ ቢሆን ኑሮ ጌታቸውን በመስቀሎትም ነበር፡፡ ነገር ግን ስላላመኑ እሡ ለሠራው የመጣበትን ሥራ ሠርቷል፡፡ እነሱ በመቃብር ይቀራል ብለው አስበው ነበር ግን እነሱ እንዳሉት አልሆነም የዛሬው  በዓል የምስራቹን  የምንገልፅበት ቀን ነው በማለት አባታዊ ምልእክት ካስተላለፉ በኋላ የተዘጋጀውን ቀጤማ ባርከው ካደሉ በኋላ የበዓሉ ፍፃሜ ሁኗል፡፡

{flike}{plusone}

0444

ብፁዕ ወቅዱስ ፓትርያርኩ በመንበረ ጸባዖት ቅድስት ሥላሴ ካቴድራል ተገኝተው የጸሎተ ሐሙስን በዓል አከበሩ

0444

ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ተክለሃይማኖት ሐሙስ ሚያዝያ 20 ቀን 2008 ዓ.ም በመንበረ ጸባኦት ቅድስት ሥላሴ ካቴድራል ከብፁዓን ሊቃነ ጳጳሳት ጋር በመገኘት በካቴድራሉ ለተገኘው በርካታ ምዕመናን አባታዊ ትምህርት እና ቃለ ምዕዳን አስተላልፈዋል፡፡
በአስተላለፉት አባታዊ ትምህርት ጌታችንና መድኃኒታችን ኢየሱስ ክርስቶስ በጸሎተ ሐሙስ የደቀ መዛሙርቱን እግር በማጠብ ሥርዓተ ትህትናን ማስተማሩንና በማግስቱ አርብ ስለ ሰዎች ሲል ስለሚቆረሰው ሥጋውና ስለሚፈሰው ደሙ ሰፊ ትምህርት ሰጥተዋል፡፡
በማያያዝም    ቅዱስነታቸው የሥርዓተ ህፅበተ እግር ሥርዓትን መርተዋል፡፡ ከሥርዓተ እፅበተ እግር በፊት በዳዊት መዝሙር የተጻፈው ቃል በዲያቆኑ በዜማ ቀርቧል፡፡ በዲያቆኑ የቀረበው የዳዊት መዝሙር እንደሚከተለው ተብራርቷል፡፡ ትነዝሀኒ በአዛብ ወእነፅህ፤ ተሀጽበኒ እምበረድ ወእጸአዱ፣ ታሰምአኒ ትፍስህተ ወሀሴተ፣ በሄሶጵ እርጨኝ እነጻማለሁ፤ እጠበኝ ከበረዶም ይልቅ ነጭ እሆናለሁ፤ ሀሴትንና ደስታን አሰማኝ፡፡ (መዝ. 50÷8) ከዳዊት መዝሙር በመቀጠል ብፁዕ ወቅዱስ ፓትርያርኩ የሚከተለውን የወንጌል ቃል በንባብ አሰምተዋል፡፡
ኢየሱስም ከፋሲካ በዓል በፊት ከዚህ ዓለም ወደ አብ የሚሄድበት ሰዓት እንደ ደረሰ አውቆ በዚህ ዓለም ያሉትን ወገኖቹን የወደዳቸውን እስከ መጨረሻ ወደዳቸው፡፡ እራትም ሲበሉ ዲያብሎስ በስምዖን ልጅ በአስቆሮቱ በይሁዳ ልብ አሳልፎ እንዲሰጠው አሳብ ካገባ በኋላ  ኢየሱስ አባቱ ሁሉን በእጁ እንደሰጠው ከእግዚአብሔርም እንደወጣ ወደ እግዚአብሔርም አንዲሄድ አውቆ ከእራት ተነሣ፣ ልብሱንም አኖረ ማበሻም ጨርቅ ወስዶ ታጠቀ፣ በኋላም በመታጠቢያው ውኃ ጨመረ፣ የደቀ መዛሙቱንም እግር ሊያጥብና በታጠቀበት ማበሻ ጨርቅ  ሊያብስ ጀመረ፣ ወደ ስምዖን ጴጥሮስም መጣ እርሱም ጌታ ሆይ አንተ የእኔን እግር  ታጥባለህን? አለው፡፡  ኢየሱስም መልሶ እኔ የማደርገውን አንተ አሁን አታውቅም በኋላ  ግን ታስተውለዋህ አለው፡፡ ጴጥሮስም የእኔን እግር ለዘለዓለም አታጥብም አለው፡፡ ኢየሱስም ካላጠብሁህ ከእኔ ጋር ዕድል የለህም ብሎ መለሰለት፡፡ ስምዖን ጴጥሮስም ጌታ ሆይ እጄንና ራሴን ደግሞ እንጂ እግሬን ብቻ አይደለም አለው፡፡ ኢየሱስም የታጠበ እግሩን ከመታጠብ በቀር ሌላ አያስፈልገውም፤ ሁለንተናው ግን ንጹሕ ነው፤ እናንተም ንጹሐን ናችሁ ነገር ግን ሁላችሁ አይደላችሁም አለው፡፡ አሳልፎ የሚሰጠውን ያውቅ ነበርና ስለዚህ ሁላችሁ ንጹሐን  አይደላችሁም አለ፡፡ 
እግራቸውንም አጥቦ ልብሱንም አንሥቶ ዳግመኛ ተቀመጠ እንዲህም አላቸው ያደረግሁላችሁን ታስተውላላችሁን? እናንተ መምህርና ጌታ ትሉኛላችሁ እንዲሁ ነኝና መልካም ትላላችሁ፡፡ እንግዲህ እኔ ጌታና መምህር ስሆን እግራችሁን ካጠብሁ እናንተ ደግሞ እርስ በርሳችሁ እግራችሁን ትተጣጠቡ ዘንድ ይገባችኋል፡፡ (ዮሐ. 13÷1-19) በማለት ጌታችንና መድኃኒታችን ኢየሱስ ክርስቶስ ያስተማረውን የትህትና ትምህርት ቅዱስነታቸው ለምዕመናን ካሰሙ በኋላ ለሥርዓተ ዕጽበተ እግር የተዘጋጀውን ሂሶጵ (ቅጠል) ባርከው እንደጨረሱ ወገባቸውን ታጥቀው መድኃኒታችን ኢየሱስ ክርስቶስ የደቀ መዛሙርቱን እግር እንዳጠበ ሁሉ ቅዱስነታቸውም የብፁዓን ሊቃነ ጳጳሳትን እግር አጥበዋል፡፡

                    ምንጭ፡-www.addisababa.eotc.org.et

{flike}{plusone}

“ሰሙነ ሕማማት”

“ነሥአ ደዌነ መጾረ ሕማመነ በእውነት ደዌያችንን ተቀበለ፣ ሕማማችንን ተሸከመ፣ ስለመተላለፋችን ቆሰለ፣ በእርሱም ቍስል እኛ ተፈወስን” (ኢሳ. 53÷4-6) በማለት ነቢዩ ኢሳይያስ የተነበየው ትንቢት ይፈጸም ዘንድ ጌታችን መድኃኒታችን ኢየሱስ ክርስቶስ እኛን ከፍዳና ከዘለዓለማዊ ሞት ለማዳንና ከዲያብሎስም ቁራኝነት ነፃ ለመውጣት ሲል 13ቱን ሕማማተ መስቀልና ሌሎቹንም ጸዋትወ መከራዎች የተቀበለበት ሳምንት “ሰሙነ ሕማማት” በመባል ይታወቃል፡፡ ትርጓሜውም የመከራ ሳምንት ማለት ነው፡፡
ከፋሲካ በፊት በጸሎትና በጾም፣ በብዙ ስግደት የክርስቶስ አዳኝነትና ቤዛነት የሚታሰብበት ይህ ሳምንት በልዩ ልዩ አብያተ ክርስቲያናት በተለያዩ ስሞች የሚጠራ ሲሆን እንደኢትዮጵያ ኦርቶዶክስ ተዋሕዶ ቤተክርስቲያን አጠራር ግን “ሕማማት” በሚል ስያሜ ይጠራል፡፡ እስከ 4ኛው ምእተ ዓመት ድረስ ጌታችን ከጾመው 40 ጾም ጋር ሳይሆን ለብቻው ይታሰብ እንደነበረ ከቤተ ክርስቲያን ታሪክ መረዳት ይቻላል፡፡ ምክንያቱም ጌታችን መድኃኒታችን ኢየሱስ ክርስቶስ በእሱ ላይ የደረሱትን ጸሞትወ መከራዎች ሁሉ በትዕግሥት ተቀብሎና በመስቀል ላይ ተሰቅሎ የሞተው 40ውን ጾም ከፈጸመ በኋላ ወዲያውኑ ሳይሆን ከሦስት ዓመታት በላይ ከአስተማረና ቤተ ክርስቲያንን ካደራጀ በኋላ ስለሆነ ነው፡፡
በ4ኛው ምእት ዓመት ግን በምሥራቅ አብያተ ክርስቲያናት ክርስቶስ ከጾመው 40 ጾም ቀጥሎ ከትንሣኤ በፊት ባለው ሳምንት “ሰሙነ ሕማማት” እንዲታሰብ ተደርጓል፡፡ በዚህም ምክንያት የጾሙ ጊዜ ከ6 ወደ 7 ሳምንታት ከፍ ብሎአል፡፡ በኢትዮጵያ ኦርቶዶክስ ተዋሕዶ ቤተክርስቲያን ግን ከ40 ጾም በፊት ባለው መጀመሪያ ሳምንት ጾመ ሕርቃል ተጨምሮ እንዲጾምና ከ40ው ጾም በኋላም “ሰሙነ ሕማማት” በጾም፣ በጸሎትና በስግደት እንዲታሰብ በመደረጉ የጾሙ ጊዜ 55 ቀናት ወይም 8 ሳምንታት ስለሆነ የነዚህ ድምር ውጤት ጾሙን ዐቢይ ጾም ሊያሰኘው ችሏል፡፡ ዐቢይ ጾም ማለትም ታላቁ ጾም ማለት ነው፡፡ የዚህ የሰሙነ ሕማማት መታሰቢያ ጾም መጨረሻው የዓቢይ ጾምም መጨረሻ ስለሆነ ጾሙ በአክፍሎት ይደመደምና ከእሁድ መንፈቀ ሌሊት ጀምሮ በዓለ ትንሣኤው ይከበራል፡፡ የምዕራብ ቤተክርስቲያን ደግሞ በኒቆዲሞስ የሰሙነ ሕማማትን መታሰቢያ ታደርግና በሆሳዕና ዕለት የትንሣኤን በዓል ታከብራለች፡፡
በሰሙነ ሕማማት መጀመሪያ በሆሣዕና ዕለት የሚፈጸሙት አስደሳች ሥርዓቶች በኋላ በ6ኛው ምእት ዓመት እንደተጀመሩ ከቤተክርስቲያን ታሪክ መረዳት ይቻላል፡፡
ለምሳሌ ያህል የዘንባባ ዝንጣፊ ባርኮ ለምእመናን ማደል፣ የዘንባባውን ዝንጣፊ በእጅ ይዞ መዘመርና በቤተክርስቲያን ዙሪያ ዑደት ማድረግ፣ በቤተክርስቲያኑ በሮችና ማዕዘኖች የዳዊት መዝሙራትን እየዘመሩ ወንጌልን ማንበብ፣ ሌሎችንም በዓሉን የሚመለከቱ ሥርዓተ ቤተክርስቲያን መፈጸም የተጀመረው በዚሁ በ6ኛው ምእት ዓመት ሲሆን ይህም አስደሳች ሥርዓት በኢትዮጵያ ኦርቶዶክስ ተዋሕዶ ቤተክርስቲያን እስከዛሬ ድረስ እየተፈጸመ ይገኛል፤ ወደፊትም ይቀጥላል፡፡ ዘንባባ የክብርና የድል ምልክት ከመሆኑም በላይ ድርጊቱና አፈጻጸሙ ደግሞ ጌታችን ኢየሱስ ክርስቶስ በድል አድራጊነት ወደ ኢየሩሳሌም በገባበት ጊዜ የተደረገለትን የክብር አቀባበል የሚያመለክት ነው፡፡
በጸሎተ ሐሙስ ዕለትም ጌታችን ኢየሱስ ክርስቶስ ጌታና መምህር ሲሆን በትኅትና ራሱን ዝቅ አድርጎ የደቀ መዛሙርቱን እግር ያጠበ መሆኑን ለማስታወስና ምሳሌውን ለመከተል ሲባል በፓትርያርክ፤ በሊቃነ ጳጳሳትና በሊቃነ ካህናት የካህናትንና የምእመናንን እግር የማጠብ ሥርዓትም በዚሁ በ6ኛው ምእት ዓመት ተጀምሮአል፡፡
በሰሙነ ሕማማት የተፈጸሙ ታላላቅ ድርጊቶች:-
እሁድ የሆሣዕና ዕለት፡ – ጌታችን መድኃኒታችን ኢየሱስ ክርስቶስ በድል አድራጊነት ወደ ኢየሩሳሌም በገባ ጊዜ ሕፃናትና ሽማግሌዎች፣ በጠቅላላ ሕዝቡ ሁሉ ልብሳቸውን እያነጠፉና ቅጠል እየጎዘገዙ፣ በእጃቸውም የድል አድራጊነት ምልክት የሆነውን የዘንባባ ዝንጣፊ እያያዙ በዝማሬና በታላቅ ክብር ተቀብለውታል፡፡
ሰኞ፡-በቤተ መቅደሱ ውስጥና በዙሪያው ይሸጡና ይገዙ የነበሩትን ከቤተ መቅደስ ያስወጣቸው፤ የገንዘብ ለመዋጮች ገበታዎችንና የርግብ ሽያጮችን ወንበሮች ገልብጦ ሁሉንም ከቤተ መቅደሱ በጅራፍ ያባረራቸው፣ ፍሬ አልባ የሆንችውን በለስ የረገማት በዚሁ ዕለታተ ሰኑይ ነው፡፡ በበለስም አንፃር ኃጢአትን እንደረገመ ሊቃውንት ያትታሉ፡፡
ማክሰኞ፡-ሰኞ የረገማት በለስ ማክሰኞ ደርቃ ተገኝታለች፡፡ የበለሲቱ መረገምና መድረቅ ቀድሞ በአዳም በኩል የመጣውና ከትውልድ ወደ ትውልድ ሲተላለፍ የኖረው ኃጢአትና መርገም በክርስቶስ ሞት መወገዱን ያመለክታል፡፡ ጌታችን መድኃኒታችን ኢየሱስ ክርስቶስ በዚሁ በማክሰኞ ቀን ስለግብር አከፋፈል፣ ስለትንሣኤ ሙታንና የዳዊት ልጅ የሚባል ማን እንደሆነ በመግለጥ መጻሕፍትን እየጠቀሰ ከፈሪሳውያን ጋር ይከራከር የነበረው በዚሁ ማክሰኞ በሚባለው ዕለተ ሠሉስ ነው፡፡ እንዲያውም ጸሐፍትና ፈሪሳውያንን በታላቅ ተግሣጽ ገሥጾአቸዋል (ማቴ. 23÷1-39)፣ በለምፃሙ፣ በስምዖን ቤት ማርያም እንተ እፍረት ሽቶ የቀባችው፤ የአስቆርቱ ይሁዳ ጌታውን ለማስያዝ ከአይሁድ ጋር በድብቅ የተነጋገረው በዚሁ በዕለተ ማክሰኞ ነው፡፡
ረቡዕ፡-አይሁድ ጌታችን ኢየሱስ ክርስቶስ እንዲያዝና እንዲገደል ለማድረግ ውሳኔ የወሰኑበት እና ምክር የፈጸሙበት ቀን ነው፡፡ እንዴት እንደሚይዙት ማን እንደሚያስይዛቸውና መቼ እንደሚይዙት በዚሁ ዕለት ወስነዋል፡፡ ለክፉ ሥራቸው ተባባሪ ያደረጉትም ከአሥራ ሁለቱ ደቀ መዛሙርት መካከል የጥፋት ልጅ የሆነውን የአስቆርቱ ይሁዳን ነበር ስለዚህ ዕለተ ረቡዕ ምክር የተፈጸመበትና ጌታችን ኢየሱስ ክርስቶስ ተይዞ እንዲገደል ውሳኔ የተላለፈበት ቀን በመሆኑና ውሳኔውም ተግባራዊ ሆኖ ጌታችን የተሰቀለውና የሞተው በዕለተ ዓርብ በመሆኑ የክርስቶስን መከራና የሰውን ልጅ ድኅነት ለማስታወስ ሲባል ከትንሣኤው በኋላ በአሉት 50 ቀናት ካልሆነ በቀር በየሳምንቱ ረቡዕና ዓርብ ጾመ ድኅነት በሚል ስያሜ እንዲጾም ተደርጎአል፡፡
ሐሙስ፡-በዚህ ዕለት ጧት የፋሲካን በዓልና ዝግጅት እንዲያዘጋጁ ደቀ መዛሙርቱን ወደ ከተማ የላከ ሲሆን ሐሙስ ማታ ለመጨረሻ ጊዜ የፋሲካን በዓል ከደቀ መዛሙርቱ ጋር አክብሮአል፡፡ በዚሁ ዕለት የኦሪቱን ሥርዓት ለውጦ አዲስ ሥርዓተ ቁርባን ሠርቶአል (ማቴ. 26÷26-27)፡፡
በጌቴ ሴማኒ እየጸለየ ጸሎት ከችግርና ከፈተና እንደሚያድንም ለማስረዳት “ወደፈተና እንዳትገቡ ጸልዩ” በማለት ለደቀ መዛሙርቱ መመሪያና ትምህርት ሰጠ (ማቴ. 26÷40)፡፡ ይሁዳም የአይሁድን ጭፍሮች እየመራ ወደ ጌታውና መምህሩ በመቅረብ “ሰላም ለአንተ ይሁን ብሎ ጫማውን በመሳም ለጭፍሮቹ አሳልፎ የሰጠው በዚሁ በዕለተ ሐሙስ ማታ ነው፡፡ የደቀ መዛሙርቱን እግር በማጠብ” እኔ ጌታና መምህር ስሆን እግራችሁን ከአጠብኩ እናንተ ደግሞ እርስ በርሳችሁ እግራችሁን ትተጣጠቡ ዘንድ ይገባችኋል፤ እኔ ለእናንተ እንዳደረግሁ እናንተ ደግሞ እንዲሁ ታደርጉ ዘንድ ምሳሌ ሰጥቻችኋለሁ” (ዮሐ. 13÷13-15) በማለት ትኅትናን በተግባር እየተረጎመና በድርጊት እያሳየ ለቀደ መዛሙርቱ ያስተማረው በዚሁ ዕለት ነው፡፡ ይህ ቀን ጌታችን በመከራው ጊዜ በተዋሐደው ሥጋ ተገብቶ ወደ ባሕርይ አባቱ የጸለየበትና ስለጸሎትም ያስተማረበት በመሆኑ ዕለቱ ጸሎተ ሐሙስ በመባል ይታወቃል፡፡
ዐርብ፡-ጌታችን ኢየሱስ ክርስቶስ ለአይሁድ ተላልፎ ከተሰጠበት ጊዜ ጀምሮ ሌሊቱን በሙሉ ከአንዱ ገዥ ወደ ሌላው ገዥ፤ ከአንዱም ሊቀ ካህናት ወደ ሌላው ሊቀ ካህናት እያመላለሱት በሐሰት ሲከሱትና ሲያስመሰክሩበት፤ ሲኮንኑትና ሲወነጅሉት አድረው ዐርብ ጧት ወደ ገዥው ወደ ጲላጦስ ዘንድ ቀርቦ ሞት የማይገባው አምላክ በግርግር፣ በተድእኖና በጩኸት ብዛት በመስቀል ላይ ተሰቅሎ እንዲሞት የተወሰነበት በመሆኑ በዚሁ በዕለተ ዓርብ በቀትር ጊዜ ስድሰት ሰዓት ሲሆን በግራና በቀኝ ሁለት ወንጀለኞች፣ ምንም ወንጀልና በደል የሌለበት ንጹሐ ባሕርይ ክርስቶስ ያላንዳች ጥፋት እንደወንጀለኛ ተቆጥሮ በወንበዴዎች መካከል በመስቀል ላይ ተሰቅሏል፡፡ ከ6 -9 ሰዓትም በመስቀል ላይ ሆኖ ብዙ ተአምራትን ሲፈጽምና ለሰው ሁሉ ትምህርት ሰጭ የሆኑ ቃላትን ሲናገር ከቆየ በኋላ በ9 ሰዓት ተጠማሁ ሲላቸው ያቀረቡለትን መራራ ሐሞትና ከርቤ ከቀመሰ በኋላ ተፈጸመ የሚለውን የመጨረሻ ቃል ተናግሮ ቅድስት ነፍሱን ከቅዱስ ሥጋው ለይቶ በራሱ ፈቃድ የመጣበትን የማዳን ሥራ ፈጽሞአል፡፡
ክርስቶስ በሰሙነ ሕማማቱና በዕለተ ስቅለቱ የተቀበላቸው ፀዋትወመከራዎች እጅግ በጣም ብዙዎች እንደሆኑ ከቅዱሳት መጻሕፍት መረዳት የሚቻል ሲሆን በተለይ በግብረ ሕማማቱና ድርሳነ ማሕየዊ በተሰኙ መጻሕፍት በዝርዝር ተገልጠው ይገኛሉ፡፡ ከነዚህም ውስጥ 13ቱ ሕማማተ መስቀል የተሰኙት ጥቂቆቹ ናቸው እነሱም ተአስሮ ድኅሪት፤ ተስሕቦ በሐብል፤ ወዲቅ ውስተ ምድር፤ ተከይዶ በእግረ አይሁድ፤ ተገፍዖ ማዕከለ ዓምድ፤ ተጸፍኦ መልታሕት፤ ተቀስፎ ዘባን፤ ተኮርዖተ ርእስ፤ አክሊለ ሶክ፤ ፀዊረ መስቀል፤ ተቀንዎ በቅንዋት፤ ተሰቅሎ በዕፅና ሰሪበ ሐሞት ናቸው፡፡
መድኃኒታችን በዕፀ መስቀል ላይ እያለ ዐርብ ከ6 እስከ 9 ሰዓት ባለው ጊዜ 7 ተአምራት ተደርገዋል፡፡
1.ፀሐይ ጨልሞአል፤
2.ጨረቃ ደም ሆኖአል፤
3.ከዋክት ረግፈዋል፤
4.አለቶች (ድንጋዮች) ተፈረካክሰዋል፤
5.መቃብራት ተከፍተዋል፤
6.ሙታን ተነሥተዋል፤
7.የቤተ መቅደሱ መጋረጃ ማንም ሳይነካው ራሱ ተቀዷል፡፡
ቅዳሜ፡-ጌታችን መድኃኒታችን ኢየሱስ ክርስቶስ በአካለ ሥጋ በመቃብር ውስጥ ነበር፤ መቃብሩም በዘብ ይጠበቅ ነበር፡፡ ክርስቶስ በአካለ ሥጋ ከዐርብ 11 ሰዓት እስከ እሁድ መንፈቀ ሌሊት ድረስ በመቃብር ውስጥ የነበረ ሲሆን በአካለ ነፍስ ደግሞ ወደ ሲዖል ወርዶ ከአዳም ጀምሮ በሲዖል ውስጥ ለነበሩ ነፍሳት ነፃነትን ሰብኮላቸዋል፡፡ ከሲዖል ወጥተው ወደገነት እንዲገቡ አድርጓቸዋል፡፡ በአጠቃላይ እስከ ክርስቶስ ሞት ድረስ በፍርድ ግዞት ውስጥ ያሉትን ሁሉ በመከራውና በሞቱ ድል አጎናጽፎአቸዋል፡፡ በኃጢአት ባርነት ውስጥ የነበሩት ሁሉ ሙሉ ነፃነትን አግኝተው የእግዚአብሔርን መንግስት የመውረስ ዕድልን አግኝተዋል፡፡
                                (በሊቀ ብርሃናት ኢሳይያስ ወንድምአገኘሁ)

{flike}{plusone}

1551

በመንበረ ጸባዖት ቅ/ሥላሴ ካቴድራል የካህናት ሙያ ማሻሻያ ሥልጠና ተካሄደ

1551

የካቴድራሉ ስብከተ ወንጌል ክፍል ከካቴድራሉ ሰ/ጉ/አስተዳደር ጋር በመሆን ቀደም ብሎ በያዘው ዕቅድ መሠረት ከየከታቲት 1 ቀን ጀምሮ ለሁለት ሳምንታት ያህል
• በትምህርተ ሃይማኖት
• በመጽሐፍ ቅዱስ
• በትምህርተ ኖሎት
• ስለቤተ ክርስቲያን አስተዳደር
• ስለ ስብከት ዘዴ አቀራረብ በተመለከተ ከ32 በላይ ለሆኑ መደበኛ ካህናት ሥልጠናው የተሰጠ ሲሆን ሠልጣኞቹ በሥልጠናው ያገኙት ግንዛቤ እራሳቸውን በሁሉም ሙያ በማብቃት መልካም የሆነ ክህነታዊ አገልግሎት እንዲሰጡ ትልቅ ሥራ መሠራቱን እራሳቸው በአንደበታቸው መስክረዋል፡፡
ስብከተ ወንጌል ክፍሉ በዕቅድ ከያዘው አንዱ ይህ ሥልጠና በመሆኑ የመጀመሪያውን ዙር በእስፖንሰር ድጋፍ ያከናወነ ሲሆን ቀጣይ ሁለተኛና ሦስኛውን ዙሮች እንደግዚአብሔር መልካም ፈቃድ በቀጣይ ጊዜያት ለመሥራት የዝግጅት ሥራውን እያከናወነ ይገኛል፡፡
በመጀመሪያው ዙር ያሰለጠናቸውንም ካህናት በ22/6/08 የቤ/ካ አባቶች በተገኙበት አስመርቋል፡፡ {flike}{plusone}

1546

የመንበረ ጸባዖት ቅድስት ሥላሴ ካቴድራል G+3 ዘመናዊ ሁለገብ ሕንፃ አስመረቀ!!!

1546

በአዲስ አበባ ሀገረ ስብከት በአራዳ ክፍለ ከተማ የሚገኘው የመንበረ ጸባዖት ቅድስት ሥላሴ ካቴድራል ያስገነባው ሁለገብ ሕንፃ ግንባታ  በመጠናቀቁ እሁድ ጥር 8/2008 ዓ.ም ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት፣ ብፁዓን አበው ሊቃነ ጳጳት ፣ የአድባራትና ገዳማት አስተዳዳሪዎች ፣ሊቃውንተ ቤተክርስቲያን እና በርካታ ምዕመናን በተገኙበት  ሁለገብ ሕንፃው ተመርቋል ፡፡
በካቴድራሉ የቀረበው አጭር የሥራ ሪፖረት እንደሚከተለው ይቀርባል፡፡
በስመ አብ ወወልድ ወመንፈስ ቅዱስ አሐዱ አምላክ አሜን
“አቀድም አእኵቶቶ ለእግዚአብሔር” ሮሜ ፩፥፰
በእግዚአብሔር  ፈቃድና ቸርነት ሥራው ሁሉ ተከናውኖ በዛሬዋ ዕለት ለካቴድራሉ ሁለገብ ሕንፃ ምረቃ በዓል በመብቃታችን በቅድሚያ ለልዑለ ባሕርይ አምላካችን ምስጋናችንን እናቀርባለን፡፡
የመንበረ ጸባዖት ቅድስት ሥላሴ ካቴድራል ያስገነባው ሁለገብ ሕንፃ በዛሬው ዕለት ለምረቃ ያበቃ መሆኑን እና በቀጣይም እያከናወነ ያለውን የልማት እንቅስቃሴ በተመለከተ አጠር ያለ መግለጫ እንዳቀርብ ቅዱስነትዎ እንዲፈቅዱልኝ ከፍ ባለ አክብሮትና ትሕትና እጠይቃለሁ፡፡
ብፁዕ ወቅዱስ አባታችን ሆይ!
ይህ ዓለም አቀፋዊ ይዘት ያለው ታላቅ ካቴድራል በግርማዊ ቀዳማዊ ዐፄ ኃይለ ሥላሴ ተመሥርቶ በአገልግሎት ላይ ከዋለበት ጊዜ አንስቶ ከመዳበኛው መንፈሳዊ ተግባርና አገልግሎት ጎን ለጎን በልማት እንቅስቃሴውም ትልቅ ሥፍራ የሚሰጠው ካቴድራል መሆኑን ሁላችንም ምስክርነታችንን የምንሰጥበት ሀቅ ከመሆኑም በላይ በእጃችን ዳሰን በዓይናችን ዓይተን የምናረጋግጠው ጉዳይ ነው፡፡
በዚህም መሠረት ግርማዊነታቸው የካቴድራሉን ቤተ ክርስቲያን በሠሩበት ወቅት የመተዳደሪያውንም ጉዳይ ቀድመው በማሰባቸው በከተማ የተለያዩ ሕንፃዎች ከከተማ ውጪ ደግሞ በተለያዩ አካባቢዎች ከአንድ መቶ ጋሻ መሬት በላይ መተዳደሪያ ሠርተውለት የነበረ ቢሆንም በአምባ ገነናዊው የደርግ ሥርዓተ መንግሥት የከተማ ትርፍ ቦታና በገጠሩም መሬት ላራሹ በሚል ሰበብ በዓዋጅ 47/67 በከተማም በገጠርም ያለው ይዞታ የተወረሰበት በመሆኑ ይዞታውን ሁሉ ሊያጣ ችሏል፡፡
ሆኖም በከተማ የሚገኙት የቤተ ክርስቲያኒቱ ንብረቶች በኢፌዲሪ መንግሥት ለቤተ ክርስቲያቱ እንደተመለሱ የሚታወስ ነው፡፡ ካቴድራሉ ግን በልማት እንቅስቃሴው ግንባር ቀደም እንደመሆኑ መጠንና በኋላም በቤተ ክርስቲያኒቱ ቃለ ዓዋዲ መሠረት ከተለያዩ እደ ጥበባት ጀምሮ ልዩ ልዩ ተቋማትን በማስፋፋት ለሌላው ምሳሌ ሆኖ ተገኘ እንጂ ራሱን የጣለበት ጊዜ የለም፡፡

0248

በዚህም መሠረት ሕልውናው ሊጠፋ የነበረውን የካቴድራሉን ዘመናዊ ትምህርት ቤት የገጠሙትን ችግሮች ሁሉ በመቋቋም ሁኔታው የጠየቀውን መሥዋዕትነት ሁሉ በመክፈል  ወደ ላቀ ደረጃ እንዲደርስ አድርጎታል፡፡ ማለትም ከአጸደ ሕፃናት እስከ መሰናዶ ት/ቤት በማድረስ የተማረ የሰው ኃይል በማፍራት ከቤተ ክርስቲያኒቱም ባለፈ በሐገር እና በዓለም ዙሪያ አንቱ የተባሉ ምሁራንን በማብቃት ከፍተኛ አስተዋጽዖ በማድረግ ላይ ይገኛል፡፡
ከዚያም በተያያዘ መልኩ በካቴድራሉ ዙሪያ የተለያዩ አገልግሎት ሰጪ ሕንፃዎችን በማስገንባት በልማት ሥራው እንቅስቃሴ ገቢ በመፍጠር ረገድ ጉልህ አስተዋጽዖ እያደረገ ያለ መሆኑ በተጨባጭ የሚታይ ነው፡፡
ብፁዕ ወቅዱስ አባታችን !
ክቡራን ጥሪ  የተደረገላችሁ እንግዶች!
በዚህ ታላቅ ካቴድራል እየተከናወኑ ያሉት የልማት ሥራዎች ሰፊ ይዘት ያላቸው ቢሆንም የግንባታ ሥራው ተጠናቆ በዛሬው ዕለት በቅዱስነትዎ ቡራኬ ለምረቃ የበቃውን ሁለገብ ሕንፃ የካቴድራሉ ሰበካ ጉባኤና ልማት ኮሚቴ በጋራ በመሆን ሴቪየር አማካሪና ተቆጣጣሪ በመባል የሚታወቀውን አማካሪ ድርጅት የመጀመሪያ ፕላኑን በነፃ ያለምንም ክፍያ ሠርቶ ያቀረበልንን የመጀመሪያ ፕላን መሠረት በማድረግ የካቴድራሉ ቴክኒክ ክፍልም በአማካሪ ድርጅቱ ተሠርቶ የቀረበውን ፕላን ካየ በኋላ የጨረታ ሰነድ አዘጋጅቶ ሕጋዊ ጨረታ በማውጣት እና የተለያዩ ተቋራጭ ድርጅቶችን አወዳድሮ ለአሸናፊው ኤቢኤም ኮንስትራክሽን ለተባለው ድርጅት በመስጠት ከጥር ወር 2005 ዓ.ም ጀምሮ ሕንፃ ግንባታው ሲካሄድ ከቆየ በኋላ በሥላሴ ፈቃድ እነሆ በዚህ ታሪካዊ ዕለት በቅዱስነትዎ ቡራኬ ተመርቆ አገልግሎት ለመስጠት ተዘጋጅቶ ይገኛል፡፡
ይህም የካቴድራሉን ደረጃ በጠበቀ መልኩ በተገቢው አማካሪ ድርጅት (ኮንሰልታንሲ) እና የሕንፃ ተቋራጭ እንዲሁም ደግሞ በካቴድራሉ ልማት ኮሚቴ የቴክኒክ -ኮሚቴ የዕለት ተዕለት ክትትል እየተደረገ የሕንፃ ግንባታው ሥራ በተፈለገው ደረጃና ጥራት ሊጠናቀቅ ችሏል፡፡
በመሆኑም የሥራ ጊዜያትን በባረከልን ቸሩ አምላካችን፣ በቅዱስነትዎ ብልህ አመራር ሰጪነትና ጸሎት በአዲስ አበባ ሀገረ ስብከትና በሌሎችም ድጋፍና ትብብር በባለቤትነት ሥራውን የሚመራው የካቴድራሉ ሰበካ ጉባኤ አስተዳደር ክትትልና ትጋት በካቴድራሉ ዕቅድና ልማት ክፍል ከፍተኛ ጥረት በመላው ማኅበረ ካህናትና ሠራተኞች ትብብር ከዚህ ካማረ ውጤት ላይ ሊደርስ በቅቷል፡፡
ብፁዕ ወቅዱስ አባታችን
ክቡራን ጥሪ  የተደረገላችሁ እንግዶች!
ከዚሁ ጋር በማያያዝም የሕንፃውን አጠቃላይ ወጪና ይዘት አጠር አድርገን ለመግለጽ እንሞክራለን፡፡
ጠቅላላ የሕንፃው ግንባታ ወጪ
1.ለሕንፃ ተቋራጩ ብር ከ 18‚000‚000 በላይ የተከፈለ ሲሆን
2.ለአማካሪ መሐንዲሱ ደግሞ ብር 137‚000 እስከ አሁን ድረስ ተከፍሏል፡፡
3.ሕንፃው አገልግሎት መስጠት ሲጀምር ከብር 72‚000‚000 ሰባ ሁለት ሚሊዮን ብር ገቢ ያስገኛል ተብሎ ይገመታል፡፡
የሕንፃው አጠቃላይ ይዘትም
1.ሕንፃው ያረፈበት ጠቅላላ ስፋት 580 ሜ.ካሬ ሲሆን
2.የወለሉ ብዛት ከምድር ቤት በታች ፣ ምድር ቤትና ሦስት ፎቅ እንዲሁም ለእስቶር አገልግሎት የሚሰጥ 120 ካ.ሜ ላይ ያረፈ ነው፡፡
የሕንፃው አገልግሎት 
1.ከምድር ቤቱ በታች እስከ አንደኛው ፎቅ ያለው ለመካነ መቃብር አገልግሎት የሚውል፣
2.ሁለተኛው ወለል ደግሞ ለካህናት ማረፊያ የሚውል 21 ክፍሎች፣ 1 የጋራ ማብሰያና ደረጃውን የጠበቀ ሻወርና መጸዳጃ ክፍል የያዘ፣
3.የመጨረሻውና (ሦስተኛው) ፎቅ 476 ሜትር ካሬ ስፋት ያለው ዘመናዊ ሁለገብ አዳራሽ ነው፡፡
4.ከሕንፃው ግራና ቀኝ በ100 ካ.ሜትር ላይ ለአፅም ማሳረፊያ እንዲሆኑ ታስበው የተሠሩ ክፍሎች ይገኛሉ፡፡
5.ጠቅላላ የፉካዎቹ ብዛት 1396 ሲሆኑ ለአፅም ማሳረፊያ የተዘጋጁት ደግሞ 1205 ፉካዎች ናቸው፡፡
የካቴድራሉ ሰበካ ጉባኤና ልማት ኮሚቴ ይህንን ሁለገብ ሕንፃ ለመሥራት ከተነሳባቸው ዋና ዋና ምክንያቶች፡-
1.ካቴድራሉ በመካነ መቃብር እየተጣበበ መሆኑ ስላሳሰሰበው እና የካቴድራሉንም ዓለም አቀፋዊ ደረጃውን፣ ውበቱንና ፅዳቱን ከመጠበቅ አንፃር እንዲሁም የምዕመናኑንም የቀብር ቦታ ችግር ለመፍታት፣
2.ካቴድራሉን በኢኮኖሚውም በኩል ራሱን ለማስቻልና የገቢ ምንጭ ለመፍጠር፣
3. በሌላም በኩል የካቴድራሉ አገልጋይ ካህናት ማረፊያ ቤቶች በተበታተነ መልኩ የሚገኙና ከካቴድራሉ አንፃር ሲታዩ አሁን ያሉት የካህናት ማረፊያ ቤቶቹ ደረጃቸውን ያልጠበቁ በመሆናቸው ችግሩን በከፊልም ቢሆን ለመቅረፍ፣
4.የአዳራሽ ጥያቄ ችግርን ለመፍታት ታስቦ ሲሆን በአነስተኛ ቦታ ላይ ወቅቱን ባማከለ መልኩ የተለያዩ አገልግሎት ሰጪ የልማት ሥራዎች እንዲዘጋጁ በማሰብ ነው፡፡
በሌላም በኩል በኵረ ምዕመናን ከበደ ተካልኝ ለካቴድራሉ በለገሱት ቦታ ላይ በተለያዩ ምክንያቶች ተቋርጦ የነበረውን ሁለገብ ሕንፃ ግንባታ እንደገና በማስቀጠል የሀገሪቱን ብሔራዊ የጨረታ ሕግ ተከትለን በተለያዩ ማስሚዲያዎች ግልጽ ጨረታ በማውጣትና በማወዳደር ጨረታውን ካሸነፈው ባማኮን ኢንጅነሪንግ ከተባለው ሥራ ተቋራጭ ጋር ህጋዊ የኮንስትራክሽን ውል ስምምነት በመፈጸም ቅድመ ክፍያ ብር 4‚152‚000.00 (አራት ሚሊዮን አንድ መቶ ሃምሳ ሁለት ሺህ ብር) ለተቋራጩ በመክፈል በአሁኑ ሰዓት የግንባታ ሥራው ቀጥሎ በመካሄድ ላይ ይገኛል፡፡
በቀጣይም የካቴድራሉ ሰበካ ጉባኤና ልማት ኮሚቴ ሊያሰራቸው/ሊያከናውናቸው ከያዛቸው ዕቅዶች መካከል፡-
1ኛ.የካቴድራሉ ሰበካ ጉባኤና ልማት ኮሚቴ ዋናውና ግንባር ቀደም ዕቅዱ አድርጎ የሚገኘው የካቴድራሉን ሕንፃ ቤተ ክርስቲያን በተገቢው ሁኔታ እንዲታደስ ማድረግ ነው፡፡ ይልቁንም እግዚአብሔር በነቢዩ ሐጌ አድሮ እንደተናገረው “በውኑ ይህ ቤት ፈርሶ ሳለ እናንተ ራሳቸሁ በተሸለሙ ቤቶቻችሁ ለመኖር ጊዜው ነውን?” ሐጌ 1፥4 እንደተባለው ደረጃውን እና የስነ ሕንፃውን እስትራክቸራል ይዘት በጠበቀ መልኩ የካቴድራሉን ሕንፃ ቤተ ክርስቲያን ዕድሳት  አስመልክቶ በእጅጉ የሚያሳስበን ትልቅ ጉዳይ ያለ በመሆኑ ከቅዱስ ሲኖዶስ ጀምሮ እስከ ሕዝበ ክርስቲያኑ ድረስ እንዲሁም መንግሥታዊ የሆኑና መንግሥታዊ ያልሆኑ አካላትንም ጨምሮ በገንዘብ፣ በሙያ፣ በሐሳብና በሌሎችም ድጋፋችሁና ትብብራችሁ እንዳይለየን በቅድስት ቤተ ክርስቲያን ስም መንፈሳዊ ጥሪያችንን አበክረን እናስተላልፋለን፡፡   
2ኛ.የካቴድራሉ አንደኛ ደረጃ ት/ቤት ግንባታ ሥራ ሲሆን ይህ ት/ቤትም ከዘመን ብዛት የተነሳ ያሉት ክፍሎች እየፈራረሱ ያሉና በእጅጉ የተጎዱ በመሆናቸው ደረጃውን በጠበቀ አዲስ ሕንፃ መተካት አስፈላጊ በመሆኑ ይህንኑ ሥራ በሁለተኛ ደረጃ ዕቅድ ይዞ ይገኛል፡፡
3ኛ. በካቴድራሉ እና በበዓለ ወልድ ቤተ ክርስቲያን ቅፅረ ግቢ የሚገኙትን የመቃብር ቦታዎች በማስተካከል እና አካባቢውን ጽዱ ለማድረግ የካቴድራሉ ሰበካ ጉባኤና ልማት ኮሚቴ ሂደቱን በማጥናት በቀጣይ የሚነሱ መቃብራትን በማንሳት በዚሁ አዲስ ሕንፃ ሥር በተዘጋጁት የአፅም ማሳረፊያ ፉካዎች ውስጥ ለማሳረፍና የግቢውንም ውበት ጽዳት ለመጠበቅ ቅድመ ዝግጅት በማድረግ ላይ ይገኛል፡፡
በዚሁ አጋጣሚ ይህንን ጉዳይ በተመለከተ በተለይም ጉዳዩ በቀጥታ የሚመለከታችሁ ሁሉ ተገቢውን ትብብርና ድጋፍ እንድታደርጉልን በአጋእዝተ ዓለም ሥላሴ ስም ጥሪያችንን እናስተላልፋለን፡፡
         ወስብሐት ለእግዚአብሔር
         የቅዱስነትዎ ቡራኬ ይድረሰን

{flike}{plusone}

በዓለ ቅድስት ሥላሴ

ሥላሴ የሚለው ቃል ‹‹ሠለሰ›› ሦስት አደረገ ከሚለው የግዕዝ ሥርወ ቃል የተገኝ ሲሆን ይህም ሦስትነት ማለት ነው፡፡ ምሥጢረ ሥላሴ ብለን ስለነገረ ሃይማኖት ስንናነገር ግን አንድም ሦስትም ተብሎ ይተረጎማል፡፡ በዚህም መሠረት እግዚአብሔርን አንድም ሦስትም ብለን ማመናችንን የምንገልፅበት የሃይማኖት ዶግማ ነው፡፡እንደሚታወቀው የሥላሴ አንድነት ስንል በባህርይ በህልውና በፈቃድ…. አንድ አምላክ ማለታችን ሲሆን  ሦስትነት ስንል ደግሞ በስም’ በአካል’ በግብር ነው፡፡
የሥላሴ አንድነት እና ሦስትነትን ከሚገልጹ ማስረጃዎች ለአብነት፡-
‹‹እግዚአብሔርም አለ ሰውን በመልካችን እንደ ምሳሌያችን እንፍጠር›› ዘፍ.1.26 ‹‹እግዚአብሔርም አለ ብሎ አንድነቱን ‹‹ሰውን በመልካችን እንፍጠር›› ብሎ ሦስትነትን ይገልጻል ፡፡ እንደ ዚሁም እነሆ አዳም መልካምንና ክፉን ለማወቅ ከእኛ እንደ አንዱ ሆነ ዘፍ.3 .22 ይህ ኃይለ ቃል ‹‹ከእኛ›› የሚለውና ‹እንደ አንዱ› የሚለው የሦስትነት ምሥጢር የሚጠቁም መሆኑን ሊቃውንት ያስረዳሉ፡፡ በዘመነ ኦሪት የሥላሴ ምሥጢር ከተገለጠበት አንዱ ለአብርሃም በመምሬ አድባር  ዛፍ ሥር ነው ፡፡ ዘፍ.18፡ 1-15 በዚህ ምዕራፍ እግዚአብሔር ለአብርሃም እንደ ተገለጠለት ወዲያውም ሦስት ሰዎች እንደ ተመለከተ አብርሃምም ሊቀበላቸው ሲጠጋ በመስገድ ‹‹አቤቱ በፊትህ ሞገስን አግኝቼ እንደሆነ›› ብሎ አንድነቱን መግለጹን አያይዞም ደግሞ “ጥቂት ውሃ ይምጣላችሁ” ብሎ በአካል ሦስት መሆናቸውን ተናገረ፡፡ በአጠቃላይ በምዕራፉ የአንድነት እና የሦስትነት ነገር እናስተውልበታለን፡፡
ነቢየ ልዑል ኢሳይያስ ‹‹ቅዱስ’ ቅዱስ’ ቅዱስ እግዚአብሔር …›› ብለው ቅዱሳን መላእክት እንደ ሚያመሰግኑ መመሥከሩ ከሦስት ሳያሳንስ’ እና ሳያስበልጥ መጠቆሙ የሥላሴን ሦስትነት የሚያሰረዳ ነው፡፡ ኢሳ.6.1- 3
የሥላሴ ሦስትነት ስንል-  በስም፡-  አብ፤ ወልድ፤መንፈስ ቅዱስ ማለታችን ነው፡፡ ‹‹ወእንዘ ታጠምቅዎሙ በሉ በስመአብ፤ወወልድ፤ ወመንፈስ ቅድስ›› እንዲል ማቴ. 28.19
በአካል፡- 
ለአብ ፍጹም ገጽ ፍጹም አካል አለው
ለወልድ ፍጹም ገጽ ፍጹም አካል አለው
ለመንፈስ ቅድስ ፍጹም ገጽ ፍጹም አካል አለው
ብለን ማመናችንን ነው ይህም የማይወሰን  የማይለካ ረቂቅ አካልን ነው፡፡ መዝ. 33.15 መዝ. 118. 73 ዘፍ.18
በግብር ሦስትነት ስንል ፡- የአብ ግብሩ መውለድ፤ማሥረጽ፤ የወልድ ግብሩ መወለድ የመንፈስ ቅዱስ ግብሩ መሥረጽ ወይም አብ አባት፣ወልድ ልጅ ፣መንፈስቅዱስ ሠራፂ ማለታችን ነው፡፡ኢሳ.48.12 መዝ.118.16 ዮሐ 16 ÷7-19
በቅዱስ ወንጌል በዮርዳኖስ እና በደብረ ታቦር የሥላሴ ምሥጢር ገሀድ ለመሆኑ ማስረጃ ሆኖ ይጠቀሳል፡፡  ማቴ. 3.16 ማቴ.17 መድኃኒታችን ኢየሱስ ክርስቶስ በመዋዕለ ስብከቱ ‹‹አነ ወአብ አሐዱ ንህነ›› እኔና አብ አንድ ነን ማለቱ እና ‹‹እኔን ያየ አብን  አየ›› ብሎ ማስተማሩ ነገረ ሥላሴን ያስረዳል ዮሐ .10.30 (14÷11) በይበልጥ አብ ወላዲ፣ ወልድ ተወላዲ መንፈስ ቅዱስ ሠራጺ በማለታችን መበላለጥ እንደሌላቸው በሥልጣን በፈቃድ አንድ መሆንን ያስገነዝበናል፡፡ ለዚሀም ነው አባ ሕርያቆስ ‹‹ኢይልህቅ አብ እምወልድ ወልድኒ ኢይንዕስ እመንፈስቅዱስ  ወመንፈስቅዱስኒ ኢይንዕስ እምወልድ ወወለድኒ አይንዕስ እምአቡሁ›› በማለት እንደማይበላለጡ አስረድቶናል፡፡ እንደዚሁም ሦስት አማልክት እያልን ሳይሆን አንድ አምላክ ማለታችን እንደሆነም እሙን ነው፡፡‹‹ወመለኮትሰ አብ ወልድ ወመንፈስ ቅዱስ አሐዱ አምላክ እንዳለው አባ ሕርያቆስ (ቅዳሴማርያም) በምሳሌም ለመረዳት ፀሐይ ከበብ፡ ብርሃን፡ ሙቀት፡ እሳትም ነበልባል፡ፍሕም፡ሙቀት፡ ሲኖራቸው ሦስት ፀሐይ ሦስት እሳት አይባሉም አንድ ፀሐይ አንድ እሳት እንጂ እንደዚሁ ሥላሴ በስም በአካል በግብር ሦስት ቢባሉም ቅሉ አንድ አምላክ እንጂ ሦስት አማልክት አይባሉም 2ኛ ቆሮ.13.14 ኤፌ. 4÷4
በኢ/ኦ/ተ/ቤ/ክ/ምሥጢረ ሥላሴ የሃይማኖት ዶግማ እና የሥርዓተ አምልኮ ሁሉ መግለጫችን ነው፡፡ ጸሎታችን፣ ጥምቀታችን፣ ቡራኬያችን…. ሁሉ በስመ ሥላሴ ነው፡፡
ይህም እንዳለ ሆኖ ነገረ ሥላሴን በበዓል ለመመስከር እና የቸርነቱ፣ የምህረቱ ተካፋይ ለመሆን በዓለ ንግሥም ይከናወናል፡፡ በይበልጥም ሐምሌ 7 ቀን ለአብርሃም በድንኳን ደጃፍ መገለጡን እና ጥር 7 በባቢሎን በሰናዖር የተፈጸመውን ተአምር በማሰብ እናከብራለን፡፡ ዘፍ.18 ዘፍ.11.1-9
በመጽሐፍ ቅዱስ እና በቅዱሳት አዋልድ መጻሕፍት እንደተመዘገበው ከጥፋት ውሃ በኋላ የኖኅ ልጆች ወልደው ተዋልደው ብዙዎች ሆኑ፡፡ በባቢሎን የነበሩት በሰናዖር ሰፊ ሜዳ አግኝተው ‹ሳንሞት ስም ማስጠሪያ ግንብ እንገንባ› ብለው መክረው ታላቅ ግንብ ገነቡ፡፡ አለቃቸው ናምሩድ ይባላል ‹‹ ሞትን የሚያመጡብን ሥላሴ ናቸውና እነርሱን ወግተን ሞትን እናርቅ ›› አላቸው ከዚያም ሆነው ጦር እየሰበቁ ይወረውሩ ጀመር ሰይጣን ከደመና በምትሀት ደም እየቀባ ይልክላቸዋል እነርሱም ደሙን እያዩ ‹‹ አሁን አብን ወጋነው አሁን ወልድን ወጋነው ….›› ይሉ ጀመር ቅድስት ሥላሴ ምንም እንኳ ምህረታቸው የበዛ ቢሆንም በሕዝቡ ላይ ዲያብሎስ ስለሠለጠነባቸው እና ለሌሎች ከሀድያን ትምህርት ይሆን ዘንድ ‹‹ንዑ ንረድ ወንክዐው ነገሮሙ›› በማለት ቋንቋቸውን ለያዩባቸው የማይግባቡ፣ የማይደማመጡ…… ሆነው ተበታትነዋል፡፡ ባለማስተዋል የሠሩትንም ሕንፃ ዓመጻ ነፋስ ጠራርጎ አጥፍቶታል፡፡ ይህን ያደረጉ ሥላሴ በመሆናቸው በዓሉ ጥር 7 ይከበራል፡፡
በአጠቃላይ ሥልጣን ሁሉ የእግዚአብሔር መሆኑን እና በራስ ደካማ አመለካከት በመታበይ በሥላሴ ሥራ መግባት’ መጠራጠር ….. እንደሚጎዳ እንደዚሁም በጽኑ እምነት በመኖር እና በሥላሴ ስም የተጠመቅን ልጅነታችንን በኃጢአት ሳናሳድፍ በንስሐ ታጥበን እና በምግባር ጸንተን መጠበቅ እንደሚገባ የበዓሉ መልእክት ያስገነዝበናል፡፡ የታማችሁበትን ቅዱሱን የእግዚአብሔርን መንፈስ አታሳዝኑ እንደሚል ፡፡ ኤፌ. 4÷30
             ውስብሐት ለእግዚአብሔር

ምንጭ፡- የአዲስ አበባ ሀገረ ስብከት ድረ ገጽ

{flike}{plusone}

 

01610

ቃለ በረከት ዘብፁዕ ወቅዱስ አቡነ ማትያስ ቀዳማዊ ዘተናገረ በእንተ በዓለ ልደት ዓቢይ ዘእግዚእነ ወአምላክነ ወመድኃኒነ ኢየሱስ ክርስቶስ ሎቱ ስብሐት

01610

ቃለ በረከት ዘብፁዕ ወቅዱስ አቡነ ማትያስ ቀዳማዊ  ዘተናገረ በእንተ በዓለ ልደት  ዓቢይ ዘእግዚእነ ወአምላክነ ወመድኃኒነ ኢየሱስ ክርስቶስ ሎቱ ስብሐት
በስመ አብ ወወልድ ወመንፈስ ቅዱስ አሐዱ አምላክ አሜን
•በሀገራችን በኢትዮጵያ በገጠርና በከተማ የምትኖሩ፣
•ከሀገር ውጭ በተለያዩ አህጉር የምትገኙ፤
•የሀገራችንን ዳር ድንበር ለመጠበቅና ለማስከበር በየጠረፉ የቆማችሁ፤
•በሕመም ምክንያት በየሆስፒታሉ ያላችሁ፤
•እንዲሁም የሕግ ታራሚዎች ሆናችሁ በየማረሚያ ቤቱ የምትገኙ ኢትዮጵያውያንና ኢትዮጵያውያት፤
የርስተ መንግሥቱ ወራሾች እንሆን ዘንድ በጌታችን በአምላካችንና በመድኃኒታችን በኢየሱስ ክርስቶስ ዳግመኛ የወለደን እግዚአብሔር አምላክ እንኳን ለሁለት ሺሕ ስምንተኛው የኢየሱስ ክርስቶስ በዓለ ልደት በሰላም አደረሳችሁ !!
‹‹ወበዝንቱ ተዐውቀ ፍቅሩ ለእግዚአብሔር ላዕሌነ እስመ ለወልዱ ዋሕድ ፈነዎ ውስተ ዓለም ከመ ንሕየው በእንቲአሁ፤ የእግዚአብሔር ፍቅሩ በዚህ በእኛ ላይ ታወቀ፤ በእርሱ በኩል በሕይወት እንኖር ዘንድ እግዚአብሔር አንድ ልጁን ወደዓለም ልኮታልና፤ (1ዮሐ.4፡9)፡፡
የእግዚአብሔር ባሕርይ ፍቅር እንጂ ጥላቻ አይስማማውም፤ ጽድቅ እንጂ ሐሰት አይዋሐደውም፤ ብርሃን እንጂ ጨለማ አይቀርበውም፤ ሕይወት እንጂ ሞት በእርሱ ዘንድ የለምና በፍጹም ፍቅሩ እኛን ለመፈለግ ሥጋችንን ለብሶ በመካከላችን ስለተገኘ ለእርሱ የሚገባ የአምልኮ ምስጋና እናቀርባለን ፡፡
እግዚአብሔር ፍጹም በሆነ ፍቅሩ ሰማያትንና ምድርን እንደዚሁም በውስጣቸው የሚገኙትን፣ የሚታዩና የማይታዩትን ፍጥረታት ሁሉ ካለመኖር ወደ መኖር አምጥቶአል፤ ወይም አስገኝቶአል፣
ፈጣሬ ፍጥረታት የሆነ እግዚአብሔር አምላካችን በየዓይነቱ የፈጠራቸው ፍጥረታት በእርሱ ዘንድ ከሚታወቁ በስተቀር በፍጡራን ዓቅም ተቆጥረው የሚዘለቁ ባይሆኑም በጥቅሉ የሚታዩና የማይታዩ፣ ሕይወት ያላቸውና የሌላቸው ተብለው ሊመደቡ ይችላሉ ፡፡
ከፍጡራን መካከል ሕይወት ያለውና በግዙፋኑ በኩል ሊታይ የማይችለው የቀደመ ስሙ ሳጥናኤል የኋላ ስሙ ሰይጣን፣ ወይም ዲያብሎስ የተባለ ረቂቅ መልአክ፣ ከእግዚአብሔር የተሰጠውን ነጻ ፈቃድ ለክፉ ነገር በመጠቀም በፈጸመው ትልቅ በደል ለፍርድና ለቅጣት ተዳርጎአል (ኢሳ. 14፡12-15፤ ይሁ1፡6) ፡፡
ይህ ስሑት ፍጥረት በራሱ ስሕተት ሳያበቃ ሕያው ሆኖ በግዘፍ የሚታየውን ሰው በማሳሳት እንደእርሱ ለፍርድና ለቅጣት እንዲጋለጥ አደረገ (ዘፍ 3፡1-24፤ ራእ፣ 12፡7-9)
በዚህም ምክንያት ሰው ሕይወቱን አጣ፤ ሕይወት ማጣት ማለት እግዚአብሔርን ማጣት ወይም ከእግዚአብሔርና ከመልካም ስጦታው መለየት፣ መራቅ፣ መወገድ ማለት ነው፡፡
ዲያብሎስ በዘረጋው ወጥመድ ተሰነካክሎ የወደቀውና ሕይወቱን ያጣው ሰው ለድርብ የሞት ፍርድ ተዳረገ፤
በዚህ ፍርድ መነሻነትም አዳም ከነልጆቹ በሞተ ሥጋ ላይ ሞተ ነፍስ፣ በርደተ መቃብር ላይ ርደተ ገሃነም ወይም ሥጋው በመቃብር ነፍሱ በገሃነም እንዲቀጣ ተፈረደበት (ዘፍ.2፡17፤3፡ 16-20)
ይህ ሁሉ ሊሆን የቻለው አዳም ከእግዚአብሔር በመለየቱ ነው፤ ከእግዚአብሔር የተለየች ሕይወት ለጊዜው ያለች እንኳ ብትመስል ለዘለቄታው የለችምና በቁም ሳለች የሞተች ናት ፡፡
ጌታችን አምላካችንና መድኃኒታችን ኢየሱስ ክርስቶስ ‹‹ከግንዱ የተለየ ዛፍ ፍሬን ማፍራት እንደማይችል ሁሉ በእኔ የማይኖርም እንደቅርንጫፍ ወደውጭ ይጣላል፣ ይደርቅማል፣ በእሳትም ያቃጥሉታል›› ሲል ያስተማረን ከእግዚአብሔር ውጭ የሆነ ሁሉ ሕይወትን ጨምሮ ምንም ምን ሊያገኝ የማይችል መሆኑን ለማስረዳት ነው (ዮሐ15፡4-6)፡፡
የተወደዳችሁ የመንፈስ ቅዱስ ልጆቻችን ምእመናንና ምእመናት
ከሰው ልጅ ቀዳማዊ ታሪክ በመነሣት የተፈጸመውን እውነታ ስናስተውል ሰው የሕይወት ራስ የሆነውን እግዚአብሔርን በማጣቱ ከባድ የሆነ የሞት ቅጣት እንዳጋጠመው እናያለን፡፡
ከዚህ በኋላ የተነሣው ጥያቄ ሰው ከዚህ የሞት ቅጣት እንዴት ሊድን ይችላል? የሚለው ነው፡
እግዚአብሔር በልጁ በኩል መልሱን እንደነገረን ሰው ሊድን የሚችለው በፍቅረ እግዚአብሔር ነው፤ ጌታችን ኢየሱስ ክርስቶስ በቅዱስ ወንጌል ‹‹እግዚአብሔር አንድያ ልጁን እስኪሰጥ ድረስ ዓለሙን እስከዚህ ድረስ ወዶታል›› ብሎ የድኅነት መነሻውና መድረሻው ፍቅረ እግዚአብሔር እንደሆነ ነግሮናልና ነው (ዮሐ.3፡16-18)
የጌታችን ደቀመዝሙር የሆነው ሐዋርያው ቅዱስ ዮሐንስም ‹‹እግዚአብሔር ፍቅር ነው፣ በእርሱ በኩል በሕይወት እንኖር ዘንድ አንድ ልጁን ወደዓለም ልኮአልና የእግዚአብሔርን ፍቅር በዚህ ዓውቀናል፤ በፍቅር የሚኖር በእግዚአብሔር ይኖራል፤ እግዚአብሔርም በእርሱ ይኖራል››ሲል የሕይወታችን ማግኛ ቁልፍ ነገር ፍቅረ እግዚአብሔር እንደሆነ ያረጋግጣል፤ (1ዮሐ4፡16)
ሁሉን የፈጠረና ሁሉን የሚችል ቃለ እግዚአብሔር ወልድን ስቦና ጎትቶ ወደኛ ያመጣው ሌላ ባዕድ ኃይል ሳይሆን በባሕርዩ ውስጥ ያለው ፍጹም ፍቅር ነው ፡፡
ቃለ እግዚአብሔር ወልድ በዚህ ፍቅር ምክንያት ወደእኛ መጣ፣ መጥቶም ሥጋችንን ከማይሞተው አካለ መለኮቱ ጋር በማዋሐድ መለያየትን አስወግዶ ወደእርሱ አቀረበን፡፡
የመለኮትና የሥጋ ተዋሕዶ መጋቢት 29 ቀን በማኅፀነ ማርያም ሲፈጸም ከዚያን ጊዜ ጀምሮ ባሕርየ መለኮት፣ ባህርየ ሥጋን ገንዘብ አደረገ፤ ባህርየ ሥጋም፣ ባህርየ መለኮትን ገንዘብ አደረገ፤ በዚህም መሠረት የአምላክና የሰው ተዋሕዶ ተፈጸመ፡፡
ሰው የሆነው ቃለ እግዚአብሔር ወልድ በተፀነሰ በዘጠኝ ወር ከአምስት ቀን፣ በታሕሣሥ ወር፣ በዛሬው ዕለት ከቅድስት ድንግል ማርያም በቤተልሔም ተወለደ፤
በዳዊት ከተማ በቤተልሔም የተወለደው ቃለ እግዚአብሔር ወልድ ሥጋችንን ተዋሕዶ በፈጸመው የኃጢአት ካሣ፣ እኛ ከሞት ፍርድ ነጻ ወጥተን ወደ ሕይወት ለመሸጋገር በቅተናል፤ ይህም የሆነው በፍቅረ እግዚአብሔር ነው ፡፡
በመሆኑም ዛሬ በማክበር ላይ የምንገኘው ዓቢይ በዓል በእግዚአብሔር ፍቅር ተመሥርቶ ሰውን ለማዳን የተፈጸመው የጌታችን የአምላካችንና የመድኃኒታችን የኢየሱስ ክርስቶስ በዓለ ልደት ነው፤ (ሉቃ.2፡6-20)
የልደተ ክርስቶስ በዓል የሰላምና የደስታ፣ የአንድነትና የፍቅር፣ የነጻነትና የእኩልነት በዓል ነው፤ በዚህ ዕለት ሰማያውያን መላእክትና ምድራውያን እረኞች በአንድነትና በፍቅር ‹‹በምድርም ሰላም ይሁን›› እያሉ ስለ ሰላምና ደስታ ዘምረዋል፤
ይህ ዕለት ምድራውያን ነገሥታትና በዝቅተኛ ኑሮ የሚኖሩ እረኞች ፈጣሪያቸውን በእኩልነት ያዩበትና የሰገዱበት፣ በሰማያውያንና በምድራውያን ማለትም በእግዚአብሔርና በሰዎች፣ በሰዎችና በመላእክት መካከል ልዩ ግንኙነት እንደተፈጠረ የተገለፀበት፣ የተበሠረበትና የተዘመረበት ቀን በመሆኑ በዓሉ የሰላምና የደስታ፣ የአንድነትና የፍቅር፣ የነጻነትና የእኩልነት በዓል ተብሎ ይታወቃል፡፡
የተወደዳችሁ የመንፈስ ቅዱስ ልጆቻችን ምእመናንና ምእመናት፤
የዚህ በዓል ዓቢይ መልእክት ‹‹ሰላም በምድር ይሁን›› የሚል መሆኑን በውል መገንዘብ አለብን (ሉቃ. 2፡14)
እግዚአብሔር ጥላቻን፣ መነቃቀፍን፣ መለያየትን፣ ራስ ወዳድነትን አይወድም ባህርዩ ፍቅር የሆነ እግዚአብሔር እነዚህን የማይወድ መሆኑን በማወቃቸው ነው ሰማያውያኑና ምድራውያኑ በአንድነት ሆነው ሰላም በምድር ይሁን ብለው የዘመሩ፤
ማንም ይሁን ማን፣ በየትኛውም ደረጃ ወይም አካባቢ ይኑር፣ ከሰላም ውጭ ጥቅሙን ማረጋገጥ የሚችል የለም፣ ሊኖርም አይችልም፤ በሰላም ውስጥ ሆኖ ግን ሁሉንም ማግኘት እንደሚቻል ባለፉት ሁለት ዐሥርት ዓመታት ውስጥ የታየው ውጤት ምስክር ነው፡፡
ዛሬም ዓለማችንም ሆነ ሀገራችን ከሰው ሠራሽና ከተፈጥሮ አደጋዎች በቀላሉ ማምለጥ የሚችሉት ከሁሉ በፊት ሰላምን በአስተማማኝ ሁኔታ ይዘው ሲጓዙ ነው፤
ጌታችን ኢየሱስ ክርስቶስ በዚህ ዓለም ተመላልሶ ሰውን ከሞት ያዳነው ማንንም ሳይጎዳ በሰላም ጎዳና ብቻ ተጉዞ ነው ፡፡
ጥላቻና ራስ ወዳድነት ሲያፈርሱና ሲያጠፉ እንጂ ሲያለሙና ሲገነቡ በየትኛውም የዓለማችን ክፍል ታይተውም፣ ተሰምተውም፣ በታሪክ ሲደገፉም አይተን አናውቅም፤
ሀገራችን ኢትዮጵያ በአሁኑ ጊዜ በልማትና በዕድገት እየገሠገሠች ያለች፣ በዓለም አቀፍ ደረጃ የነገ ብሩህ ተስፋ ትሆናለች ተብላ ተስፋ የተጣለባት ሀገር ነች፤
ይህ ተስፋ እግዚአብሔር ባርኮልን በሃይማኖት፣ በዘር፣ በቋንቋ፣ በቀለም ወዘተ ሳንለያይ መላ ኢትዮጵያውያን አንድ ሆነን ያስገኘነው የልማት ፍሬ እንደሆነ ለማንም ግልጽ ነው፡፡
የተገኘው ፍሬ ልማት እየበረከተና እየደለበ ወደፊት እንዲቀጥልና እንዲያድግ እንጂ በማናቸውም ምክንያት ወደኋላ እንዲመለስ ሕዝባችን መፍቀድ የለበትም፡፡
መላው ሕዝባችን በሚገባ ማጤን ያለበት ነገር ቢኖር ምንጊዜም የችግር መፍትሔ ሰላምና ልማት እንጂ ሌላ አማራጭ መፍትሔ የሌለ መሆኑን ነው፡፡
ስለሆነም ሁሉም የሀገራችን ሕዝቦች የገናን የሰላም መዝሙር እየዘመሩ ለጋራ ዕድገትና ለእኩልነት፣ ለሕዝቦች አንድነትና ለዘላቂ ልማት በጽናት መቆም ይኖርባቸዋል ፡፡
ሰላም ትልቁ የገና ስጦታ ነው፤ ልማትም የህልውና ማረጋገጫ ጸጋ ነው፤ ሁሉንም በእኩል እንጠብቃቸው፡፡
በመጨረሻም
በዚህ ዓመት በሀገራችን በተከሠተው የዝናም እጥረት ምክንያት ለምግብ እጦት የተጋለጡ በርካታ ወገኖቻችን የወገንን እጅ በተስፋ እየተጠባበቁ ይገኛሉ፤
እነዚህ ወገኖች ግማሽ አካላችን መሆናቸውን ተገንዝበንና ጌታችን እኛን ለመፈለግ ወዳለንበት የመጣበትን ፍቅር አብነት አድርገን፣ እኛም እነርሱ ወዳሉበት በፍቅር በመሄድ በሁሉም ነገር ልንረዳቸውና አለን ከጎናችሁ ልንላቸው ይገባል፤
አነሰ ሳንል በወቅቱ ፈጥነን እጃችንን ልንዘረጋላቸውና በአጠገባቸው ሆነን ልናበረታታቸው ይገባል፤ እግዚአብሔር ሁላችንን እንደወደደን እኛም ወንድሞቻችንን በመመገብ፣ በማልበስና ችግራቸውን ሁሉ በመጋራት ለእግዚአብሔርና ለወንድሞቻችን ያለንን ፍቅር ዛሬውኑ በተግባር እንድናሳይ መልእክታችንን በእግዚአብር ስም እናስተላልፋለን ፡፡
እግዚአብሔር ኢትዮጵያንና ሕዝባችንን ይባርክ
መልካም የልደት በዓል ያድርግልን
ወስብሐት ለእግዚአብሔር
አሜን

አባ ማትያስ ቀዳማዊ
ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት
ታሕሣሥ 28 ቀን 2008 ዓመተ ምሕረት
አዲስ አበባ ኢትዮጵያ

{flike}{plusone}

እመቤታችን ቅድስት ድንግል ማርያምና ታቦተ ጽዮን

እግዚአብሔር አምላክ ሕዝበ እስራኤልን ከግብጽ ባርነት ካወጣቸው በኋላ የአምልኮ ሥርዐታትን ይፈጽሙበት ዘንድ የምስክሩን ድንኳን፣ የቃል ኪዳኗ ታቦትንና ለአምልኮ ሥርዐቱ ማከናወኛ የሚያገለግሉ ልዩ ልዩ ንዋያተ ቅድሳትን እንዲሠሩ በሙሴ በኩል ታዘው ነበር፡፡ ከቃል ኪዳኗ ታቦት ውስጥም በእግዚአብሔር ጣት ዐሥርቱ ትእዛዛት የተጻፉበት የሕጉ ጽላት፣ አርባ ዓመት ሙሉ እስራኤላውያን በሲና ምድረበዳ የተመገቡትን መና የያዘች መሶበ ወርቅ፣ አሮን ለክህነት አገልግሎት ስለመመረጡ ምስክር የሆነችው ለምልማና ፍሬ አፍርታ የተገኘችው የአሮን በትር ይገኙባታል፡፡(ዕብ.9፡4)
ታቦተ ጽዮን በእመቤታችን ቅድስት ድንግል ማርያም ትመሰላለች፡፡ ይህን ለመረዳት ግን ስለ ታቦተ ጽዮን አሠራርና መንፈሳዊ ትርጉም አስቀድመን ልንረዳ ይገባናል፡፡ እግዚአብሔር አምላክ ታቦተ ጽዮንን እንዲሠራ ብልሃትን፣ ጥበብን፣ ማስተዋልን፣ ዕውቀትን ይለይ ዘንድ መንፈሱን ያሳደረበትን ከይሁዳ ወገን የሆነውን ባስልኤልን መረጠ ፡፡(ዘፀ.25፡9) እርሱም እግዚአብሔር በሰጠው ማስተዋል ከማይነቅዝ እንጨት ርዝመቷ ሁለት ክንድ ተኩል፤ ወርዱዋም አንድ ክንድ ተኩል፣ ቁመቷም አንድ ክንድ ተኩል እንዲኖራት አድርጎ ታቦቷን ሠራት፡፡ በመቀጠል በውስጥም በውጪም በጥሩ ወርቅ ለበጣት፣ ከታቦቷም ዙሪያ የወርቅ አክሊልን አደረገላት፡፡
ካህናት ታቦተ ጽዮንን ለመሸከም እንዲረዳቸውም በዐራቱም መዓዘናት በወርቅ የተሠሩ ቀለበቶችንና በእነርሱም ውስጥ የሚገቡ ሁለት መሎጊያዎችን ሠራ፡፡ ከጥሩ ወርቅም የስርየት መክደኛውን በቃል ኪዳን ታቦቷ ላይ በርዝመቷና በወርደዋ ልክ ሠራ፡፡ የስርየት መክደኛውን እንዲጋርዱት አድርጎም ጥሩ ከሆነ ከተቀጠቀጠ ወርቅ ኪሩቤልን ሠራ፤ በስርየት መክደኛው ግራና ቀኝም አደረጋቸው፡፡ እነዚህ በጥሩ ወርቅ የተሠሩት ሁለቱ ኪሩቤል ፊታቸው ወደ ስርየት መክደኛው ሆኖ እርስ በእርሳቸው የሚተያዩ ተደርገው የተሠሩ ናቸው ፡፡ በዚህ በስርየት መክደኛው በሁለቱ ኪሩቤል መካከል እግዚአብሔር ለሙሴ በመገለጥ ሰው ከባልንጀራው እንደሚነጋገር ያነጋግረው ነበር፤ ለሕዝቡ በደመና ዐምድ ይታያቸው ነበር፡፡(ዘፀ.25፡22፤33፡8-11)
ወደ ትርጓሜው ስንመጣ ታቦተ ጽዮን የእመቤታችን የቅድስት ድንግል ማርያም ምሳሌ ስትሆን፣ በውስጡዋ የያዘችው የሕጉ ጽላት የጌታችን የመድኃኒታችን የኢየሱስ ክርስቶስ ምሳሌ ነው፡፡ ታቦቷ ከማይነቅዝ እንጨት መሠራቷ የጌታን እናት ንጽሕናን የሚያመለክት ሲሆን በውጪም በውስጧም በጥሩ ወርቅ መለበጡዋ የቅድስናዋና ድንግል በሕሊና ወድንግል በሥጋ መሆኗን የሚያስረዳን ነው፡፡ ታቦቷን ዐራት ሌዋውያን ካህናት ይሸከሟት ዘንድ በግራና በቀን በተዘጋጁ ዐራት ከወርቅ የተሠሩ ቀለበቶች ሲኖሩአት፤ በነዚያ የወርቅ ቀለበቶች ውስጥ ሁለት መሎጊያዎች ይገቡባቸዋል፡፡ ታቦተ ጽዮንን ለማንቀሳቀስ ሲፈለግ ዐራት ካህናት

በመሎጊያዎቹ ይሸከሟታል፡፡
ይህ ሥርዓት በሰማያትም የሚታይ እውነታ ነው፡፡ የጌታን መንበር ገጸ ንሥር፣ ገጸ ሰብእ፣ ገጸ ላህም፣ ገጸ አንበሳ ያላቸው አርባዕቱ እንስሳት ይሸከሙታል፡፡(ኢሳ.6፡1-5፤ ሕዝ.1፡1-16) እንዲሁም ለአማናዊቷ ታቦት ቅድስት ድንግል ማርያም የምሥራች የሚናገሩ፣ ሰላምንም የሚያወሩ፣ የመልካምንም ወሬ፣ መድኃኒትንም የሚያወሩ፣ ጽዮንንም አምላክሽ ነግሦአል የሚሉ እግሮቻቸው በተራሮች ላይ እጅግ ያማሩ ናቸው የተባለላቸው የእርሱዋንና የጌታችን ስም ተሸክመው የሚሰብኩ ወንጌላውያን አሏት፡፡(ኢሳ.52፡7)የስርየት መክደኛው ታቹ መቀመጫው ንጹሐን አንስት ላዩ መክደኛው የንጹሐን አበው ግራና ቀኙ የወላጆቹዋ የሐናና የኢያቄም ምሳሌ ነው፡፡ እርሱን በክንፎቻቸው የጋረዱት ኪሩቤል የጠባቂ መልአክ ቅዱስ ሚካኤልና የአብሣሪው መልአክ ቅዱስ ገብርኤል ምሳሌዎች ናቸው፡፡
የስርየት መክደኛው ስርየቱ የሚፈጸምበት ስፍራ ነው፡፡ ነገር ግን እውነታውን ስንመለከት በዚህ ቦታ ምንም ዓይነት መሥዋዕት ሲቀርብ እንዳልነበር እንረዳለን፡፡ ይህም በጊዜው አማናዊው መሥዋዕት ገና እንዳልተሠዋ ያስገነዝበናል፡፡ ይህ ስፍራ እግዚአብሔር ለሙሴ የሚገለጥበት ቦታ ነው፤ ከእርሱ ውጪ ሌላ ነገር በእዚያ ላይ ማረፍ የለበትም፡፡ ይህ በራሱ የሚሰጠን አንድ ማስተዋል አለ፡፡ እግዚአብሔር አምላክ ለአዳም የገባውን ቃል ኪዳን ሊፈጽም ሰው በሆነ ጊዜ ራሱን መሥዋዕት አድርጎ የሚያቀርብበት ልዩ ስፍራ እንዳለ ያመላክተናል፡፡ ስለዚህም ይህ ስፍራ ለዚህ እንደተጠበቀ ወይም በዚህ ምሳሌ አማናዊ መሥዋዕት የሚቀርብበት ሥፍራ እንደሚያስፈልግ የሚያሳስብ ነው፡፡ ይህ እንደሆነ ለማመልከት ሲባል ለኃጢአት የቀረበው መሥዋዕት ከታረደ በኋላ ካህኑ ደሙን በጣቱ በመንከር ሰባት ጊዜ በስርየት መክደኛው አንጻር በመገናኛ ድንኳን ውስጥ ይረጨው ነበር፡፡(ዘሌዋ.4፡6) ነገር ግን ይህ ደም ከዚያ ስርየት መክደኛው ላይ አያርፍም ነበር ምክንያቱም በዚህ ስፍራ መቅረብ ያለበት መሥዋዕት መለኮት የተዋሐደው ነፍስ ግን የተለየው የጌታችን የመድኃኒታችን የኢየሱስ ክርስቶስ ክቡር ሥጋውና ቅዱስ ደሙ ነውና፡፡
ይህ የስርየት መክደኛ ሌላም ለእኛ የሚያስተላለፈው መልእክት አለው፡፡ መልእክቱም አማናዊው መሥዋዕት መቅረቡ እንደማይቀርና፣ መሥዋዕቱ የሚቀርብበት ስፍራ በቅድስተ ቅዱሳን ውስጥ ሆኖ እግዚአብሔር በምሕረት በሚገለጥበት በጸጋ ዙፋኑ በጽላቱ ላይ መሆን እንዳለበት ነው፡፡(ዕብ.4፡16) በዚህም እግዚአብሔር አምላክ በነቢዩ ሚልክያስ ከፀሐይ መውጫ ጀምሮ እስከ መግቢያዋ ድረስ ስሜ በአሕዛብ ዘንድ ታላቅ ይሆናልና በየስፍራውም ስለስሜ ዕጣንን ያጥናሉ ንጹሕም ቁርባን ያቀርባሉ(ሚል.1፡11) እንዳለው የስርየት መክደኛው በዓለም ዙሪያ ላለችው አንዲት ቅድስት ቤተክርስቲያን ምሥጢረ ቁርባንን ለምትፈጽምበት ጽላት ወይም ታቦት ምሳሌ መሆኑን ያሳየናል፡፡ በሐዲስ ኪዳን ጽላቱ(ታቦቱ) የሚያርፍበት ስፍራ መንበር ተብሎ ሲጠራ የእግዚአብሔር ስም የተጻፈበትና ቅዱስ ሥጋው ክቡር ደሙ የሚፈተትበት ደግሞ ጽላት ወይም ታቦት ወይም መሠዊያ ተብሎ ይጠራል፡፡

የስርየት መክደኛው በታቦቱ አናት ላይ መሆኑም ቅዱስ ኤፍሬም የእኛን ሥጋ ለነሣኸውና ፣ መልሰህ ለእኛ ለሰጠኸን ፣ ለአንተ ክብር ምስጋና ይሁን ፡፡ ከእኛ በሆነው ሥጋህ በኩል እጅግ የበዛውን የአንተን ስጦታ ተቀበልን፡፡ብሎ እንዳመሰገነ፤ እግዚአብሔር ቃል ከቅድስት ድንግል ማርያም ተወልዶ ራሱን መሥዋዕት አድርጎ ማቅረቡን ያሳየናል፡፡ የስርየት መክደኛውን የሚጋርዱት በጥሩ ወርቅ የተሠሩት የኪሩቤል ምስሎችም አማናዊው መሥዋዕት በሚሠዋበት ጊዜ በዙሪያው ረበው የሚገኙ የመላእክት ምሳሌዎች ናቸው፡፡ ይህን ለማስገንዘብ ቅድስት ቤተ ክርስቲያናችን በመንበረ ታቦቱ ላይ ምስለ ፍቁር ወልዳ እንዲቀመጥ ታዝዛለች፡፡ ምስለ ፍቁር ወልዳን ላስተዋለ ሰው በትክክል የታቦተ ጽዮንን መንፈሳዊ ትርጉምን ይረዳል፡፡
ይህን ድንቅ የሆነ መንፈሳዊ ትርጉምን ይበልጥ ለመረዳት አንድ ምሳሌ የሚሆነንን እውነታ እንመልከት፡፡ ንጉሥ ዳዊት የእግዚአብሔርን የቃል ኪዳኑ ታቦት ከአቢዳር ቤት ወደ ጽዮን ከተማ ባስመጣበት ጊዜ በታቦተ ጽዮን ፊት ለእግዚአብሔር በሙሉ ኃይሉ በደስታ እየዘለለ መንፈሳዊ መዝሙርን አቅርቦ ነበር ፡፡(2ሳሙ.6፡12-17) ይህን ዓይነት ተመሳሳይ ድርጊት በሐዲስ ኪዳንም ተፈጽሞል ፡፡ እመቤታችን ቅድስት ድንግል ማርያም ቅድስት ኤልሳቤጥን በተሳለመቻት ጊዜ የስድስት ወር ፅንስ የነበረው ቅዱስ ዮሐንስ መጥምቅ የጌታችንን እናት የሰላምታ ድምፅ በሰማ ጊዜ እንደ አባቱ እንደ ዳዊት ከእናቱ ማኅፀን ውስጥ ሳለ በደስታ ዘሎአል(ሰግዶአል)፡፡ (ሉቃ.1፡44) ቅዱስ ዳዊት በታቦተ ጽዮን ፊት እንዲያ ደስ መሰኘቱና ለአምላኩ የምስጋና ቅኔን መቀኘቱ ለሰው ልጆች ሁሉ የመዳናቸው ምክንያት የሆነችውን ቅድስት ድንግል ማርያምንና ልጁዋን ኢየሱስ ክርስቶስን በታቦተ ጽዮን በኩል በማየቱ ነበር፡፡
ቅዱሳን የቤተ ክርስቲያን አባቶችም ይህንን እውነታ ይጋሩታል ፡፡ ለምሳሌ ቅዱስ ኤፍሬም፡- ከአዳም ጎን በተገኘችው አንዲት አጥንት ምክንያት ሰይጣን ከአዳም ማስተዋልን አራቀ፡፡ ነገር ግን ከእርሱ አብራክ በተገኘችው በቅድስት ድንግል ማርያም ምክንያት በእርሱ ላይ ሠልጥኖ የነበረው ሰይጣን እንደ ዳጎን ተሰባብሮ ወደቀ፡፡ ታቦተ ጽዮን በተባለችው በቅድስት ድንግል ማርያም ማኅፀን ውስጥ ባደረው በጌታችን በመድኀኒታችን በኢየሱስ ክርስቶስ የድል አዋጅ ታወጀ ፡፡ በቃል ኪዳኑዋ ታቦት ሥር ዳጎን ተሰባብሮ እንደተገኘ እንዲሁ ክፉው ሰይጣን በታመኑበት ፊት ድል ተነሳ፡፡
እግዚአብሔር በቃል ኪዳኗ ታቦት ኃይሉን በመግለጥ ዳጎንን ሰባብሮ እንደጣለው እንዲሁ እግዚአብሔር ቃል ከቅድስት ድንግል ማርያም በሥጋ በመወለድ በኃጢአት ምክንያት በእኛ ላይ ሠልጥኖ የነበረውን ሰይጣንን ድል ነሳው፡፡ (1ሳሙ.5፤6) ሲል ቅዱስ ጀሮም ደግሞ  ቅድስት ድንግል ማርያም ቅድስትና ንጽሕት ነበረች፡፡ በቃል ኪዳኗ ታቦት ውስጥ የሕጉ ጽላት ብቻ እንደነበር እንዲሁ እርሷም በሕሊናዋ ከእግዚአብሔር ሕግጋት ውጪ ሌላ ምንም ሃሳብ አልነበራትም፡፡ ቅድስት ድንግል ማርያም በውስጥም በውጪም ነውር የሌለባት ንጽሕት ናት፡፡ እንደ ቃል ኪዳኗ ታቦት በውጪም በውስጥም በቅድስና የተጌጠችና ሕጉንም ጠብቃ የተገኘች የክርስቶስ ሙሽራ ናት ፡፡ በቃል ኪዳን ታቦቱ ውስጥ ከሕጉ ፅላት ውጪ ሌላ ምንም ነገር እንደሌለ እንዲሁ አንቺም ቅድስት ሆይ በሕሊናሽ ምንም ነውር የሌለብሽ ቅድስት ነሽ፡፡ብሎ ሲያመሰግናት፤ የእስክንድርያው ዲዮናስዮስ ደግሞ ጌታችን መድኃኒታችን ኢየሱስ ክርስቶስ ካህን ይሆን ዘንድ በሰው እንዳልተመረጠ እንዲሁ ቅድስት ድንግል ማርያም የጌታ ማደሪያ ትሆን ዘንድ በእግዚአብሔር የተመረጠችና በመንፈስ ቅዱስ ለእርሱ ማደሪያነት የተዘጋጀች ናት፡፡ የመለኮት ማደሪያ ቅድስት ድንግል ማርያም እግዚአብሔር የከተመባት ከተማ ሆና ትኖር ዘንድ ለዘለዓለም በእግዚአብሔር ታትማለች  በማለት ስለእርሱዋ ይመሰክራል፡፡
አዳም ድኅነቱ ከሴት ወገን በሆነች በቅድስት ድንግል ማርያም በኩል እንደሆነ ተረድቶ ለሚስቱ  ሔዋን ብሎ ስም እንደሰጣት እንዲሁ ንጉሥ ዳዊት በቅድስት ድንግል ማርያም በኩል እንደሚድን በመረዳቱ አምባዬና መጠጊያዬ ነሽ ሲላት ጽዮን ብሎ ለድንግል ስያሜን እንደሰጣት በመዝሙራቱ ማስተዋል እንችላለን፡፡ጽዮን የንጉሥ ዳዊት ተራራማዋ ከተማ ስትሆን፣ የስሟ ትርጓሜ አምባ፣ መጠጊያ ማለት ነው፡፡ ይህን ይዘው ብዙዎች ነቢያት ስለድንግል ሲናገሩ ጽዮን የሚለውን ስም ተጠቅመዋል፡፡
ነቢያት ስለቅድስት ድንግል ማርያም ሲናገሩ ጽዮን የሚለውን ስም እንደሚጠቀሙ ወደ ብሉይ ኪዳን ሳንገባ በሐዲስ ኪዳን ብቻ ስለ ጽዮን የተጻፉትን በማንሣት ማረጋገጥ እንችላለን፡፡ ለምሳሌ ነቢዩ ኢሳይያስ ከአይሁድ ወገን የሆኑ የራሳቸውን ሥርዐትና ሕግ ለማቆም ሲሉ በክርስቶስ ከማመን ስለተመለሱት ሲጽፍ፡- እነሆ በጽዮን የእንቅፋት ድንጋይና የማሰናከያ ዐለት አኖራለሁ(ኢሳ28፡16፣8፡14) አለ፡፡ ቅዱስ ጳውሎስ ይህን ስለክርስቶስ የተነገረ ነው በማለት በሮሜ 9፡33 ላይ ጠቅሶት እናገኛለን፡፡ስለዚህም ነቢዩ ኢሳይያስና ቅዱስ ጳውሎስ ጽዮን ያሏት ቅድስት ድንግል ማርያምን እንደሆነ በዚህ ኃይለ ቃል መረዳት እንችላለን፡፡ የማሰናከያ ዐለት የተባለው ክርስቶስ እንደሆነም እነሆ የብዙዎች ልብ ሐሳብ ይገለጥ ዘንድ ይህ ለእስራኤል ላሉት ለብዙዎች ለመውደቃቸውና ለመነሣታቸው ለሚቃወሙትም ምልክት ተሾሞአል፡፡(ሉቃ.2፡34-35) ተብሎ ተጽፎአል፡፡ ስለዚህ የማሰናከያ አለት የተባለውን ክርስቶስን ፀንሳ የወለደችው ቅድስት ድንግል ማርያም ጽዮን መባሉዋን በእነዚህ ጥቅሶች ማረጋገጥ እንችላለን፡፡
ነቢዩ ዳዊትና ኢሳይያስ ጽዮን ከተሰኘች የሙሴ ፅላት ካህኑ በሚያቀርበው መሥዋዕት አማካኝነት አፋዊ ድኅነት እንደተደረገ፣ ከእመቤታችን ከተወለደው አማኑኤል አማናዊ ድኅነት እንዲፈጸምልን መድኃኒት ከጽዮን ይወጣል ከያዕቆብም ኃጢአተኝነትን ያስወግዳል(መዝ.13፡10፤ኢሳ.59፡20) በማለት ስለክርስቶስ ትንቢትን ተናግረዋል፡፡ ይህንንም ቅዱስ ጳውሎስ ለጌታችን ለመድኃኒታችን ሰጥቶ በሮሜ.11፡26 ላይ ተጠቅሞበታል፡፡ በዚህም ቦታ ጽዮን ያሏት ቅድስት ድንግል ማርያምን መሆኑን ማስተዋል እንችላለን፡፡ ምክንያቱም እርሱ ከእርሱዋ እንጂ ከሌላ አልተወለደምና፡፡ ነገር ግን መድኃኒትየተባለው ጌታችን መድኃኒታችን ኢየሱስ ክርስቶስ ስለመሆኑ መልአኩም እንዲህ አላቸው፡- እነሆ ታላቅ ደስታ የምሥራች እነግራችኋለሁ በዳዊት ከተማ መድኅኒት እርሱ ክርስቶስ ተወለደ(ሉቃ.2፡10) በማለት ገልጾልናል፡፡ ከዚህ በተጨማሪ ኢየሱስ ማለት መድኃኒት ማለት ነው (ማቴ.1፡21) የኢየሱስም እናት ደግሞ ቅድስት ድንግል ማርያም መሆኑዋን ማንም የማይክደው ሐቅ ነው፡፡ ስለዚህም ነቢያቱ መድኃኒት ከጽዮን ይወጣልሲሉ ጌታችን መድኃኒታችን ኢየሱስ ክርስቶስ ጽዮን ከተባለችው ከቅድስት ድንግል ማርያም ይወለዳል ማለታቸው እንደሆነ ግልጽ ነው፡፡
ምንም እንኳ ቅዱስ ዳዊትና ሌሎች ነቢያት ስለቅድስት ድንግል ማርያም ለመናገር ሲሉ ጽዮን የሚለውን ስም አብዝተው ይጠቀሙ እንጂ አልፎ አልፎ ግን ጽዮን በማለት ስለ ከተማዋ ተናግረው እናገኛለን፡፡ ለምሳሌ ሚክያስ ስለዚህ በእናንተ ምክንያት ጽዮን ትታረሳለች(ሚክ.3፡12)ይላል፡፡ ይህ በቀጥታ ስለጽዮን ከተማ የተነገረ ነው፡፡ ቅዱስ ጳውሎስ ስለጌታችን መናገር ሲፈልግ ስለእርሱ የሚናገሩትን ብቻ መርጦ እንደተጠቀመ እንመለከታለን፡፡ እኛም እንዲሁ ለቅድስት ድንግል ማርያም የተነገሩትን አስተውለን ልንለያቸው ይጠበቅብናል፡፡ ምክንያቱም አንዳንድ ስለቅድስት ድንግል ማርያም ያልተጻፉ ነገር ግን ጽዮን የሚለውን ስም ይዘው የሚገኙ የመጽሐፍ ቅዱስ ምንባባት አሉና፡፡ ቢሆንም ስለታቦተ ጽዮን የተጻፉ ገቢረ ተአምራት ሁሉ እግዚአብሔር ቃል ከእመቤታችን ከቅድስት ድንግል ማርያም ተወለዶ ለፈጸማቸው ታላላቅ የድኅነት ሥራዎች ምሳሌዎች ናቸው፡፡
በዚህም መሠረት ቅድስት ቤተ ክርስቲያን በብሉይ ኪዳን በታቦተ ጽዮን የተፈጸሙትን ገቢረ ተአምራት ለድንግል ማርያምና ለጌታችን ለመድኀኒታችን ለኢየሱስ ክርስቶስ በመስጠት ተርጉማ ለልጆቹዋ ታስተምራለች፡፡ በኅዳር 21 ቀንም በታቦተ ጽዮን የተፈጸሙት ታላላቅ ተአምራት የሚታሰቡበት ቀን ነው፡፡ በዚህ ቀን ቅድስት ቤተ ክርስቲያናችን በታቦተ ጽዮን የተፈጸሙትን ታላላቅ ተአምራት እግዚአብሔር ቃል ከቅድስት ድንግል ማርያም በሥጋ በመወለድ ከፈጸማቸው ታላላቅ የድኅነት ሥራዎች ጋር በማነጻጸር በድኅነታችን ውስጥ የእመቤታችን የቅድስት ድንግል ማርያም ድርሻ ምን እንደሆነ ትገልጻለች፡፡ ለምሳሌ ታቦተ ጽዮንን የተሸከሙ ካህናት እግራቸው የዮርዳኖስን ባሕር በመንካቱ ባሕሩ ለሁለት እንደተከፈለ እንዲሁ ጌታችን መድኀኒታችን ኢየሱስ ክርስቶስ ከቅድስት ድንግል ማርያም በሥጋ ተወልዶ ጥምቀትን በራሱ ጥምቀት በመመሥረት ከሰይጣን ባርነት ወደ እግዚአብሔር ልጅነት እንዳሸጋገረን እናወሳበታለን(ኢያ.3፤ ማቴ.3፡13-17) ፡፡
ፍልስጥዬማውያን ከእስራኤላውያን ጋር ውጊያ በገጠሙ ወቅት ታቦተ ጽዮንን ማርከዋት ዳጎን በሚባለው ቤተ ጣዖታቸው ውስጥ አኑረዋት ነበር፡፡ ነገር ግን ታቦቷ ዳጎኑን በፊቷ ሰባብራ እንደጣለችው እንዲሁ ከቅድስት ድንግል ማርያም በተወለደው በጌታችን በመድኃኒታችን ኢየሱስ ክርስቶስ በእኛ ላይ ሠልጥኖ የነበረው ሰይጣን ድል መነሳቱን እናወሳበታለን፡፡ ((1ሳሙ.5፤6)
 እግዚአብሔር አምላክ ከእመቤታችን ከቅድስት ድንግል ማርያም ረድኤትና በረከት ያሳትፈን፡፡ የእግዚአብሔር አብ ጸጋ የእግዚአብሔር ወልድ ቸርነት የእግዚአብሔር መንፈስ ቅዱስ አንድነት በእኛ ላይ ለዘለዓለም ጸንቶ ይኑር አሜን!!

{flike}{plusone}

01369

የመንበረ ጸባዖት ቅድስት ሥላሴ ካቴድራል ሰበካ ጉባኤ ጽ/ቤት በተለምዶ 22 ማዞሪያ ተብሎ በሚጠራው አካባቢ የሕንፃ ግናባታው ተጀምሮ ቆሞ የነበረውን ሕንፃ ግንባታ ለማስጀመር የውል ሰነድ ተፈራረመ

                                                                                                                                              በመ/ር አምሃ ኃብቴ(BA)

01369

የመንበረ ጸባዖት ቅድስት ሥላሴ ካቴድራል ሰበካ ጉባኤና ልማት ኮሚቴ ቀደም ሲል ከበጎ አድራጊው ክቡር በኵረ ምዕመናን ከበደ ተካልኝ 1634 ካሬ ሜትር ቦታ በስጦታ አግኝቶ በ1070 ካሬ ሜትሩ ላይ የሕንፃ ግንባታው ከተጀመረ በኋላ በተለያዩ ምክንያቶች ለተወሰኑ ዓመታት ቆሞ የቆየ ቢሆንም የዲዛይን ክለሳ ተደርጎለት በአሁኑ ሰዓት  ሕንፃውን ለማስጀመር ተገቢውን ሕጋዊ የጨረታ ሂደት ካከናወነ እና ከፈጸመ በኋላ ጥቅምት 20 ቀን 2008 ዓ.ም ጨረታውን ካሸነፈው ከባማኮን ኢንጂነሪንግ ኃ.የተ.የግ.ማኅበር ጋር የውል ስምምነት ፈጸመ፡፡ የካቴድራሉ ሰበካ ጉባኤ ጽ/ቤት ከላይ ከተጠቀሰው ድርጅት ጋር የውል ስምምነቱን ሲፈጽም የአዲስ አበባ ሀገረ ስብከት ተወካይ ልዑካን፣ የኤም ጂ ኤም ኮንሰልት ኃ.የተ.የግ.ማኅበር ተወካይ፣ የካቴድራሉ ሰበካ ጉባኤ፣ ልማት ኮሚቴ አባላትና የአስተዳደር ሠራተኞች በተገኙበት የፊርማ ስነ ሥርዓቱ ተከናውኗል፡፡
የሕንፃው አጠቃላይ ወጪ ብር ቫትን ጨምሮ 72‚280‚478.00 (ሰባ ሁለት ሚሊዮን አራት መቶ ሰባ ስምንት ብር ብቻ) ሲሆን ነገር ግን የግንባታ ሥራው በሁለት ምዕራፍ እንዲሠራ ከተቋራጭ ድርጅቱ ጋር ስምምነት ላይ በመደረሱ ለመጀመሪያው ምዕራፍ ሥራ ውል ተፈጽሟል፡፡የመጀመሪያው ምዕራፍ ሥራው የሚያካትተው፡-
1.የኮንክሪት ሥራ ሙሉ ለሙሉ
2.የጣሪያ ሥራው ሙሉ በሙሉ
3.የግድግዳ ሥራ ማለትም ብሎኬትና ጡብ ሥራ በአጠቃላይ
4.የብረት ውቅር ሥራና ተያያዥ ሥራዎች በሙሉ
5.የልስንና ተያያዥ ሥራዎች በሙሉ
6.የመብራት መስመር ዝርጋታ 1-10.3 ድረስ
7.የንፁህ ውሃ አቅርቦትና የፍሳሽ ማስወገጃ መስመር ዝርጋታ ሥራዎች ከተራ ቁጥር 4-5 ድረስ ያካትታል፡፡ ይህንን ሥራ ለመሥራት አጠቃላይ ወጪው ከቫት በፊት ብር 27‚681‚604.80 (ሃያ ሰባት ሚሊዮን ስድስት መቶ ሰማንያ አንድ ሺህ ስድስት መቶ አራት ብር ከሰማንያ ሳንቲም) ሲሆን ሥራውን ለማጠናቀቅ 365 ቀናት የሚያስፈልጉት መሆኑንም ስምምነት በተደረገበት ቀን ተገልጿል፡፡ በዚህ አጋጣሚ የተቋራጭ ድርጅቱ ባለቤት ክቡር ኢንጂነር ግርማ ገላው  ከዚሁ ገንዘብ ላይ የ4% (የአራት በመቶ) ቅናሽ ያደረጉልን በመሆኑ ስለአደረጉልን ቅናሽ የካቴድራሉ አስተዳዳሪ ክቡር ሊቀ ሥልጣናት አባ ገብረ ሥላሴ በላይ በካቴድራሉ ሰበካ ጉባኤ ጽ/ቤት ስም አመስግነው አጠር ያለ ትምህርት ከሰጡ በኋላ የፕሮግራሙ ፍጻሜ ሆኗል፡፡
የሕንፃው አጠቃላይ ይዘት ሕንፃው በ1070 ካሬ ሥፋት ቦታ ላይ ያረፈ ሲሆን ቤዝመንት፣ ምድር ቤት፣ መዳረሻ፣ አምስት ወለል (ፎቅ) እና  መዳረሻ (B+G+M+5+M)  ያለው ዘመናዊ ሕንፃ ነው፡፡
ሕንፃው የሚሰጠው አገልግሎት ሕንፃው ሁለገብ አገልግሎት የሚሰጥ ሲሆን ቤዝመንቱ ለመኪና ማቆሚያ (parking lot) ፣ ምድር ቤቱ ለባንከ፣ ለኢንሹራንስና ሌሎች ተያያዥ አገልግሎት ለሚሰጡ ሥራዎች የሚሆን ሲሆን አምስቱ ወለሎች ደግሞ ለቢሮ፣ለሱቅ፣ አዳራሾችና ተያያዥ አገልግሎት የሚሰጡ ክፍሎች ያሉት ነው፡፡

{flike}{plusone}

000921

የእስክንድርያ ፖፕ እና የመንበረ ማርቆስ ፓትርያርክ ብፁዕ ወቅዱስ አቡነ ታዎድሮስ ዳግማዊ በመንበረ ጸባዖት ቅድስት ሥላሴ ካቴድራል ደማቅ አቀባበል ተደረገላቸው

                                                   በመ/ር ዘሩ ብርሃኔ(MA)

000921

ብፁዕ ወቅዱስ አቡነ ታዎድሮስ ዳግማዊ የአሌክሳንድሪያ ሊቀ ጳጳስና የቅዱስ ማርቆስ መንበረ ፓትርያርክ ከኢትዮጵያ ኦርቶዶክስ ተዋህዶ ቤተክርስቲያን በመስቀል ደመራ በዓል ላይ እንዲገኙ በብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት በተደረገላቸው ግብዣ መሠረት ወደ ኢትዮጵያ መጥተዋል።
በዚሁም መሠረት ቅዱስነታቸው መስከረም 14 ቀን 2008 ዓ.ም. ከሌሊቱ 9:00 ቦሌ ዓለም አቀፍ አየር ማረፊያ በሚደርሱበት ጊዜ  በሚመለከታቸው ባለድርሻ አካላት  ደማቅ አቀባበል የተደረገላቸው ሲሆነ በነጋታው ቅዳሜ መስከረም 15 ቀን 2008ዓ.ም በመንበረ ጸባዖት ቅድስት ሥላሴ ካቴድራል፣ ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት፤ብፁዓን አበው ሊቃነ ጳጰሳት ፣  የመንበረ ፓትርያርክ ጠቅላይ ጽ/ቤት ኃላፊዎች፣ የአዲስ አበባ ሀገረ ስብከት ዋና ሥራ አስኪያጅ ፣ የአዲስ አበባ ሀገረ ስብከት ገዳማት እና አድባራት አስተዳዳሪዎች፣ መዘምራንና የሰንበት ት/ቤት ወጣቶች፣ የመንግሥት ከፍተኛ ባለሥልጣናት በተገኙበት፣ ‹‹የእንኳን ደኅና መጡ›› ፕሮግራም ተከናውኗል፡፡ ቅዱስነታቸውም በበአሉ ላይ  ለተገኙ ህዝበ ምእመናን ቡራኬ ሰጥተዋል፡፡
ቅዱስነታቸው  ስለ ሁለቱም አብያተ ክርስቲያናት ታሪካዊ ግንኙነት በሰፊው ከገለፁ በኋላ ኢትዮጵያ ለዕድገቷ የምታከናውናቸውን ተግባራት የግብፅ ቤተክርስቲያን እንደምትደግፍ ተነግረዋል። “አንድ ከሚያደርጉንና ከሚያስተሳስሩን ጉዳዮች ዋናው ነገር የዓባይ ወንዝ ነው” ያሉት አቡነ ታዎድሮስ “የአገራቱ መሪዎችም ምንም ዓይነት ልዩነትና ፀብ እንደማይፈጥሩ እርግጠኞች ነን” ብለዋል። “የዓባይ ወንዝ እግዚአብሔር በነፃ የሰጠን ስጦታ ነው፣ ሁሉም የሰው ልጆች ከፀሐይና ከነፋስ በነፃ እንደሚጠቀሙ ሁሉ ከዚህም ወንዝ በነፃ ይጠቀማሉ ይህንንም ስጦታ በነፃ እየተጠቀምን በፀጋ እንኖራለን” ሲሉ ነው የተናገሩት።
የኢትዮጵያ ኦርቶዶክስ ተዋህዶ ቤተክርስቲያን ፓትሪያርክ ብጹዕ አቡነ ማትያስ በበኩላቸው አገራቱ ባህልን፣ ቋንቋን፣ሥነ ጽሑፍን፣ ንግድን፣ መንፈሳዊና ማሕበራዊ ጉዳዩችን ያካተተ የቆየ ግንኙነት እንዳላቸው ጠቅሰዋል።”ከዚህም ባለፈ የአባይ ወንዝን በጋራ የምንጠጣ ታሪካዊያን ሕዝቦች ነን” ሲሉ ተናግረዋል።
ወንዙን በአግባቡና በፍትኃዊነት ከተጠቀምንበት ለሌሎች አገራት ጭምር የሚበቃ ማለቂያ የሌለው የአምላክ በረከት መሆኑን ገልፀዋል።ይህን ወንዝ በሠላማዊ መንገድ በመጠቀም የሁለቱ አገራት መንፈሳዊና ማኅበራዊ ግንኙነቶች ለዓለም ምሣሌ በሚሆን መልኩ ተጠናክሮ መቀጠል እንደሚገባው አባታዊ ምክራቸውን አስተላልፈዋል።
የኢትዮጵያ ኦርቶዶክስና የግብፅ ኮፒቲክ ኦርቶዶክስ ቤተክርስቲያናት መንፈሳዊ ግንኙት ከ1 ሺህ 600 ዓመታት በላይ ያስቆጠረ መሆኑን የታሪክ ድርሳት ያስረዳሉ።

{flike}{plusone}