በሃይማኖት ሽፋን ቅ/ኤልያስ መጥቷል ብለው በኤልያስ ስም ሲነግዱ የነበሩ ግለሰቦች ንፁሀን ዜጎችን ሲያስደበድቡና ሁከት ሲፈጥሩ እጅ ከፍንጅ ተይዘው ታሰሩ

ቀደም ሲል በዚህ ርዕሰ ጉዳይ ላይ በተለያዩ የቤተክርስቲያኒቷ አገልጋዮች የተፃፉትን ጽሑፎች በአህጉረ ስብከታችን ዌብ ሳይት ስናስነብብ መቆየታችን አይዘነጋም፡፡

ምንም እንኳን ጉዳዩ ዘግይቶ በተለያዩ ሚዲያዎች መሰራጨት የጀመረ ቢሆንም ቀደም ሲል ከሁለት ዓመታት በፊት በመንበረ ጸባዖት ቅድስት ሥላሴ ካቴድራል ጀርባ በተለምዶ ቆሎ ሰፈር ተብሎ በሚጠራው መንደር ቤተክርስቲያኑንና ህብረተሰቡን ሲረብሹ የቆዩ ሲሆን የካቴድራሉ ጽ/ቤት ጉዳዩን እየባሰ ሲሄድ በመስከረም ወር 2ዐዐ5 ዓ.ም ጉዳዩ በፍርድ ቤት እንዲታይ ክስ መስርቶ በፍ/ቤት ትእዛዝ ግለሰቦቹ ከተከራዩት ቤት እንዲወጡና አከራዮችም ተከራዮቹ በአስቸኳይ እንዲያስወጡ ውሳኔ ተወስኖ ነበር፡፡

ይሁንና ግን በአፈፃፀም ሂደት የሚመለከታቸው አካላት እስከ አሁን ድረስ እልባት ባለማግኘቱ ካቴድራሉንና በካቴድራሉ ጀርባ ያሉ ነዋሪዎች ከመጠን በላይ ሲቸገሩ ቆይተዋል፡፡ ግለሰቦቹ መኖሪያ ቤታቸው የት እንደሆነ በእርግጠኛነት ማወቅ ባይቻልም ሁሉም የሚገናኙት ከሥላሴ ጀርባ በተከራዩት ቤት ነው የመገናኛ ሰዓታቸውም ከቀኑ በ11 ሰዓት እስከ ሌሊቱ 6፡3ዐ ነው፡፡

የተከራዩት ቤት መጠኗ አነስተኛ ብትሆንም እስከ 4ዐዐ የሚደርሱ ሰዎች ኃይማኖትን ይሁን ፖለቲካ፣ እብደት ይሁን ስካር ባልታወቀ ሁኔታ ከበሮ እየመቱ እጣን እያጨሱና መጠጥ እየጠጡ እንደሚያመሹ የሰፈሩ ሰዎች በግልጽ ከመናገራቸውም በላይ ከቅዳሜ በስተቀር ሁልጊዜ እዛው ቦታ ላይ የሚሰበሰብ ሲሆን ከቤቱ ጎን ያሉ ነዋሪዎች ማለፍ አትችሉም፣ ጫማችሁን አውልቁ ወዘተ እያሉ በሕገ መንግስቱ የተሰጣቸውን በሰላም የመኖር መብት ሲያሳጧቸው የቆዩ ከመሆናቸውም በላይ ይባስ ብሎ በ15/ዐ8/2ዐዐ5 ዓ.ም ከምሽቱ 2፡3ዐ ላይ እንደ ሰፈሩ ሰዎች አባባል ቁጥራቸው ከ5ዐ – 1ዐዐ የሚሆኑ በሰፈሩ ሰዎች ላይ ለማድረስ ጀምረውት የነበረውን የድብደባ ጥቃት በአካባቢ ባሉት የፖሊስና የመከላከያ ኃይል አማካይነት ጉዳቱ ሊቀንስ ቢችልም በዚሁ ዕለት ጉዳዩን በዋናነት ሲመሩ የተገኙት (የነበሩት)እጅ ከፍንጅ ተይዘው 4 ኪሎ ፖሊስ ጣቢያ ታስረው ይገኛሉ፡፡ ቦታው ድረስ በአካል ሄደን ለማረጋገጥ እንደቻልነው 3 ሰዎች ተመትተው እቤታቸው ተኝተው አይተናል፡፡

የሚመለከታቸው የመንግስት አካላትም ቦታው ድረስ በመሄድ በጉዳዩ ላይ ከፍተኛ የሆነ ክትትል እያደረጉ ሲሆን የካቴድራሉ ጽ/ቤትም ከአሁን ቀደም ከቤቱ እንዲወጡ ፍ/ቤቱ የወሰነበትን ውሳኔ አያይዞ ለፖሊስ ጣቢያው ልኳል፡፡ የአካባቢው ማኀበረሰብም ፖሊስ ጣቢያው ድረስ በመሄድ ለዓመታት በዚሁ ችግር ሲኖሩ መቆየታቸውንና አሁን የደረሰባቸውን ችግር ገልፀው ክስ መስርተውባቸዋል፡፡

በመሆኑም የሚመለከታቸው የቤተክርስቲያኒቱ ባለድርሻ አካላት ከሚመለከታቸው አካላት ጋር በመነጋገር የቤተክርስቲኒቷን ስም በማጥፋታቸው በህግ መጠየቅ ይገባቸዋል እንላለን፡፡

“ተረፈ አይሁዳዊነት በኤልያሳዊነት ስም ሲበቅል” አዲስ ሃይማኖት

ሰሞኑን በከተማችን አዲስ አበባ ““የኢትዮጵያ ትንሳኤ ሊያረጋግጥ ኃያል ባለስልጣን ቅዱስ ኤልያስ ከብሔረ ሕያዋን መጥቷል፤ የአለም ፍጻሜ ቀርቧል” የሚሉ አካላት ተነስተዋል፡፡ እነሱ እንደሚሉት ነብዩ ኤልያስ መጥቶ አዲስ አበባ ይገኛል፡፡ ቤተመንግሥቱንና ቤተክህነቱን ለማጥራት ተዘጋጅቷል ፡፡ ከሚያጠራቸው የቤተክህነት ጉዳዮችም ሦስቱ ትኩረት አግኝተዋል ይላሉ፡፡ “የመጀመሪያው ኦርቶዶክስ የሚለው ስም ስህተት ነው ፤ ስማችን ተዋህዶ ነው ፤ መለበስ ያለበት ልብስ ነጭ ብቻ ነው ፤ እሱም ቢሆን ጥለቱ አረንጓዴ ቢጫ ቀይ መሆን መቻል አለበት ፤ አሁን ያሰርነውን ክር በመበጠስ አረንጓዴ ቢጫ ቀይ ክር ማሰር አለብን” የሚል ነው፡፡

በየአጋጣሚው ቤተክህነቱንና ቤተ መንግሥትን በመንቀፍ አሁን የሚታዩትን ችግሮች መሰረት አድርጎ ህዝቡ መጥቷል የተባለው ኤልያስን መከተል እንጂ ወደ ቤተክርስቲያን መሄዱ ጥቅም እንደሌለው እየተነገረ ነው፡፡ የሚከናወኑ ማናቸውም የፖለቲካ እንቅስቃሴዎችም የኤልያስን መምጣት የሚያመላቱ እንጂ ምዕመና ሊሳተፍባቸው የሚገቡ አለመሆናቸው ይነገራል ፡፡ እስኪ እነዚህ ነገሮችን በዝርዝር እንመልከታቸው፡፡

ኤልያስ ማነው?

ኤልያስ ማለት ከክርስቶስ ልደት በፊት በስምንተኛው መቶ ክፍለ ዘመን አካባቢ ከእስራኤል የተነሳ ነብይ ነው፡፡ኤልያስ የሚታወቀው በሶስት ሃይማኖታዊ ተግባሮች ነው፡፡

የመጀመሪያው በእስራኤል ተንሰራፍቶ የነበረውን የባአድ አምልኮ ያጠፋና አምልኮተ እግዚአብሔርን ያጸና መሆኑ ሲሆን ፤ ሁለተኛው ደግሞ ንጉስ አክአብ አሕዛባዊት ኤልዛቤልን አግብቶ ይፈጽም የነበረውን ግፍና ጥፋት ሳይፈራና ሳያፍር ፊት ለፊት የገሰጸና ለእውነት ብቻ የቆመ ነብይ መሆኑ ነው፡፡ በዚህ አቋሙ ምክንያት በሰሜን እስራኤል በሚገኙ ሰንሰለታዊ ተራሮች ፈፋ ለፈፋ ሲንከራተት ኖሯል፡፡ መጀመሪያ ቁራዎች ሲመግቡት ቆይተው ከዚያ በሰራፕታ የምትገኝ አንዲት መበልት አገልግለዋለች፡፡ ይህ ቆራጥነቱና ለአምልኮተ እግዚአብሔር ቋሚ መሆኑ በእግዚአብሔር ዘንድ ባስገኝለት ሞገስ የተነሳ ኤልያስ ከኄኖክ ቀጥሎ ሳይሞት ወደ ብሔረ ሕያዋን በመወሰዱ ይታወቃል፡፡ ዮርዳኖስን ወንዝ ከደቀ መዝሙሩ ከኤልሳዕ ጋር ከተሻገረ በኋላ የእሳት ሰረገላ መጥቶ ኤልያስን ወስዶታል፡፡ ይህ ኤልያስ የሚታወቅበት ሦስኛው ነገር ነው፡፡

ኤልያስ ይመጣል ?

ከ470 እስከ 440 በኢየሩሳሌም ትንቢት የተናገረው ነብዩ ሚልኪያስ “የእግዚአብሔር ቀን ነብዩ ኤልያስን እልክላችኋለሁ” ብሎ ትንቢት ተናግሮ ነበር፡፡ (ሚል 4፤5) ይህንንም በመያዝ አይሁድ በፋሶች ፤ በግሪኮች ፤ በሶሪያውያንና በሮማውያን መከራ በተፈራረቁባቸው 400 ዓመታት ውስጥ ነብዩ ኤልያስን ሲጠባበቁት ነበር፡፡ በየምኩራባቸውም የኤልያስ መንበር የተባለ ከፍ ብሎ የተሰራ ባለ መከዳ ወንበር ያስቀምጡ ነበር፡፡ ከክርስቶስ ልደት 6 ወራት ቀድሞ ተወለደውና ከበረሀ የመጣው መጥምቁ ዮሐንስ በብዙ መልኩ ኤልያስን ይመስለው ስለነበረ የተወሰኑት የአይሁድ ክፍሎችና በኋላም ክርስቲያች ይመጣል የተባለው ነብዩ ኤልያስ እርሱ ነው ብለው ተቀብለውታል፡፡ ዮሐንስ መጥምቅ እንደ ኤልያስ ሁሉ በርኽኛ ባህታዊ ነው፡፡ እንደ ኤልያስ ሁሉ ጸጉር የለበሰ ነው ፤ እንደ ኤልያስ ሁሉ እስራኤል ተስፋ የቆረጠችበት ዘመን የመጣ ነው ፤ እንደ ኤልያስ ሁሉ ሄሮድስን ሳያፍርና ሳይፈራ የገሰጸ ነው ፡፡ በእነዚህ እና በሌሎች ምክንያቶች መጥምቁ ዮሐንስ ኤልያስን ይመስለው ነበር፡፡ ጌታችን ኢየሱስ ክርስቶስም ይመጣል የተባለው ኤልያስ መጥምቁ ዮሐንስ መሆኑን መስክሮለታል፡፡(ማቴ 11፤14 17፤10-13 ፤ ሉቃ 1፤17) ስለ ኤልያስ መምጣት የሚነግረን ሌላው መጽሀፍ የዮሐንስ ራዕይ ነው፡፡

ዮሐንስ ራዕይ በምዕራፍ 11 ላይ ዓለምን የሚያጠፋው ሀሳዊ መሲህ ከመጣ በኋላ ዙፋኑን አደላድሎ የዓለምን ክርስቲያኖች ሲጨርስና ምስክር ሲጠፋ ሁለት ምስክሮች መጥተው 1260 ቀናት ምስክርነት እንደሚሰጡና በመጨረሻም በሐሳዌ መሲህ እንደሚገደሉ ይገልጣል፡፡ ከሁለተኛው መቶ ክፍለ ዘመን ጀምሮ የተነሱ ሊቃውንተ ቤተክርስቲያን እነዚህን ሁለት ምስክሮች ኄኖክና ኤልያስ መሆናቸውን ተርጉመዋል፡፡ ሐሳዊ መሲሕ ሲነሳና ሁሉንም እንደ ሰም አቅልጦ እንደ ገል ቀጥቅጦ ሲያጠፋ ፤ ለእውነት የሚመሰክርም ሲጠፋ ፤ ምዕመናንም በሚደርሰው መከራ ምክንያት የሚከተሉት የእምነት መንገድ “ስህተት ይሆን…” ብለው ሲጠራጠሩ እነዚህ ሁለቱ ሳይሞቱ ወደ ብሔረ ሕያዋን ያረጉ ነብያት መጥተው እውነትን በመመስከርና የሐሳዌ መሲሕን ነገር በማጋለጥ ምስክርነታቸውን በደም እንደሚያጸኑ የሊቃውንቱ ትርጓሜ ያብራራል፡፡ ዮሐንስ አፈወርቅ ፤ አቡሊዲስ ዘሮምና ቪክቶሪያንስ እንደሚገልጡት ኤልያስና ኄኖክ በኢየሩሳሌም ያስተምራሉ ፤ በኢየሩሳሌም ተዓምራት ያደርጋሉ ፤ በኢየሩሳሌም ይገደላሉ ፤ በኢየሩሳሌም ይነሳሉ ፤ በኢየሩሳሌም ያርጋሉ ፡፡ ይህም ለጌታችን መምጣት የመጨረሻው ምልክት ነው፡፡ ከኤልያስና ኄኖክ መምጣት በኋላ የሚጠበቀው የክርስቶስ ለፍርድ መምጣት ነው፡፡

በአሁኑ ሰዓት ኢትዮጵያ ውስጥ ነብዩ ኤልያስ መጥቷል ይባላል፡፡ የሚኖረው አራት ኪሎ ነው፡፡ አንዳንድ ታዋቂ የሆኑ ሰዎች በተለይም አርቲስቶች ተከታዮች ሆነናል ይላሉ፡፡ ይህንን ሁኔታ ከቅዱሳት መጻህፍትና ከሊቃውንት ትምህርት ጋር ስናነጻጽረው ትክክል ሆኖ አናገኝውም፡፡ መጀመሪያ ነገር ኤልያስ ብቻውን አይመጣም፡፡

በነብዩ ሚልኪያስ ለብቻው እንደሚመጣ የተነገረለት ኤልያስ መጥምቁ ዮሐንስ መሆኑን ራሱ ጌታችን ኢየሱስ ስለ መሰከረ ሌላ ምስክር ማምጣት አያስፈልግም፡፡ በሌላ በኩልም አሁን መጥቷል ተባለው በመጨረሻው ዘመን የሚመጣው ኤልያስ ከሆነ ደግሞ እንደ ሊቃውንቱ ትምህርት ብቻውን አይመጣም ፤ አብሮት ኄኖክም ይመጣል፡፡ አሁን ግን ኤልያስ ከኄኖክ ተነጥሎ ነው መጣ የተባለው፡፡ ይህ ብቻ አይደለም፡፡ ነብዩ ኤልያስ የሚመጣበት ጊዜ በራዕይ ዮሐንስ ላይ ምዕራፍ 11 ተገልጧል፡፡

አስቀድሞ ሐሳዊ መሲህ ይመጣል፡፡ ዙፋኑንም በተቀደሰችው ከተማ በኢየሩሳሌም ይዘረጋል፡፡ ምዕመናንም(በተለይም የስድስት ስድሳ ስድስትን አምልኮ ያልተቀበሉትን) በግፍ ይገድላቸዋል፡፡ በዚህም ጊዜ እውነት ትቀጥንና ምስክር ታጣለች ፤ ኤልያስና ኄኖክ የሚመጡትም እውነትን በአደባባይ ለመመስከር ነው፡ ይህ ከሆነና በአዲስ አበባ እየተባለ እንዳለው ኤልያስ ከመጣ ሐሳዊ መሲህ መጥቷል ማለት ነው፡፡ ይህም ብቻ ሳይሆን ምዕመናን በግፍ ተገድለዋል ፤ በዓለምም ላይ አማኞች በአብዛኛው አልቀዋል ማለት ነው፡፡ ይህ ደግሞ ሲፈጸም አላየነውም፡፡ በኢየሩሳሌምም ሐሳዊ መሲህ ገና አልነገሰም፡፡ ሌላም ሦስተኛ ነገር መነሳት አለበት፡፡ ሐሳዊ መሲሕ የሚነግሠው ፤ ኄኖክና ኤልያስም የሚገለጡት ‹በተቀደሰችው ከተማ” በኢየሩሳሌም ነው፡፡ የሚሠውትም እዚያ መሆኑን “እርስዋም በመንፈሳዊ ምሳሌ ሶዶምና ግብጽ የተባለችው ደግሞ ጌታችን የተሰቀለባት ናት› ብሎ ኢየሩሳሌም መሆኗን ነግሮናል(ራዕይ 11፤8) ፡፡ አሁን ግን ኤልያስ ተገለጠ የተባለው ያለው አዲስ አበባ አራት ኪሎ ላይ ነው፡፡ ይህ ደግሞ ተልዕኮውም ከመጽሀፍት ጋር የሚጣረስ ነው፡፡

ጌታ የተሰቀለው አራት ኪሎ ነው ካላልን በቀር፡፡ ራዕይ ዮሐንስ እንደሚነግረን ኄኖክና ኤልያስ ምስክርነት የሚሰጡት ለ1260 ቀናት ወይም ለ42 ወራት ወይም ለሦስት ዓመት ከስድስት ወራት ነው፡፡ አሁን ግን አዲስ አበባ መጣ የተባለው ኤልያስ መጣ ከተባለ አራት ዓመት ሊያልፈው ነው፡፡

ምጽአትና መሲሕን መናፈቅ

በዓለም ሆነ በኢትዮጵያ ታሪክ ውስጥ የምጽአትን ቀን የመናፈቅና የምጽአትን ምልክቶች ደርሰዋል ብሎ የመጨነቅ አዝማሚያ የሚከሰትባቸው ምክንያቶች አሉ፡፡ እነዚህም ኢኮኖሚያዊ ፤ ማህበራዊ እና ፖለቲካዊ ቀውሶች ሲከሰቱና ሕዝብ ተስፋ ሲቆርጥ ነው፡፡ እስራኤራዊያን ከፋርሶችና ከግሪኮች ወረራ በኋላ ሀገራቸው ስትመሰቃቀል ፤ መንፈሳዊነት ሲጎድልና መንግሥታቸው ፈርሶ ተስፋ ወደ መቁረጥ ሲመጡ “መሲሕ እየመጣ ነው ፤ ኤልያስ እየደረሰ ነው” የሚል አስተምህሮ ቅድመ ልደተ ክርስቶስ በ2ኛው መቶ ክፍተ ዘመን ጀምረው ነበር፡፡

በዚህ የተነሳ አንዳንድ ሰዎች ይመጣል የተባለው መሲሕና ኤልያስ እኛ ነን እያሉ አጋጣሚውን ሊጠቀሙበት ሞክረው ነበር፡፡ ከእነዚህ መካከል ከክርስቶስ ልደት በፊት በ2ኛውና አንደኛው መ.ክ.ዘ ላይ የተነሱ ቴዎዳስና ይሁዳ ይጠቀሳሉ፡፡ ቴዎዳስ አራት መቶ ሰዎችን አስከትሎ ነበር ፡፡ በኋላ ግን ሐሰተኛ መሆኑ ሲታወቅ ሕዝቡ ተወው ፡፡ ይሁዳም ሕዝቡን አስነስቶ እስከ ማሸፈት ደርሶ ነበር፡፡ መጨረሻው ግን አላማረም(የሐዋ 5፤37-39) በቅርብ ጊዜ በኡጋንዳ ኢኮኖሚ ሰደቅና የእርስ በርስ ጦርነት ሲባባስ ይህም የሕዝቡ ማኅበራዊ ሕይወት ሲያቃውሰው “እኔ ክርስቶስ ነኝ” የሚል ሰው ተነስቶ በአንድ አዳራሽ ውስጥ የነበሩ ተከታዮች መንግሥተ ሰማያት ለመግባት ሲሉ በእሳት ተቃጥለው እንዲያልቁ አድርጓቸው ነበር፡፡ በአሜሪካ የደረሰው ኢኮኖሚ ድቀት ካስከተላቸው መዘዞች አንዱ በየአካባቢ “እኔ መሲሕ ነኝ” የሚሉ እና ሕዝቡ ችግሩን ከማሸነፍ ይልቅ ችግሩን እንዲረሳው የሚያደርጉ ሰዎች መከሰታቸው ነው፡፡ በ2012 የተደረሰ አንድ ጥናት ባለፉት 3 ዓመታት በአሜሪካ ውስጥ 132 ሰዎች መሲሕ ነን ብለው ተነስተው ወደ 4.5 ሚሊየን የሚደርስ ሕዝብ አስከትለዋል፡፡ በሀገራችን ታሪክ በ15ኛው መቶ ክፍለ ዘመን በተከሰተው የግራኝ ጦርነት በኋላ ሕዝቡ መንፈሳዊ ማኅበራዊ እና ኢኮኖሚያዊ ተስፋ መቁረጥ ደረጃ ደርሶ ነበር፡፡

አብያተ ክርስያናቱ ተቃጠሉ ፤ ኢኮኖሚው ወደመ ፤ መንግስት ተዳከመ ፤ ትዳና መስተጋብር የመሰሉ ማኅበራዊ ተቋማት ፈረሱ፡፡ ብዙ ሰዎች ሞቱ ፡፡ ይህ ሕዝቡ ላይ ባስከተለው ተስፋ መቁረጥ የተነሳ ከዚህ መከራ እና ስቃይ የሚያወጣውን አንዳች ሰማያዊ ኃይል ይጠብቅ ነበር፡፡ ከግራኝ ጦርነት በኋላ በአጼ ሰርጸ ድንግል ወራሾች መካከል በተፈጠረው የርስ በርስ ውጊያ ሀገሪቱ ስትታመስና ሕዝቡ በተደጋጋሚ ጦርነትና የሕዝብ ፍልሰት ሲታወክ እኔ ክርስቶስ ነኝ ፤ ሕዝቡንም ከችግር ላወጣውና መንግሥተ ሰማያት ላወርሰው መጥቻለሁ የሚል ሐሳዊ መሲሕ በአማራ ሳይንት አካባቢ ተነስቶ ነበር ፡፡ አስራ ሁለት ሐዋርያት ፤ 72 አርእድትንና 36 ቅዱሳት አንስትንም መርጦ ነበር፡፡ ብዙውም ሕዝብ በተስፋ መቁረጥ ላይ ስለነበረ ተከትሎት ነበር፡፡ በኋላ ግን በሞት መቀጣቱን አቡነ ጎርጎርዮስ በኢትዮጰያ ቤተክርስቲያን ታሪክ መጽሐፋቸው ጠቅሰውታል፡፡

በቅርቡ በሀገራችን ታሪክ ዐጼ ምኒሊክ አርፈው ሞታቸው በተደበቀበት ጊዜ ፤ በታህሳስ ግርግር ጊዜ ፤ በአብዮቱ ዋዜማና ማግስት ፤ እንዲሁም ኢሕአዴግ አዲስ አበባ በገባበት ጊዜ አያሌ “ባሕታውያን” ተነስተው ነበር፡፡ ይህ ነገር መጣ ፤ ብላቴን ጌታ ኅሩይ ስለ ንግሥት ዘውዲቱ ዘመን በጻፉት የትዝታ መጽሀፋቸውም ይህንን ገልጠውታል፡ ይህም ያም ነገር ታየ ፤ ተገለጠ የሚለው ብሂልም ነባርና የሀገር አለመረጋጋትና በኑሮ ተስፋ መቁረጥ ተገን አድርገው የሚመጡ ናቸው፡፡

የኤልያሳውያን ሁለት አስተምህሮዎች

አሁን በዘመናችን የተከሰቱ ኤልያሳውያን ሁለት ነገሮች ላይ አተኩረው እየሰሩ ነው፡፡ የመጀመሪያው “ኦርቶዶክስ” ትክክለኛ ስም አይደለም የሚለው ሲሆን ሁለተኛው ደግሞ ሰንደቅ አላማን ከጽድቅና ከኩነኔ ጋር ማያያዛቸው ነው፡፡ ኦርቶዶክስ የሚለው ቃል የግሪክ ሲሆን “ኦርቶ” ርቱዕ “ዶክስ” ደግሞ እምነት ፤ መንገድ ፤ ጠባይ ፤ ባህል ማለት ነው፡፡ ይህንን ስም የክርስቲያን አብያ ክርስያናት መጠቀም የጀመሩት በ325 ዓ.ም በተደረገው ጉባኤ በኋላ ነው፡፡ ከጉባኤ ኬልቄዶን የ451 ዓ.ም ጉባኤ በኋላ ደግሞ የምዕራብ አብያተክርስቲያናት ካቶሊክ ሲባሉ ምስራቆቹ “ኦርቶዶክስ” የሚለውን ስም ይዘው ቀሩ ፡፡ በምስራቆቹ መካከል የጉባኤ ኬልቄዶንን ውሳኔ በመቀበልና ባለመቀበል መካከል ልዩነት ስላለ የግሪክ መሰል አብያተክርስቲያናት የምስራቅ ኦርቶዶክስ ሲባሉ ፤ አርመን ፤ ግብጽ ፤ ሕንድ ፤ ሶሪያና ኢትዮጵያ ደግሞ “ኦሪየንታል ኦርቶዶክስ” ተባሉ፡፡ ኦርቶዶክስ ፤ ኦርዶክሳዊ የሚለው ስም በሀገራችን ቅዱሳት መጻሕፍት ውስጥ በሁለት መንገድ ተገልጠዋል፡፡ በአንድ በኩል ጥሬ ቃሉ እንዳለ የተቀመጠ ሲሆን በሌላ በኩል ደግሞ ወደ ግዕዙ ተተርጉሞ “ርቱዕ ሃይማኖት” እየተባለ ተቀምጧል፡፡ ፍትሐ ነገስት ‹ይኩን ምእመነ ኦርቶዶክሳዌ ይላል› (42፤2) ያዕቆብ ዘእልበረዲም ‹ሃይማኖት ኦርዶክሳዊት› ሲል እምነቱን ይገልጣል፡፡ መጽሐፈ ቄርሎስም ‹ሃይማኖተ ርቱዕ› እያለ ተርጉሞ ይገልጠዋል፡፡ ‹ተዋሕዶ› የሚለው ቃል ነጥሮ የወጣው በጉባኤ ኤፌሶን በ431 ዓ.ም ነው፡፡ በጉባኤው ንስጥሮስን ባሕል ለማየት የተሰበሰቡ አበው በእስክንድርያ ቄርሎስ የተሰጠውን ትምህርት በመቀበል ሁለት ባሕርይ የሚለውን አውግዘው መለኮት ከስጋ ተዋህዶ ሥግው ቃል ሆነ የሚለው ርቱዕ እምነት መሆኑን መሰከሩ፡፡

ይህ ቃል የእምነት ዶክትሪን መገለጫ ሆኖ ነው የኖረው ፡፡ በኬልቄዶን ጉባኤ በኋላም ይህ ስያሜ የኦርቶዶክሶቹ ዋና መጠሪያ እየሆነ መጣ፡፡ በኢትዮጵያ ጥንታዊ መጻሕፍት ላይ ተዋህዶ እምነት ሆኖ እንጂ የቤተክርስቲያ መጠሪያ ሆኖ አናገኝውም ‹ኦርቶዶክሳዊ› የሚለው ቃል የምናገኝውን ያህል ‹ተዋህዶ› የሚል መገለጫ አናገኝም ተዋሕዶ የሚለው ቃል በነገረ ሥጋዌ ትምህርት ላይ በሀገር ውስጥ የተነሳ የተለየ አስተያየት ስላልነበረ መጠሪያነቱ አልጎላም፡፡ በ17ኛው መቶ ክፍለ ዘመን ከአውሮፓ በመጡ ካቶሊካውያን ምክንያት የተፈጠረውን የእምነት ክፍፍል ተከትሎ ይህ የእምት መጠሪያ የአማያንና የወገን መጠሪያ እየሆነ መጣ፡፡ በ17ኛው መቶ ክፍለ ዘመን ቅባትና ጸጋ የሚባሉ ባሕሎች መጥተው ነበር፡፡ እነዚህን ባሕሎች የሚቃወሙትና ኢየሱስ ክርስስ መለኮት ከስጋ በተዋሕዶ ሥግው ቃል እንጂ እንደ ነገስታትና ነቢያት በመቀባት አይደለም ያሉት ደግሞ መጠሪያቸው ከእምነታቸው ተወስዶ “ተዋሕዶዎች” ተባሉ፡፡ ከቦሩ ሜዳ ጉባኤ በኋላም የቤተክርስቲያኒቱ ሕጋዊ ስም ‹‹ኦርቶዶክስ ተዋሕዶ›› የሚለው ጎላ፡፡ ኦርቶዶክስ የሚለው ስም ቤተክርስቲያኒቱ በዓለም የምትታወቅበት የወገን ስሟ ነው፡፡ ሌሎችም ‹የግብጽ ኦርቶዶክስ› ፤ ‹ የሕንድ ኦርቶዶክስ› ብለው ይጠሩ እና ከአካባቢያቸው ራሳቸውን ለመለየት ደግሞ ‹የግብጽ ኮፕት ኦርቶዶክስ› ፤ ‹የሶርያ ያዕቆባዊት ኦርቶዶክስ› እያሉ ይጠራሉ፡፡ የኢትዮጵያ ቤተክርስቲያንም ‹ኦርዶክስ ተዋሕዶ› ትባላለች ፡፡ አንዳንድ ሰዎች በዘመናውያን መዛግብት ቃላት ስለ ‹ኦርቶዶክስ› የተሰጡ ፍቺዎችን ይዘው ይሞግታሉ፡፡ ኦርቶዶክስን ‹ከአክራሪነትና ከለውጥ አለመቀበል› ጋር እያዛመዱ ይፈቱታል፡፡ በዚህ ምክንያት ኦርቶዶክስ የሚለው ቃል ለኮንሰርቫቲቭ ፓርቲዎችና ለአይሁድ ሲሰጡት ይታያሉ፡፡ ይህ ግን ኦርቶዶክስ የሚለው ስም ከመነጨበት ጠባይ በእጅጉ የራቀ ነው፡፡

አሁን ወደ ሁለተኛ ነጥብ እንመለስና ሰንደቅ አላማን እንመልከት፡፡ የኢትዮጵያ ሰንደቅ አላማ የኢትዮጵያውያን መለያ ናት፡፡ ለዚች ሰንደቅ አላማ ብዙዎች ውድ ሕይወታቸውን ከፍለዋል፡፡ ከእነዚህ ውድ ሕይወታቸውን ከከፈሉ መካከልም የቤተክርስቲያኒቱ አባቶችና ልጆች ይገኙበታል፡፡ ቤተክርስቲያኒቱ ታሪክን ከማቆየት ፤ ባሕልን ከማሻገርና ኢትዮጵያዊነትን ከማስረጽ ሚናዋ አንጻር ሰንደቅ አላማንም በማስከበርና ለትውልድ በማስተላለፍ የበኩሏን ድርሻ ተወጥታለች፡፡ የኢትዮጵያ አረንጓዴ ቢጫ ቀይ ሰንደቅ አላማ ከሀገራዊ እሴትነቱ ፤ መስዕዋትነትና ነጻነት ከማንጸባረቁም ፤ ለኢትዮጵያውያን ከደማቸው ጋር የተዋህዶ ልዩ ምልክት ከመሆን አልፎ ግን ጽድቅና ኩነኔ ውስጥ የሚገባ ፤ እርሱን ያልተቀበለ እና ያላደረገ ሰማያዊ ዋጋ የሚቀርበት ፤ ከእርሱ ውጪ ቀለም ያለው ነገር የለበሰና ማህተብ ያሰረ ሃጥያት እንደሰራ ተቆጥሮ ንስሃ የሚገባበት ግን አይደለም፡፡

ከኢትዮጵያ ውጪ ያለ ዜጋ የቤተክርስቲያኒቱ አባል ለመሆን የቤተክርስቲያቱን ዶግማ እና ቀኖና መቀበልን እንጂ አረንጓዴ ቢጫ ቀይ ባንዲራን መቀበል ግዴታው አይደለም፡፡ በኡጋንዳ ባንዲራ ፤ በአሜሪካ ባንዲራ ፤ በሶማሊያ ባንዲራ አሸብርቆም ቢሆን የኦርዶክስ ተዋሕዶ ልጅ መሆን ይችላል፡፡ አስከ አሁን በቀኖና በሚደነገጉ መጻህፍቶች ውስጥ ሰንደቅ አላማን የተመለከተ ቀኖና የለንም፡፡ በመሆኑም ሰንደቅ አላማችን ከኢትዮጵያዊነታችን ጋር እንጂ ከኦርቶዶክስ እምነታችን ጋር የታሪክ እንጂ የድኅነት ተዛምዶ የለውም፡፡ እንደዚህ አይነት አመለካከቶች የሚያይሉት እንዲሁ አይደለም፡፡ በሕዝቡ ዘንድ ኢትዮጵያዊ ስሜት ደብዝዟል ፤ ለሰንደቅ አላማና ለሀገራ እሴቶች የሚሰጠው ዋጋ ቀንሷል ተብሎ ሲታሰብ ሰንደቅ አላማን የመሰሉ ሀገራዊ እሴቶች ጉልበት ያገኙ ዘንድ ተጨማሪ ሃይማኖታዊ ኃይል ይሰጣቸዋል፡፡ ቤተክርስቲያቱ የሰንደቅ አላማን ክብርና ትርጉም ማስተማርዋ እና በትውልድ ውስጥ ማስረጿ ባልከፋ ፡፡ አስተምህሮ ግን ከሀገራዊ ግዴታ የሚመጣ እንጂ ከሃይማኖታዊ ግዴታ የሚመጣ መሆን የለበትም፡፡ ከሕዝብ እሴቶች እንደ አንዱ ሆኖ እንጂ ከጽድቅና ኩነኔ ጋር መሆን ለበትም፡፡

ምን ይደረግ ?

የሃይማኖት ትምህርት በሚገባ መሰጠት ሲያቆምና ሰዎችም በተደላደለው እምነት መንገድ ላይ በእውቀትና በእምነት እየተመሩ መጓዝ ሳይችሉ ሲቀሩ ‹ባለ ተስፋዎች ይሆናሉ› ቅዱስ ጳውሎስ ለኤፌሶን ሰዎች በላከው መልዕክቱ መጀመሪያ ላይ ‹በኤፌሶን ላሉት ቅዱሳን ፤ በክርስቶስ ኢየሱስ ባሉት ምዕመናን› በማለት የገለጠው አባባል ታላቅ ነገር አለው፡፡ ምእመናኑ በሁለት ዓለም መኖራቸውን እንዳይረሱ ለማድረግ ነው፡፡ ‹በክርስቶስና በኤፌሶን› ክርስቲያችም ምድራዊነታቸውንም ሰማያዊነታቸውንም መርሳት የለባቸውም፡፡

አንዳንድ ጊዜ ግን ምድራዊ ጎዳና ሲያቅተንና ፈተና ሲበዛበት ፤ የኢኮኖሚ የፖለቲካ ሁኔታ አልቃና ሲል ፤ የምናየው የምንሰማው ተስፋ ሲያሳጣን ፤ ምድር ላይ መሆናችንን ፈጽመን ረስተን ኅሊናችን ወደሚፈጥረው ልዩ አለም እንገባለን፡፡ ያንንም እጅግ ከመመኝታችን የተነሳ የደረስንበት ይመስለናል፡፡ በዚህ ጊዜ የሚሰጡ ትምህርቶች ለሰዎች ቀላል የሆኑ ፤ ንባብና ትምህርትን የማይጠይቁ ፤ በቀላሉ የሚተገበሩ ፤ የሚነኩና የሚዳሰሱ ይሆናሉ፡፡ ቡና መጠጣት አለመጠጣት ፤ አረንጓዴ ቢጫ ክር ማሰር አለማሰር ፤ በባዶ እግር መሄድ አለመሄድ ፤ ጸጉርን ማስረዘም አለማስረዘም ፤ መቁጠሪያ አለስርዓቱ ማሰር አለማሰር ፤ ከመምህራን ቃል ይልቅ የሰይጣንን ቃል መቀበልና ማመን እየሰለጡ ይመጣሉ፡፡

ለዚህ ትልቁ መፍትሔው የእምነት ተቋማት የራሳቸውን ሥራ (ወንጌል ማስተማር) ትተው በሰዎች ስራ ውስጥ መግባታቸው ነው፡፡ ስለዚህ ተቋማቱ መጀመሪያ ራሳቸውን ወደ ተልዕኳው መልሰው ፤ የማይጨበጥ ተስፋ የሚዋልለውን ሕዝብንም ወደ ትክክለኛ ኑሮ እና ተስፋ መመለስ አለባቸው፡፡ እዚህ ኤልያስ ነኝ ፤ እዚያ ድንግል ማርያም ነኝ ፤ እዚያ አቡዬ ነኝ የሚሉ በተነሱ ቁጥር ሕዝቡ ስራና ትዳር ፈትቶ ተንከራቶ አይዘልቀውም፡፡ ይህ አዲስ እንቅስቃሴ ለምእመናኑ የተለየ ፋይዳ ይዞ አልመጣም፡፡

በመንበረ ጸባዖት ቅድስት ሥላሴ ካቴደራል ሁለተኛና መሰናዶ ት/ቤት ዓመታዊ የእግር ኳስ ስፖርት ውድድር ተካሄደ

ጨዋታው በሁለት ምድብ ተከፍሎ በሁለተኛና መሰናዶ ተማሪዎች መካከል በወንዶችና በሴቶች በ21 ሴክሽን መካከል የተካሄደ ሲሆን ይኸውም ዘጠኝ ሴክሽን የሁተለኛ መሰናዶ ተማሪዎች ሲሆኑ 12 ሴክሸን ደግሞ የመሰናዶ ተማሪዎች ናቸው፡፡

በዚሁም መሠረት የሁለተኛ ደረጃ የዘጠኝ ሴክሸን አሸናፊ የ1ዐA ክፍሎች ተማሪዎች ሲሆኑ የ12 ሴክሽን አሸናፊ 12B ክፍል ተማሪዎች ናቸው፡፡ በዚህ ውጤት መሠረት የ1ዐA አንድ ዋንጫና የ3ዐዐዐ ብር ተሸላሚ ሲሆኑ የ11ኛ እና 12ኛ ክፍል አሸነፊዋች የ12B ክፍል የ12ዐዐ.ዐዐ ብር እና በመሰናዶ ት/ቤቱ ስም የአንድ ዋንጫ ተሸላሚ ሆነዋል፡፡

በዚህ ውጤት መሠረት የሁለተኛ ደረጃ ተመሪዎችን ወክለው የተጫወቱት የ1ዐA ክፍል ተማሪዎች የ12B ክፍልን 5 ለ 1 በሆነ ውጤት የአሻናፊዎች አሸናፊ በመሆን የ2ዐዐ5 ዓ/ም የሁለት ዋንጫ ተሸላሚ በመሆን በት/ቤቱ ውስጥ መምህራንና ተማሪዎች በአንድ ላይ በመሆን ደስታቸውን ኬክ በመቁርስ ለትምህርት ቤቱ ማኅበረ ሰብና ለተማሪዎች ደስታቸውን ገልጸዋል ፡፡ ይህ በእንዲህ እንዳለ የወንዶች ኮካብ ተሸላሚ የሚካኤል አረጋይ 12c ክፍል የ100 ብር ተሸላሚ ሲሆን ኮከብ ተጨዋች ቢኒያም ኑር የ100 ብር ሲሆን ኮካብ ተጨዋች ሴቶች ከ12B ክፍል ኪብሩን ተሻገር የ100 ብር ተሸላሚ ሆነዋል፡፡

የፀባይ ዋንጫ ተጨዋች የ11ኛ ክፍል ተማሪዎች ናቸው፡፡ በሴቶች በሁለኛና በመሰናዶ ተማሪዎች የእግር ኳስ ጨዋታ የመሰናዶ ተማሪዎች ሁለት ለባዶ በሆነ ውጤት ሁለተኛ ደረጃ ተማሪዎችን አሸንፈዋል፡፡ በዚሁ ውጤት የመሰናዶ ሴት ተማሪዎች አንድ ዋንጫ አንስተዋል እንዲሁም የቅርጫት ኳስ ውድድር በ12D ክፍል የሁለተኛ ደረጃና የመሰናዶ ተማሪዎች በመሸነፍ የዓመቱ የአሸናፊ አሸናፊ አንድ ዋንጫ አግኝተዋል፡፡

በዚሁ ዕለቱ የቅድስት ሥላሴ ካቴድራል አስተዳደር፤ የክፍለ ከተማ የስፖርት ክፍል ኃላፊ ፤የተለያዩ የካቴድራሉ ሠራተኞች፤ የት/ቤቱ የአስተዳደር ሠራተኞችና መምህራን እንዲሁም ተማሪዎች በተገኙበት የአምስት ዋንጫና የ8ዐዐ.ዐዐ ብር የገንዘብ መበረታቻ ሽልማት ለተማሪዎች በክቡር ሊቀ ሥልጣናት አባ ገ/ሥላሴ በላይ የመንበረ ጸባዖት ቅድስት ሥላሴ ካቴድራል ዋና አስተዳዳሪ አማካኝነት ሽልማት ተበርክቶላቸዋል ፡፡

በሌላ ዜና በክፍለ ከተማ ደረጃ በተዘጋጀው የተማሪዎች የፈጠራ ውድድር የካቴድራሉ የ1ኛ ደረጃ ተማሪዎች በፈጠራ ሥራ 2ኛ ደረጃ በመውጣት የዋንጫ ተሸላሚ ሲሆኑ እንደዚሁም በክፍለ ከተማ ደረጃ በተዘጋጀው የተማሪዎች ጥያቄና መልስ ውድድር በ8ኛ 3ኛ እና በ4ኛ ክፍል 2 ደረጃ ወጥተዋል፡፡ ይህም ት/ቤቱ ምን ያህል ውጤታማ ተማሪዎች እያፈራ እንደሆነ የሚያሳይ ነው፡፡

0020

በመንበረ ጸባዖት ቅድስት ሥላሴ ካቴድራል መሠረታዊ የኮምፒውተር አጠቃቀም ሥልጠና ተጀመረ

0020
የካቴድራሉ ሠራተኞች ሥልጠናውን ሲከታተሉ

በሰሜን አዲስ አበባ ሀገረ ስብከት የመንበረ ጸባዖት ቅድስት ሥላሴ ካቴድራል በካቴድራሉ አስተዳደር አማካኝነት መሠረታዊ የኮምፒውተር ትምህርት /ሥልጠና በካቴድራሉ 2ኛ ደረጃ ት/ቤት ለካቴድራሉ ጽ/ቤት ሠራተኞች እና ለተወሰኑ ማህበረ ካህናት ከመጋቢት 20/07/2005 ዓ.ም ጀምሮ ሥልጠናው በመካሄድ ላይ ነው፡፡

የሥልጠናው ዋና አስተባባሪ መ/ር ዘሩ ብርሃኔ እንደተናገሩት፤ የቤተ ክርስቲያን አገልጋዮችን በዘመናዊ ቴክኖሎጂ የታገዘ ትምህርት ማስተማር ዘመኑን የዋጀ መንፈሳዊና መኅበራዊ አገልግሎት መስጠት ያስችላል በመሆኑም ትምህርቱን እየተከታተሉ ያሉ የከቴድራሉ ሠራተኞች በኮምፒውተር ትምህርት መሠልጠናቸው የመረጃ ሥርዓትና ተዛማጅ ሥራዎች በዘመናዊ መልክ ለማከናወን እንደሚያግዛቸውም ተናግረዋል፡፡ የካቴድራሉ ጽ/ቤት ሥልጠናውን አዘጋጅቶ የካቴድራሉ አባቶች ካህናትና የጽ/ቤት ሠራተኞች በአንድነት እንዲሠለጥኑ ማድረጉ ቤተ ክርስቲያንን በልማት ለማሳደግ ያለውን ርእይ እንደሚያሳይ ጠቁመው፤ ወደፊትም የተለያዩ ሲስተሞችን ለምሳሌ

  • የሰበካ ጉባኤ አባላት መመዝገቢያ ሶፍት ዌር፣
  • የመዝገብ ቤት ፋይል መያዣ ዳታ ቤዝ ሶፍት ዌር፣
  • ኤች አር ሲስተም/HRS/፣
  • እስታስቲካዊ የሆኑ የጋብቻ፣
  • የልደት እና የመሳሰሉ ሲስተሞችን አዘጋጅቶ ሠራተኞች በቀላሉ መደበኛ ሥራቸውን በፍጥነትና በጥራት ማከናወን እንዲቺሉ በባለሞያዎች ሥልጠና ሊሰጥ እንደሚቺል ተናግረዋል ፡፡

የመጀመሪያውን ዙር መሠረታዊ የኮምፒዩተር ሥልጠና እየተከታተሉት ያለው ሥልጠና/ የትምህርት ዓይነት

  • አጠቃላይ ስለ ኮምፒዩተር መግቢያ /Introduction to computer/IT
  • ኤም ኤስ ዊንዶውስ (Ms-wodows /Window XP /7)
  • ማክሮሶፍት ወርድ 2007/10/ Micro soft office word 2007/10
  • ማይክሮሶፍት ኤክሲኤል 2007/10/ Micro soft office excel 2007/10
  • ማይክሮሶፍት አክሰስ 2007/10/ Micro soft office access 2007/10
  • ማይክሮሶፍት ፓወር ፖይንት 2007/10/ Micro soft office PowerPoint 2007/10
  • ማይክሮሶፍት ፐብሊሸር 2007/10/ Micro soft office publisher 2007/10
  • የኢንተርኔት አጠቃቀምና
  • አጠቃላይ ቴክኖሎጀው ለቤተ ክርስቲያን መንፈሳዊና መኅበራዊ አገልግሎት ያለው ጠቀሜታ የተመለከተ መሆኑን አስተባባሪ ጠቁሞው፣ ሥልጠናው ሠራተኞች አገልግሎታቸውን በተቀላጠፈ ሁኔታ ለመሥራት እንደሚረዳ እና በአጣቃላይ ዘመኑ/ትክኖሎጂው የደረሰበትን ደረጃ እና የአሰራር ሄደት ለሠራተኞች በወቅቱና በሰዓቱ ማስተዋወቁ ተገቢ መሆኑን አስረድተዋል፡፡

ሥልጠናውን ለ2 ወራት ያህል እየሰጡ ያሉት አሠልጣኞች በአሁኑ ጊዜ በኮምፒዩተር ሳይንስ/በአይቲ ሙያ በተለያዩ ተቋማት የሚያስተምሩ/የሚሠሩ አባላት እንደሆኑ አስተባባሪው አስረድቷል፡፡ ለወደፊትም ሥልጠናውን ከካቴድራሉ በተጨማሪ ወደ ሌሎች መሰል አጥቢያ አብያተ ክርስቲያናት እና መሥራቤቶች በመሔድ ለሚመለከታቸው ለቤተ ክርስቲያኒቱ ሠረተኞች ይህን የመሰል ሥልጠና መስጠቱ ተገቢ መሆኑን ጨምረው ገልፀዋል፡፡

የኮምፒዩተር ሥልጠናው ካለቀ በኋላም በሚመለከታቸው የሥራ ኃላፊዎች ሲፈቀድ ሌሎች ሥልጠናዎች ማለትም የአስተዳደር እና የሒሳብ አያያዝ ሥልጠናዎች በካቴድራሉ ሊሰጡ እንደሚቺሉ ጠቁመዋል፡፡

የካቴድራሉ አስተዳደር ቀደም ሲል ከ2 ዓመት በፊት ዘመናዊ ድረ ገጽ/ዌብ ሳይት ያሰራ ሲሆን ከ3 ዓመት በፊት በ2ኛ ደረጃ ት/ቤት አገልግሎት በመስጠት ላይ ያለው የብሮድ ባንድ ኢንተርኔት ከካቴድራሉ ጋር ከ500 ሜትር በላይ የሆነውን ርቀት በኔትዎረክ በማገኛት በአሁኑ ሰዓት የካቴድራሉ ጽ/ቤት ሙሉ በሙሉ የብሮድ ብንድ ኢንተርኔት አገልግሎት ለሠራተኞች መስጠት መጀመሩ አስተዳደሩን እጅግ የሚያስመሰገን የሥራ ውጤት ነው፡፡

ይህም ካቴድራሉን ጨምሮ የካቴድራሉን ሙዝዬም፤የካቴድራሉ ዘመናዊ ት/ቤት በማስተዋወቅ እና ካቴድራሉ በልማቱ በኩል ለሚያደርው እንቀስቃሴ በመላው ዓለም ላይ ከሚገኙ የዕምነቱ ተከታዮች ምዕመናን ጋር እንደ አንድ ሚዲያ ሆኖ ዘርፈ ብዙ አገልግሎት በመስጠት ላይ ነው፡፡ በመሆኑም ይህ ቴክኖሎጂ የካቴድራሉ አስተዳደር በቀላሉ ት/ቤቱን ለመቆጣጠር፤መረጃን በቀላሉ ለመለዋጥ እና ፕሪንተርና የመሳሰሉትን ሼር ለመድረግ እንዲሁም የሠረተኛውን አቅም በመገንበታ ረገድ ትልቅ አስተዋጽኦ አለው፡፡

በሌላ ዜና የፌደራል የሥነምግባር እና የፀረ-ሙስና ኮሚሽን መጋቢት 18 እና 19 ቀን 2005 ዓ.ም በጊዮን ሆቴል ለ318 በአዲስ አበባ አህጉረ ስብከት ሥር ለሚሠሩ ሰባኪያነ ወንግል በሙስና ዙሪያ ላይ የግንዛቤ ማስጨበጫ እና ሰባኪያነ ወንጌሉ ሙስናን በመከላከል ረገድ በሕብረተ ሰቡ ውስጥ የራሳቸውን አስተዋጽኦ እንዲያደርጉ የ2 ቀን ሙሉ ሥልጠና ተሰጥቷል፡፡

0030

በመንበረ ጸባዖት ቅድስት ሥላሴ ካቴድራል መሰናዶ እና 2ኛ ደረጃ ት/ቤት ከወላጆች ጋር በመማር መስተማር ሄደት ላይ ውይይት ተካሄደ

                                          በመ/ር ዘሩ ብርሃኔ

0030

የመንበረ ጸባዖት ቅድስት ሥላሴ ካቴድራል 1ኛና 2ኛ ደረጃ ዘመናዊ ት/ቤት ከመዋዕለ ህጻናት እስከ የ2ኛ ደረጃ እና መሰናዶ ት/ቤት ደረጃ ያለውን ት/ቤት አቋቁሞ ተማሪዎች መንፈሳዊና ሥጋዊ ጥበብ እንዲማሩ በማደረግ ላይ ነው፡፡ ሥጋዊ ጥበብ የሚባለውም በቀደሙት አባቶቻችን አባባል ቀለም በጥብጦ፣ ብራና ፍቆ፣ ብዕርን ቀርፆ፣ መፃህፍትን መፃፍ፣ መጠረዝና መደጎስ እንዲሁም እርሻ ማረስ፣ ንግድ መነገድና የመሳሰለ ሲሆን እንደ ዘመኑ አባባል ደግሞ የቀለም ት/ቤቶችን አቋቁሞ /ከፍቶ በዘመኑ ቴክኖሎጂ በመታገዝ እስከ ዮኒቨርሲቲ ያለውን ትምህርት መስጠት ማለት ነው፡፡ በመሆኑም የመንበረ ጸባዖት ቅድስት ሥላሴ ካቴድራል 1ኛና 2ኛ ደረጃ ዘመናዊ ት/ቤት መስከረም 14 ቀን 1955 ዓ.ም. ተቋቋሞ የማስተማር ሥራውን የጀመረው የመንበረ ጸባዖት ቅድስት ሥላሴ ካቴድራል ት/ቤት በወቅቱ የህብረተ ሰቡ የመማር ፍላጎትና የተማሪዎች ቁጥር እየጨመረ በመሄዱ መጠነኛ የሆነ ክፍያ እንዲከፍሉና የተሻለ የትምህርት አገለግሎት እንዲያገኙ ከህብረተሰቡ ጥያቄው በመቅረቡ በ1962 ዓ.ም. መጠነኛ ክፍያእንዲከፈል ተወስኖ ከዚያ ጊዜ ጀምሮ ትምህርት ቤቱ በክፍያ ማስተማር የጀመረ ሲሆን የት/ቤቱ ፈላጊ ሕብረተሰብ ከጊዜ ወደ ጊዜ ቁጥሩ እየጨመረ በመሄዱና ማስተናገድ ከሚችለው በላይ በመሆኑ የተማሪ ቅበላ የሚከናወነው በየዓመቱ ኮሚቴ እየተቋቋመ ኮሚቴው በሚያወጣው የመቀበያ መስፈርት አማካይኝነት እንደ ነበረ የታሪክ መዛግብት ያስረዳሉ፡፡ በወቅቱ የተማሪ ቁጥር እያደገ ሲሄድ አሁን 1ኛ ደረጃ ት/ቤት ያለበትን ቦታ ይዞ ከ1962 ዓ.ም. ጀምሮ 12ኛ ክፍል በዚሁ ት/ቤት የብሔራዊ ፈተና ማስፈተን የጀመረ ሲሆን አሁንም ከመቸውም በተጠናከረ መልኩ በቴክኖሎጂ እና ብቁ በሆነ የሰው ኃይል በመታገዘ የመማር ማስተማሩ ሂደት ቀጥሎ በየዓመቱ ተማሪዎችን ተቀብሎ በማስፈተን በከፍተኛ ውጤት ወደ ዩኒቨርሲቲ እንዲገቡ በመድረግ ላይ ላይ ይገኛል፡፡ በመሆኑም ዛሬ የመንበረ ጸባዖት ቅድስት ሥላሴ ካቴድራል ት/ቤት በሦስት የትምህርት ዕርከኖች ወይም ደረጃዎች ተደራጅቶ በርካታ ወጣቶችን እያስተማረ ይገኛል፡፡ እነዚህም ት/ቤቶች፡- 1. አፀደ ህፃናት 2. የ1ኛ ደጃ ት/ቤት 3. የ2ኛ ደረጃ እና መሰናዶ ት/ቤቶች ናቸው፡፡ በአሁኑ ሰዓት በ1996 ዓ.ም. አዲስ ባሠራው ህንፃ የ2ኛ ደረጃና ኮሌጅ መሰናዶ ተማሪዎችን ተቀብሎ እያስተናገደ ይገኛል፡፡ት/ቤቱ ትምህርት ሚኒስተር ያወጣውን ሥርዓተ ትምህርት በመከተልና ባለ 3 ፎቅ የራሱ ህንፃ ገንብቶ ት/ቤቱን ከ2ኛ ደረጃ ት/ቤት ወደ ተሻለ ደረጃ ላይ እንዲደርስ ከፍተኛ ጥረት በማድረግ ላይ ይገኛል ፡፡በመሆኑም ት/ቤቱ በአሁኑ ሰዓት ከመዋዕለ ሕጻናት እስከ ኮሌጅ መሰናዶ ድረስ ከ2,500 ያላነሱ ተማሪዎችን እየተቀበለ ጥራቱን የጠበቀ ትምህርት በመስጠት ላይገኛል፡፡

0031

ከትምህርቱ ጥራትም የተነሳ ተማሪዎች በሁሉም ብሔራዊ ፈተናዎች ከፍተኛ ውጤት እያመጡ ከደረጃ ወደ ደረጃ እያለፉ ስለመጡ የመንበረ ጸበዖት ቅድስት ሥላሴ ካቴድራል ት/ቤት በተገልጋዩ ህብረተሰብ ዘንድ በአዲሰ አበባ ከሚገኙ እውቅ ት/ቤቶች አንዱ ለመሆን በቅቷል፡፡በዚህም ምክንያት ት/ቤቱ በአሁኑ ጊዜ ለህብረተሰቡ እየሰጠ ያለው ት/ት ካቴድራሉን ብቻ ሳይሆን የኢ.ኦ.ተ.ቤ.ክርስቲያንም የሚያኮራና የሚያስመሰግን ት/ቤት እየሆነ መጥቷል፡፡ በመሆኑም የመንበረ ጸባዖት ቅድስት ሥላሴ ካቴድራል መሰናዶ እና 2ኛ ደረጃ ት/ቤት እንደ ቀድሞው ሁሉ ደረጃውን ጠብቆ የተሻለ ሥራ ለመስራት ታስቦ በ15/07/05 ዓ.ም ከተማሪ ወላጆች ጋር ለ3ኛ ጊዜ ውይይት የተደረገ/ያካሄደ ሲሆን ስብሰባውን የመሩት ክቡር ሊቀ ሥልጣናት አባ ገ/ሥላሴ በላይ የመንበረ ጸባዖት ቅድስት ሥላሴ ካቴድራል ዋና አስተዳዳሪ ሲሆኑ የካቴድራሉ ትምህርት ቤት ዋና ርዕሰ መምህርና ምክትል ርዕስ መምህር በስብሰባው ላይ ተገኝተዋል፡፡በአጠቃላይ ከ1000 በላይ የሚሆኑ የተማሪ ወላጅ በስብሰባው ላይ የተገኙ ሲሆን በመማር መስተማሩ ሂደት ላይ ሰፋ ያለ ውይይት ተካሂዷል፡፡ ክቡር ሊቀ ሥልጣናት አባ ገ/ሥላሴ በላይ እንደ ገለፁት ተማሪዎች የተወሰነ የማርፈድና ከክላስ የመቅረት ችግር አልፎ አልፎ እንደ ሚታይ ጠቁመው ይህ ሊስተካከል የሚችለው ደግሞ ት/ቤቱ እና ወላጆች ባላቸው ኃላፊነት የበኩላቸውን ግዴታ ሲወጡ ብቻ መሆኑን ገልፀዋል፡፡ በአሁኑ ሰዓት ት/ቤቱ ከመቸውም በላይ ከወላጆች ጋር እየተመካከረ እየሰራ መሆኑን ገልፀው ወላጆች ልጆቻቸውን በአግባቡ ሊከታተሉና ሊቆጣተሩ እንደሚገባ አሳስበዋል፡፡ቅዳሜ በሚሰጠው የማጠናከሪያ ት/ት ላይ ተማሪዎች ዩኒፎርም ሳይለብሱ እየመጡ በተወሰኑ ተማሪዎች ላይ የተወሰነ ችግር እንደነበር ገልፀው ቀደም ሲል ከወላጆች ጋር በተደረገው ስምምነት ሁሉም ተማሪዎች ቅዳሜ ለማጠናከሪያ ትምህርት ሲመጡ ዩኒፎርማቸውን እንዲለብሱ በመደረጉ ሙሉ በሙሉ ችግሩ መቀረፉን ጨምረው ገልፀዋል፡፡ ከዚህ ስብሰባ በኃላም የማርፈዱ ችግር ሙሉ ለሙሉ እንደሚቀረፍ እምነታቸው መሆኑን ተናግረዋል፡፡በቀጣይም በተመሳሳይ ሁኔታ እንደተለመደው ከወላጆች ጋር ስብሰባ ሊኖር እንደሚችል ጠቁመው የካቴድራሉ ት/ቤት ለሚያደርገው ጥሪ ተባባሪ እንዲሆኑ አሳስበዋል

0014

በመንበረ ጸባዖት ቅድስት ሥላሴ ካቴድራል ለሚጦሩ አረጋወያን ለ6ኛ ጊዜ እረዳታ ተሰጠ

                          በመ/ር ዘሩ ብርሃኔ

“ለችግረኛና ለምስኪን የሚያስብ ምስጉን ነው፡፡” መዝ. 40÷1

“እግዚአብሔር በደስታ የሚሰጠውን ይወዳልና እያንዳንዱ በልቡ እንዳሰበ ይስጥ”2ኛ ቆሮ. 9÷7

0014

ከዚህ በፊት በዌብሳይታችን አማካኝነት ወጣት ብሩክ አስራት የክርስትና ስሙ ግርማ ጽዮን ከዛሬ 6 ወር በፊት ጀምሮ ለካቴድራሉ አረጋውያን የሚሆን በየወሩ ለአረጋውያኑ የሚያስፈልጋቸውን የምግብ እርዳታ እያደረገላቸው መሆኑን ስንዘግብ መቆየታችን የሚታወስ ሲሆን አሁንም እንደተለመደው ለ6ኛ ጊዜ ለ1 ወር የሚሆን በእነ ወ/ሮ ማርታ ወርቄ፤በወንድሙ እና በጓደኞቹ አማካኝነት እርዳታውን የላከ ሲሆን ከ4 ወር በፊት በወ/ሮ ማርታ ወረቄ፤በወ/ሮ ሮማን እሸቴ፤በወ/ሮ የምስራች አበበና በወጣት ዳግማዊ መስፍን አማካኝነት የአረጋውያኑ መኖሪያ ቤት የሆነውን የንግስት ዘውዲቱ መታሰቢያ ቤት አንድ ቀን ሙሉ ማጽዳታቸው ይታወቀል፡፡

አሁንም ከአገር ቤት ተመልሶ ወደ አሜሪካ ከሄደ በኋላ ቀደም ሲል ቃል በገባው መሰረት ለ6ኛ ጊዜ ለአንድ ወር የሚሆን የወር አስቤዛ በወንደሙና በጓደኞቹ አማካኝነት እርዳታውን ልኳል፡፡ በዚሁ ዕለት ሊቀ ጠበብት ዘለዓለም መንግስቱ የመንበረ ጸባዖት ቅድስት ሥላሴ ካቴድራል ም/ስብከተ ወንጌል እና የትምህርት ክፍል ኃላፈ አማካኝነት ለወጣት ብሩክ አስራት፤ለቤተሰዎቹና ለጓደኞቹ ጸሎትና ምስጋና እንዲሁም ቃለ ምእዳን ተሰጥተዋል ፡፡

ሊቀ ጠበብት ዘለዓለም መንግስቱ እንደገለፁት እንደ እነዚህ የመሰለ አቅመ ደካማ የሆኑ አረጋውያን መርዳትበእግዚአብሔር ዘንድ ወጋው እጅግ በጣም ትልቅ መሆኑን ገልፀው በተለይም በካቴድራሉ ቅፅረ ግቢ በንግስት ዘውዲቱ መታሰቢያ ቤት ተጠልለው የሚኖሩ አረጋውያን ለ24 ሰዓታት እግዚአብሔር ሲለምኑ የመኖሩና እግዚአብሔር በሰዎች ላይ አድሮ የዕለት ጉርስ ከሚሰጥዋቸው ምዕመናን ውጭ ምንም ዓይነት ረዳት እንደሌላቸውና በአንዲት ጠባብ ቤት እስከ 8 የሚሆኑ አረጋውያን እናቶች ተጨናንቀው እንደሚኖሩና የምግብ ችግር ብቻ ሳይሆን የመፀዳጃ፤የማዕድ ቤት፤ የውሀና የንጽህና ችግርም እንዳለባቸው ገልፀዋል ፡፡

0018

በወጣት ብሩክ አስራት እየተደረገ ላለው ነገር ሁሉ ምስጋናቸው እጅግ የላቀ መሆኑን ገልፀው ሌሎችም የዚሁ የተቀደሰ ዓላማ ተሳታፊ እንዲሆኑ ጥሪያቸውን አስተላልፈዋል፡፡ በመጨረሻም በሊቀ ጠበብት ዘለዓለም መንግስቱ አማካኝነት ለወጣት ብሩክ አስራትና ለቤተ ሰዎቹ እያደረገው ላለው ነገር ሁሉ በዓጋዕዝተ ዓለም ሥላሴ ስም ካቴድራሉን በመወከል ምስጋናቸውን አቅርበዋል ፡፡

እነዚህ አረጋውያን ከዛሬ 45 ዓመታት በፊት ከዐፄ ኃይለ ሥላሴ ዘመነ መንግስት ጀምሮ በንጉሱ አማካኝነት በካቴድራሉ በጎ አድራጎት /ምግባረ ሠናይ ክፍል ሥር በቃለ ዓዋዲ መሠረት የተቋቋመ ሲሆን ቀደም ሲል በብዙ መልኩ የተደራጀ እንደነበር የሚነገር ሲሆን አሁንም በካቴድራሉ አስተዳደር አማካኝነት እንደቀድሞ ለማጠናከር ከፍተኛ የሆነ ጥረት እየተደረገ ነው በመሆኑም በዘላቂነተ የአረጋውያኑ ችግር በመጠኑ ለመቅረፍ እንደ ወጣት ብሩክ አስራት የክርስትና ስሙ ግርማ ጽዮን አቅማችሁ የፈቀደውን/የቻላችሁትን ያህል እርዳታ እንድታድርጉ እናሳስባለን፡፡

The Holy Trinity Cathedral charity was established during the time of Emperor Haileselassie. It is still in existence helping the needy. During the time of the former king, he was providing Fund worth enough to feed and cloth the poor. But after the dethronment of the Emperor, things have become different and the charity run out of funds as a result of which the needy are in dire shortage to provide the necessary provisions. It would be worthwhile to make clear that those of you who have the interest of extending help for the subsistence of the service of the charity. The church we in advance express our indebtedness of any contribution. At present the charity assistances 15 aged and helpless women.

ብፁዕ ወቅዱስ ፓትርያሪክ አቡነ ማትያስ ዐቢይ ጾምን አስመልክቶ መልእክት አስተላለፉ

                                       

በስመ አብ ወወልድ ወመንፈስ ቅዱስ አሐዱ አምላክ አሜን፡፡

በሀገራችን በኢትዮጵያ በገጠርና በከተማ፤

ከሀገር ውጭ በተለያዩ አህጉር የምትኖሩ፤

የሀገራችንን ዳር ድንበር ለማስጠበቅ በየጠረፉ የቆማችኹ፤

በሕማም ምክንያት በየሆስፒታሉ ያላችኹ፤

እንዲሁም የሕግ ታራሚዎች ኾናችኁ በማረሚያ ቤት የምትገኙ ኢትዮጵያውያንና ኢትዮጵያውያት፤

እንኳን ለጌታችን መድኃኒታችን ኢየሱስ ክርስቶስ የ2005 ዓ.ም መዋዕለ ጾም በሰላም አደረሳችኹ፡፡

‹‹እብለክሙ በመንፈስ ሑሩ ወፍትወተ ሥጋክሙ ኢትግብሩ›› ‹‹በመንፈስ ተመላለሱ እንጂ የሥጋችኹን ምኞት ከቶ አትፈጽሙ እላችኋለኹ››

የተወደዳችኹ የመንፈስ ቅዱስ ልጆቻችን!

የሰው ልጅ ከአራቱ ባሕርያተ ሥጋ ከሦስቱ ባሕርያተ ነፍስ የተገኘ ፍጡር እንደመኾኑ በሥጋዊ ፍላጎቱ ሳይሸነፍ ራሱን ለመንፈሳዊ ሕይወቱ ማስገዛት እንዳለበት መጽሐፍ ቅዱስ ያስረዳናል፡፡ ከዚህም አንጻር ‹‹በመንፈስ ተመላለሱ፤ የሥጋንም ምኞት ከቶ አትፈጽሙ፤ ሥጋ በመንፈስ ላይ መንፈስም በሥጋ ላይ ይመኛልና›› ይላል የእግዚአብሔር ቃል፡፡ ለእግዚአብሔር ሕግ መገዛት እስከተቻለ ድረስ ክፉውንና በጎውን ለይቶ ማወቅ ስለማያዳግት በተቻለ መጠን በፊታችን ሰኞ፣ መጋቢት 2 ቀን 2005 ዓ.ም. በሚጀመረው በታላቁ ጾማችን በዓቢይ ጾም ወራት ጎጂ ከኾኑ ተግባራት ሁሉ መራቅ አለብን፤ ጌታችን መድኃኒታችን ኢየሱስ ክርስቶስ ዓለምን የማዳን ሥራ ከመጀመሩ በፊት ዐርባ ቀንና ዐርባ ሌሊት በመጾም ድኅነተ ነፍስ እንዳስገኘልን ሁሉ እኛም ፈለጉን ተከትለን ጾም በመጾም ጥንካሬን አግኝተን ረቂቅ የኾነውን የዲያብሎስ ፈተና ማሸነፍ በሚያስችለን ቀጥተኛ መንገድ ለመጓዝ ቅድመ ዝግጅት ማድረግ ይጠበቅብናል፡፡

ከዚህ አንጻር ለሥጋዊ አካላችን ጥንካሬ ምግበ ሥጋ እንደሚያስፈልገው ሁሉ መንፈሳዊ ሕይወታችን እንዲጠነክር መንፈሳዊ ምግብ ያስፈልገዋል፡፡ ከጥንት ጀምሮ ወደ እግዚአብሔር ቅርበት የነበራቸው ቅዱሳን በተሞክሯቸው እንዳስተማሩንና ቅዱሳት መጻሕፍትም እንዳስረዱን÷ መንፈሳዊ አካላችን የሚጠነክረው የሥጋዊ አካላችን ፍላጎት በጾም ኃይል እንዲደክም ስናደርገው ነው፡፡

ሰይጣንና ክፉ ተግባሩ በሰው ላይ ኀይል የሚያገኙበት ምክንያት እኛ ወደ ምግበ ሥጋ ስናዘነብል እንደኾነ በአዳምና በሔዋን ላይ የኾነውና በጌታችን ላይ የተቃጣው በምግበ ሥጋ የመፈተን ሙከራ ማስረጃዎቻችን ናቸው፡፡ የጾም መንፈሳዊ ጥቅም በብሉይ ኪዳንም ኾነ በሐዲስ ኪዳን በማያሻማ ኹኔታ ተረጋግጧል፡፡ ጾም ማለት የቃሉ ቀጥተኛ ትርጉም መተው፣ ወይም እግዚአብሔር ከማይወደው ነገር ሁሉ መራቅ ማለት ነው፡፡ እንዲህ ከኾነ ከእንስሳትና የእንስሳት ውጤቶችን ጨምሮ ከሌሎች ፍላጎቶች ሁሉ በመራቅ ራሳችንን ተቆጣጥረን በፍጹም አእምሯችን፣ በፍጹም ልባችን፣ በፍጹም ኀይላችን እግዚአብሔር አምላካችንን ልናመልክና ለእርሱ ፍጹም ታዛዦች መኾን ይጠበቅብናል፡፡

የተወደዳችኹ የመንፈስ ቅዱስ ልጆቻችን!

እንደ ቤተ ክርስቲያናችን አስተምህሮ ሁልጊዜ ለሀገርና ለቤተ ክርስቲያናችን የሚጠቅም መልካም ሥራን ከመሥራት በቀር ጉዳት የሚያደርሱ ተግባራትን ማራመድ ፈጽሞ የተከለከለ ነው፡፡ በየአቅጣጫው የተዘረጋው የሀገሪቱ የልማት ፕሮጀክት ውጤታማ እንዲኾን እየተደረገ ያለውን ጥረት የምንመለከተው በታላቅ አድናቆት ነው፤ የኢትዮጵያ ኦርቶዶክስ ተዋሕዶ ቤተ ክርስቲያን የጥረቱ አካል በመኾን ጥሪውን ተቀብላ የሚጠበቅባትን ድርሻ ስታበረክት የቆየች ቢኾንም የልማት ፕሮጀክቱ እውን ኾኖ ውጤታማነቱን እስኪያረጋግጥ ድረስ ብቻ ሳይኾን ቤተ ክርስቲያኒቱ የምታደርገው የተግባር ተሳትፎ ዘወትር ይቀጥላል፡፡

ተግባራችን ሁሉ በእግዚአብሔር ዘንድ የተወደደ ሊኾን የሚችለው ርኅራኄን፣ ቸርነትን፣ ምጽዋትን፣ ትዕግሥትን፣ ፍቅርን፣ ስምምነትን፣ ትሕትናን፣ መረዳዳትን፣ መተዛዘንን ገንዘብ አድርገን የጾምን እንደኾን ነው፡፡ በጾም ወራት ልንፈጽማቸው የሚገቡ የትሩፋት ሥራዎች ብዙዎች ቢኾኑም በተለይ መሠረታዊ የኑሮ ፍላጎት ላልተሟላላቸው ወገኖቻችን ማለትም፤ ልብስ ለሌላቸው ልብስ በማልበስ፣ የምግብ እጥረት ለገጠማቸው የሚቻለንን በመለገሥ፣ ማረፊያ ለሌላቸው መጠለያዎችን በመቀለስ ወገኖቻችንን መርዳት ያስፈልጋል፡፡

በመኾኑም የጾም ዋና ዓላማው ለእግዚአብሔር ቃል በሙሉ ኀይላችን ለመታዘዝ መዘጋጀት ነውና እግዚአብሔር በቃሉ የነገረንን ሁሉ ከመፈጸም ጋራ ሃይማኖታዊና ሀገራዊ ግዴታችንን በመወጣት፣ መንፈሳዊና ማኅበራዊ መርሐ ግብራችንን በማፋጠን፣ መልካም የኾኑትን የልማት ሥራዎቻችንን ሁሉ በማከናወን ወርኃ ጾሙን ልናሳልፍ ይገባል፡፡

እግዚአብሔር አምላካችን ወርኃ ጾሙን በሰላም እንዳስጀመረን ሱባዔውን በሰላም አስፈጽሞ ለብርሃነ ትንሣኤው በሰላም እንዲያደርሰን ቅዱስ ፈቃዱ ይኹንልን፡፡

እግዚአብሔር አምላካችን ሕዝባችንን ይባርክ ይቀድስ፤ አሜን፡፡

አባ ማትያስ ቀዳማዊ ፓትርያሪክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኲስም ወእጨጌ ዘመንበረ ተክለ ሃይማኖት

መጋቢት 2 ቀን 2005 ዓ.ም.

አዲስ አበባ፤

በሰሜን አዲስ አበባ ሀገረ ስብከት የስብከተ ወንጌል ማስፋፊያ የአንድነት ጉባኤ መርሃ ግብር ተጀመረ

                                    በመ/ር ዘሩ ብርሃኔ

መጋቢት 8/005 ዓ.ም በአዲስ አበባ አህጉረ ስብከት መሰብሰቢያ አዳራሽ ከጠዋቱ 3.00 ሰዓት ጀምሮ በስብከተ ወንጌል ማስፋፊያ መርሃ ግብር ላይ ስብሰባ የተካሄደ ሲሆን በመርሀ ግብሩ ላይ ብፁዕ አቡነ ዳንኤል የሰሜን እና የምስራቅ አዲስ አበባ አህጉረ ስብከት ሊቀ ጳጳስ ፤ክቡር መልአከ ሰላም ዳዊት ያሬድ የሰሜን አዲስ አበባ ሀገረ ስብከት ዋና ሥራ አስኪያጅን ጨምሮ ሁሉም የሀገረ ስብከቱ የክፍል ሃላፊዎቹና ሠራተኞች እንዲሁም የገዳማትና አድባራት አስተዳዳሪዎች ፣ የደብር ፀሀፊዎች፣ ቁጥጥሮች፣ ሂሣብ ሹሞችና ሰባኪያነ ወንጌል በስብሰባው ላይ ተገኝተዋል፡፡

ስብሰባው በብፁእነታቸው በፀሎት ከተከፈተ በኋላ የመግቢያ ንግግር በብፁዕ አቡነ ዳንኤል የሰሜን እና የምስራቅ አዲስ አበባ አህጉረ ስብከት ሊቀ ጳጳስ አማካኝነት የተደረገ ሲሆን በመቀጠልም በክቡር መልአከ ሰላም ዳዊት ያሬድ የሰሜን አዲስ አበባ ሀገረ ስብከት ዋና ሥራ አስኪያጅ አማካኝነት ስለአንድነት ጉባኤው ጠቀሜታ ሰፋ ያለ ማብራሪያ ሰጥተዋል ፡፡

በጉባኤው ላይ በሰሜን አዲስ አበባ ሀገረ ስብከት ሥር ለሜገኙ ገዳማት እና አድባራት የሚከተለው ይዘት ያለው ሴኩላር ደብዳቤ ተበትኗል፡፡

ቀደም ሲል በአዲስ አበባ ሀገረ ስብከት ሥር የሚገኙት ገዳማት እና አድባራት እንደየ አቅራቢያቸው ተመድበው የአንድነት ጉባኤው በሚካሄድበት ወቅት ካህናትን እና ምዕመናንን ያቀራረበና ለስብከተ ወንጌል መስፋፋት መነቃቃትን የፈጠረ ጉባኤ እንደነበረ ይታወቅል፡፡

ይሁን እንጂ በሀገራችን አንዱ የጀመረውን መልካም ሥራ ተተኪው የማስቀጠል ልምድ ባለመኖሩ የአንድነት ጉባኤው ተቋርጦ ቆይቶ ነበር፡፡ ነገር ግን የአዲስ አበባ ሀገረ ስብከት ለ4 አህጉረ ስብከት ከተከፈለ በኋላ የሰሜን አዲስ አበባ ሀገረ ስብከት ጽ/ቤት የአንድት ጉባኤው ለስብከተ ወንጌል መስፋፋት ካህናቱን እና ምዕመናንን ለማቀራረብና በሃይማኖታቸው ፀንተው እንዲኖሩ አስፈላጊ በመሆኑ የካትት 13 ቀን 2ዐዐ5 ዓ/ም በሀገረ ስብከቱ ዋና ሥራ አስኪያጅ ሰብሳቢነት በተደረገው የሰባክያነ ወንጌል ጥምር ስብሰባ የአንድት ጉባኤው ጠንካራ ጎን እና ደካማ ጎን በስፋት ውይይት ከተደረገበት በኋላ የአንድነት ጉባኤው ለስብከተ ወንጌል መስፋፋት ጠቃሚ መሆኑ ስለታመነበት በሀገረ ስብከቱ የስብከተ ወንጌል መምሪያ ኃላፊ የሚመራ 7 አባላት ያሉት የስብከተ ወንጌል መስፋፋት አጋዥ ኰሚቴ ተመርጦ ሥራ በመጀመር የአንድነት ጉባኤው እንዲጀመር ገዳማት እና አድባራትን እንደየ አቅራቢያቸው መድቦአል፡፡

በመሆኑም የገዳሙ /የካቴድራሉ/ የደብሩ ሰበካከ ጉባኤ ጽ/ቤት የአንድነት ጉባኤው መጀመሩን አውቆ ለሰብከተ ወንጌል መስፋፋት ቅድመ ዝግጅት በማድረግ አስፈላጊውን ወጪ እንዲመድብ እናስታውቃለን የሚል ነው፡፡ በዚሁም መነሻነት የሰሜን አዲስ አበባ ገዳማትና አድባራት በ6 ምድብ ተመድበው/ተከፍለው በየተራ የአንድነት ጉባኤውን ሊያካሂዱ እንደሚችሉ ሁሉም በደስታ ተቀብለውታል፡፡

ምድብ 1

1. መንበረ ጸባዖት ቅድስት ሥላሴ ካቴድራል

2. ታዕካ ነገስት በዓታ ለማርያም ገዳም

3. መንበረ መንግስት ቅዱስ ገብርኤል ገዳም

4. ቀበና ምሥራቀ ፀሐይ መድኃኔ ዓለም ቤ/ክ

5. ቀበና ቤዛዊት ዓለም ኪዳነ ምህረት ቤ.ክ 6. ደብረ ዕንቁ ልደታ ለማርያም ቤ/ክ

ምድብ 2

1. መንበረ ፓትርያርክ ቅ/ቅ/ማርያም ገዳም

2. መንበረ ልዑል ቅ/ማርቆስ ቤ/ክ

3. ምስካየ ኅዙናን መድኃኔ ዓለም ገዳም

ምድብ 3

1. ገነት ጽጌ ቅ/ጊዮርጊስ ቤ/ክ

2. ደብረ ሰላም ቀጨኔ መድኃኔ ዓለም ቤ/ክ

3. ደበረ ነጎድጓድ ቅ/ዮሐንስ ቤ/ክ

ምድብ 4

1. ደብረ ሲና ቅ/እግዚአብሔር አብ ቤ/ክ

2. መንበረ ክብር ደብረ ታቦር ቅዱስ ሚካኤል ገዳም

3. ደብረ ጎልጎታ ድል በር መድኃኔ ዓለም ቤ/ክ

ምድብ 5

1. እንጦጦ መንበረ ንግስት ቁስቋም ቤ/ክ

2. እንጦጦ መንበረ ስብሐት ቅ/ሥላሴ ቤ/ክ

3. እንጦጦ ሐመረ ኖኅ ኪዳነ ምህረት ገዳም

ምድብ 6

1. ገነተ ኢየሱስ ወገነተ ማርያም ቤ/ክ

2. መካነ ሕይወት አቡነ ገብረ መንፈስ ቅዱስ ቤ/ክ

3. አንቀጸ ምህረት ቅ/ሚካኤል ቤ/ክ

4. ደብረ ፀሐይ ፈረንሳይ ቅ/ጊዮርጊስ ቤ/ክ

5. ምስራቀ ፀሐይ ጉራራ ኪዳነ ምህረት

በቀጣይ የዚህ ዓይነት የአንድነት ጉባኤ መርሃ ግብር በሁሉም የአዲስ አበባ አህጉረ ስብከት ገዳማትና አድባራት ሊካሄድ እንደሚችል ለማወቅ የተቻለ ሲሆን እኛም በሰዓቱና በወቅቱ እየተገኘን ስለ አንድነት ጉባኤው የትና መቼ እንዲሁም እንዴት ተከበረ የሚለውን በጽሁፍ፤በድምፅና በምስል በሰፊው የምንዘግብ መሆኑን ከወዲሁ ለመግለጽ እንወዳለን፡፡

ቸር ያቆየን::

m

የአዲስ አበባ አህጉረ ስብከት ሠራተኞችና በሥራቸው የሚገኙት የገዳማትና አድባራት ሠራተኞች ከብፁዕ ወቅዱስ አቡነ ማትያስ ቀዳማዊ ፖትርያርክ ጋር የትውውቅ መርሃ ግብር ተካሄደ

                     በመ/ር ዘሩ ብርሃኔ

m

የካቲት 29 ቀን 2005 ዓ.ም በጠቅላይ በተ ክህነት መሰብሰቢያ አዳራሽ በተካሄደው በዚሁ የትውውቅ መርሃ ግብር ላይ ብፁአን አባቶች ሊቃነ ጳጳሳት፤የ4ቱም አዲስ አበባ አህጉረ ስብከት ሥራ አስከያጆችና ሠራተኞች፤የገዳማትና አድባራት አስተዳዳሪዎች፤የሰበካ ጉባኤ ም/ሊቃነ መናብርት፤ፀሐፊዎች፤ቁጥጥሮች፤ሒሳብ ሹሞች፤ሰባኪያነ ወንጌሎችና የሰንበት ት/ቤት ተወካዮች በትውውቅ በፕሮግራሙ ላይ ተገኝተዋል፡፡

ስብሰባው በብፁዕ ወቅዱስ አቡነ ማትያስ ቀዳማዊ ፖትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት አማካኝነት በፀሎት ከተከፈተ በኋላ የዕለቱ ፕሮግራም በመጋቤ ካህናቱ አማካኝነት እንዲገለጽ ተደርጓል የዕለቱ አጀንዳዎችም፡-

 

 

1. በአዲስ አበባ አህጉረ ስብከት ሠራተኞችና በሥራቸው የሚገኙት በገዳማትና አድባራት ሠራተኞች የተዘጋውን የደስታ መግለጫ ደብዳቤ ማቅረብ

2. የ 2005ዓ.ም አቢይ ፆምን አስመልክቶ መመሪያ መስጠት

3. ስለ አክሱም ሙዝዬም ሕንፃ ግንባታ በተመለከተ እና

4. በገጠሪቱ ኢትዮጵያ ስለ ሚገኙ የተጎዱ አብያት ክርስቲያናት በተመለከተ ነበር

ወደ ዋና ፕሮግራም ከመገበቱ በፊት በ3 በፁአን አባቶች ሊቃነ ጳጳሳት ብፁዕ አቡነ ናትናኤል፤ብፁዕ አቡነ ዳንኤል የምሥራቅና የሰሜን አ/አበባ አህጉረ ስብከት ሊቀ ጳጳስ እና ብፁዕ አቡነ ሕዝቅኤል የቅ/ሲኖዶስ ዋና ጸሐፊ፣ የምዕራብና የበቡብ አዲስ አበባ አህጉር ስብከት ሊቀ ጳጳስ የፋና ቤንጅ ማጂ አህጉረ ስብከት ሊቀ ጳጳስ አማካኘነት ስለ ነበረው የወቅቱ ሁኔታ አስመልክተው ሰፊ የሆነ ንግግር አድርገዋል፡፡

በመቀጠልም በአዲስ አበባ አህጉረ ስብከት ሠራተኞችና በሥራቸው የሚገኙት በገዳማትና አድባራት ሠራተኞች የተዘጋውን የደስታ መግለጫ ደብዳቤ በተወከሉ የገዳማትና አድባራት አስተዳዳሪዎች አማካኝነት እንዲነበብ የተደረገ ሲሆን ከዚህ በመቀጠል ቅዱስ አባታችን በ3 ዋና ዋና ጉዳዮች ላይ መመሪያ ሰጥተዋል፡-

  1. የ 2005 ዓ.ም አብይ ጾምን በማስመልከት ቅዱስነታቸው ባስተላለፉት መልእክት “ለእግዚአብሔር ሕግ መገዛት እስከተቻለ ድረስ ክፉውንና በጎውን ለይቶ ማወቅ ስለማያዳግት በተቻለ መጠን ከፊታችን ሰኞ መጋቢት 2 ቀን 2005 ዓ.ም. በሚጀመረው በታላቁ ጾማችን በዓብይ ጾም ወራት ጎጂ ከሆኑ ተግባራት ሁሉ መራቅ አለብን፡፡ ጌታችን መድኀኒታችን ኢየሱስ ክርስቶስ ዓለምን የማዳን ሥራ ከመጀመሩ በፊት ዐርባ ቀንና ዐርባ ሌሊት በመጾም ድኅነተ ነፍስ እንዳስገኘልን ሁሉ እኛም ፈለጉን ተከትለን ጾም በመጾም ጥንካሬን አግኝተን ረቂቅ የሆነውን የዲያብሎስ ፈተና ማሸነፍ በሚያስችለን ቀጥተኛ መንገድ ለመጓዝ ቅድመ ዝግጅት ማድረግ ይጠበቅብናል” ብለዋል፡፡የጾም ዋና ዓላማው ለእግዚአብሔር ቃል በሙሉ ኃይል ለመታዘዝ መዘጋጀት እንደሆነ የገለጹት ቅዱስ ፓትርያርኩ በጾም ወራት ሊፈጸሙ ይገባቸዋል ያሏቸውንም ሲጠቅሱ  “ተግባራችን ሁሉ በእግዚአብሔር ዘንድ የተወደደ ሊሆን የሚችለው ርኅራኄን፤ ቸርነትን፤ ምጽዋትን፤ ፍቅርን፤ ስምምነትን፤ ትሕትናን፤ መረዳዳትን፤ መተዛዘንን ገንዘብ አድርገን የጾምን እንደሆነ ነው፡፡ በጾም ወራት ልንፈጽማቸው የሚገቡን የትሩፋት ሥራዎች ብዙዎች ቢሆኑም በተለይ መሠረታዊ የሆነ የኑሮ ፍላጎት ላልተሟላላቸው ወገኖቻችን ማለትም ልብስ ለሌላቸው ልብስ በማልበስ፤ የምግብ እጥረት ላጋጠማቸው የሚቻለንን በመለገስ፤ ማረፊያ ለሌላቸው መጠለያዎችን በመቀለስ ወገኖቻችንን መርዳት ያስፈልጋል” በመሆኑም እንደ ከአሁን ከቀደም መንፈሳዊም ሆነ ማህበራዊ አገልግሎቱ ተጠናክሮ እንዲቀጥል በማለት መልእክት አስተላልፈዋል፡፡
  1. በአክሱም የተጀመረው ታሪካዊ የሆነው የሙዝዬም ሕንፃ ግንባታ ሥራ ተጠናክሮ እንዲቀጥል እንዲደረግ ሲሉ መመሪያ የሰጡ ሲሆን
  2. እንደዚሁም በገጠሪቱ ኢተዮጵያ ስለ ሚገኙ የተጎዱ አብያት ክርስቲያናት ቀደም ሲል የተጀመረው የእርዳታ ማሰባሰብ ፕሮግራም በአግባቡ ተጠናክሮ ስለ ሚቀጥልበት ሁኔታ አባታዊ መመሪያ ሰጥተዋል፡፡

ብፁዕ ወቅዱስ አቡነ ማትያስ ከመንበረ ጸባዖት ቅድስት ሥላሴ ካቴድራል ከመደበኛ አገልጋይነት ለዚሁ ታላቅ ክብር ከበቁ ቅዱሳን ፓትርያሪኮች መካከል 4ኛ ፓትርያሪክ ናቸው

በአዲስ አበባ አህጉረ ስብከት ሠራተኞችና በሥራቸው በሚገኙት በገዳማትና አድባራት ሠራተኞች የቀረበ የደስታ መግለጫ የካቲት 29 ቀን 2005 ዓ.ም

“ ንወድሶሙ ለዕደው ክቡራን ለአበዊነ በመዋዕሊሆሙ እስከ ብዙኃ ክብረ ወሀብቦሙ እግዚአብሔር፤ “ የከበሩ አባቶቻችንን በዘመናቸው እናመሰግናቸው እግዚአብሐር ብዙ ክብርን ሰጥቷቸዋልና” 

  1. ብፁእ ወቅዱስ አቡነ ማቲያስ ቀዳማዊ ርዕሰ ሊቃነ ጳጳስ ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት 
  2. ብፁዕ አቡነ ፊልጶስ የጠቅላይ ቤ/ክህነት ዋና ሥራ አስኪያጅ፣ የኢሊባቦርና የጋምቤላ አህጉረ ስብከተ ሊቀ ጳጳስ 
  3. ብፁዕ አቡነ ዳንኤል የምሥራቅና የሰሜን አ/አበባ አህጉረ ስብከት ሊቀ ጳጳስ 
  4. ብፁዕ አቡነ ሕዝቅኤል የቅ/ሲኖዶስ ዋና ጸሐፊ፣ የምዕራብና የበቡብ አዲስ አበባ አህጉር ስብከት ሊቀ ጳጳስ የፋና ቤንጅ ማጂ አህጉረ ስብከት ሊቀ ጳጳስ 
  5. ብፁዓን አበው ሊቃነ ጳጳስት 
  6. የመንበረ ፖትርያርክ ጠቅላይ ቤ/ክህነት ምክትል ሥራ አስኪያጆች እና የየመምሪያው ኃላፊዎች 
  7. የአዲስ አበባ አህጉረ ስብከት ሥራ አስኪያጆች እና የየክፍሉ ኃላፊዎች 
  8. የጉባኤው ታዳሚዎች በሙሉ

j

በቅድሚያ ከሁሉ አስቀደሙን የበጐ ነገር ሁሉ መገኛ የሆነው አምላካችን እግዚአብሔር በቸርነቱ በጐ ነገርን ለማድረግ ሲፈቅድ ለዚሁ ተግባር የሚበቃ በጐ ሰው አስነስቶ ለቸርነቱ መገለጫ ያደርገዋል፡፡ በዚህም አምላካዊ ፈቃድ መሠረት ኦርቶዶክሳዊት፣ ሐዋርያዊተና ዓለምአቀፋዊት የሆነችውን የኢትዮጵያን ቤተ ክርስቲያን፣ የካህናቶቿና የሕዝቦቿ እረኛና መሪ ሆነው ያገለግሉ ዘንድ በመንፈስ ቅዱስ ተጠርተውና ተመርጠው ለዚህ ታላቅ ክብር በቅተዋለና ከማንኛውም ነገር ሁሉ በጽኑዕ ክንዱ ጠብቆ ከዚህ ያደረስዎን እግዚአብሔርን እናመሰግናለን፡፡

ቅዱስ አባታችን እንደሚታወቀው ሁሉ ሀገራችን ኢትዮጵያ ባለፉት ጥቂት ወራቶች እጅግ አሳዛኝ በሚባል የታሪክ ክስተት በሳል መሪዎቿን በሞት ያጣችበት መሪር ጊዜ እንደነበር የሚታወስ ነው፡፡ ማንም ባላሰበውና ባልገመተው ወቅት እኒህን ሁለት የልማት፣ የብልጽግና እና የሰላም ፈርጦች ሀገራችን ብቻ ሳትሆን ምድራችን ብታጣም ሀዘንና ምሬቷን በውስጧ ይዛ መሪዎቿ አኑረውላት ያለፉትን የልማት ትልም በመከተል ቤተ ክርስቲያናችንም ሆነች ሀገራችን ከታቀደላቸው የእድገት ሰገነት ላይ ይደርሱ ዘንድ በመንግስት በኩል በበሳል መሪዎቿ የተፈፀመው የሥልጣን ሽግግር ዲሞክራሲያዊና ሰላማዊ ሆኖ በመጠናቅቁ መላውን የዓለም ህብረተሰብ ያስደነቀ ሆኖ አልፏል፡፡

በሃገራችን መንግስት እንደተከናወነው የሥልጥን ሽግግር ሁሉ ቅድስት ቤተ ክርስቲያናችንም የደረሰባትን ሀዘን በውስጧ አኑራ በቅዱስ ሲኖዶስ አባላት በብፁዓን ሊቃነ ጳጳሳት በሳል አመለካከት እንዲሁም ያለሰለሰ ጥረትና የፀሎት ውጤት አንድነቷ ሳይናጋና መሠረቷ ሳይነዋወጥ የተፈፀመው የስድስተኛ ፖትርያርክ ምርጫ እውነትም ቤተ ክርስቲያን የሰላም አውድማና መሪዎቿ ብፁዓን ሊቃነ ጳጳሳትም የሰላምና የወንጌል ገበሬዎች መሆናቸውን ፈንትው አድርጎ ያሳየና አማኞቿንም ያኮራ ተግባር ሆኗል፡፡

ቅዱስ አባታችን የቤተ ክርስቲያናችን 5ኛ ፖትርያርክ በመሆን ለሃያ ዓመታት ለዕድገትዋ ደፋ ቀና በማለት ሲጥሩላት የነበሩት ብፁዕ ወቅዱስ አቡነ ጳውሎስ ፖትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተ/ሃይማኖት የዓለም አብያተ ክርስቲያናት ምክር ቤት ፕሬዘዳንት የአለም ሃይማኖቶች ለሰላም የብብር ፕሬዘዳንት እና የሰላም አምባሳደር ይህን ቅዱስነትዎ አሁን የተረከቡትን ታላቅ መንበር ከተረከቡ ቀን አንስቶ በሚያስጨንቃቸው የቤተክርስቲያን ጉዳይ ምክንያት ለዓይን ሽፋሽፍቶቻቸው እንቅልፍን ለወገባቸውም እረፍትን ሳይሹ በጤናቸውም ሆነ በሕመማቸው ለቤተ ክርስቲያንና ለአማኞቿ ኩራት እንደሠሩ እና ቤተ ክርስቲያናችንም ከዓለም አደባባይ የላቀ ሥፍራ አግኝታ ተከብራና ታፍራ እንድትኖር ያበረከቱት አስተዋጽኦ እንዲሁ በቃል የሚነገር ታሪክ ብቻ ሳይሆን የሥራቸው ፍሬዎች በዓይን የሚታዩና በእጅ የሚዳሰሱ የተግባር ማሳያዎች በመሆናቸው እየተመለከቱ ዕፁብ ከማለት ባለፈ ሌላ መስካሪና ዘካሪ አያሻቸውም፡፡ ቅዱስነታቸው ሥራቸውን ጨርሰው ያቆሙ ሳይሆን ከዕለት ወደ ዕለት ቤተ ክርስቲያችን ካለችበት የእድገት ደረጃ ወደ ላቀ የዕድገት ጫፍ ትደርስ ዘንድ በርካታ ትልሞችን ሰንቀው እየተጉ የነበረ ቢሆንም እግዚአብሔር አምላክ ከድካመ ሥጋ ያርፉባት ዘንድ ነሐሴ 10 ቀን 2004 ዓ/ም ቆርጦ ኖሮ እርሱ ባወቀ ከእኛ በእርፍተ ሥጋ ወስዶ ወደ እርሱ እረፍተ ነፋስ አግብቷቸዋል፡፡

ታዲያ በዚህ ጊዜ እጅግ የበዛ የቤተ ክርስቲያን ሀዘን በካህናቶቿና ምዕመናኖቿ ላይ የደረሰ ቢሆንም ቅዱስ ሲኖዶስ መንፈስ ቅዱስን አጋዥ አድርጐ አስቸኳይ ውይይት በማድረግ የቤተ ክርስቲያናችን ቀጣዩ ፖትርያርክ እስኪመረጥ ድርስ ታላቁን መንበር ይጠብቁ ዘንድ አንጋፋውን አባት ብፁዕ አቡነ ናትናኤልን ዐቃቤ መንበረ ፖትርያርክ በማድረግ ከሰየመ በኋላ በብፀዕነታቸውም ሥር ሰባት የሥራ አስፈጻሚ ሊቃነ ጳጳሳትን ሰይሞ ቤትክርስቲያን የቀድሞ ፖትርየርኳ ህልመና ራዕይ ለአፍታም ሳይደናቀፍ በነበረበት ፍጥነት እንዲቀጥል እንዲሁም ሰላሟ እንዳይደፈረስና አገልግሎቷም እንዲስፋፋ በቅዱስ ሲኖዶስ ምልዓተ ጉባዔ የደረገው አኩሪ ተግባር የቤተ ክርስቲያናችን ራስ ከሆነው ከኢየሱስ ክርስቶስ በታች ይህች ሐዋርያዊትና ዓለም አቀፋዊት ቤተክረስቲያን በርካታ የሚተጉላትና የሚሳሱላት የምሁራን አባቶች ምንጭ መሆኗን አመላክቷል፡፡

የቅዱስ ሲኖዶስ ዓባላትም ብፁዓን አበው ሊቃነ ጳጳሳት ከብፁዕ ዐቃቤ መንበረ ፖትርየርኩ ጋር በመምከር ለቤተ ክርስቲያን ይበጃል ያሉትን በርካታ ሥራዎችን ከመፈፀማቸውም ባሻገር ቀጣዩ ፖትርያርክ የሚመረጥበትን ሂደት በአትኩሮት መርምረው ብቁ የሆኑ እና በዕውቀትም ሆነ በአመለካከት የበሰሉ የአስመራጭ ኮሚቴዎችን በማቋቋምና የአስመራጭ ኮሚቴውንም የሥራ እንቅስቃሴ በቅርበት በመከታተል የበኩላቸውን ኃላፊነት የተወጡ ሲሆን የአስመራጭ ኮሚቴውም በመንፈስ ቅዱስ እየታገዘ በመሉ አቅሙና በተሟላ ነፃነት ሰፊ ጊዜ በመውሰድ ሥራውን ሲያከናውን ሰንብቶ አምስት ሊቃነ ጳጳሳትን ለእጩነት በማቅረብ ባለፈው የካቲት 21 ቀን 2005 ዓ/.ም ታሪካዊ፤ ነፃና ፍትሐዊ የምርጫ ሂደት ስድስተኛው የቤተ ክረሰቲያናችን ፖትርያርክ ማን መሆኑን ፈንትው አድረጐ አሳየቶንና ቅዱስነትዎን አስረክቦን ኮሚቴው የተጠራበትንና የተሰየመበትን ዓላማ በሚገባ ተወጥቷል፡፡

h

ጌታችን መድኃኒታችን ኢየሱስ ክርስቶስ ለሐዋርያት ሌላ አፅናኝ ጰራቅሊጦስን እስክልክላችሁ ድረስ ተግታችሁ ጠብቁ ብሎ ከተለያቸው በኋላ አዝነውና ተክዘው ለነበሩት ደቀ መዛሙርት አፅናኝ መንፈስ ቅዱስን እንደላከላቸው ሁሉ ብፁዕ ወቅድሪስ አቡነ ጳውሉስም በእረፍተ ነፍስ ሆነው ከሚገኙበት የጌታ እቅፍ በመንፈስ ሆነው እርስዎን ቅዱስነትዎን የላኩልንን ያህል ተስምቶናልና እኛ የአዲስ አበባ ገዳማትና አድባራት አስተዳዳሪዎች በቅዱስነትዎ ሢመተ ኘትርክና መደሰታችንንና መፅናናታችንን ስንገልፅልዎ ከውስጥ በመነጨ ልባዊ ሀሴት ነው፡፡

ቅዱስ አባታችን ከተፈቀደልን ውሱን ጊዜ አንፃር ብዙ ለማለተ እየፈለግን ብንቆጠብም በቅዱስነትዎ ፊት ሳናመሰግን የማናልፋቸውን አካላት በመጥቀስ (በድጋሚ) እንድናመሰግን ይፈቅዱልናል የሚል የፀና እምነት አለን፡፡

ይኸውም አንደኛ በታላቁ አባት በብፁዕ አቡነ ናትናኤል እየተመራ በርካታ ሥራዎችን በዚህ አጭር ጊዜ ላከናወነው ቅዱስ ሲኖዶስ እና በቅዱስ ሲኖዶስ ለተቋቋመው ለሰባቱ ሊቃነ ጳጳሳት የሥራ አስፈጻሚ ኮሚቴ እጅግ የላቀ ክብርና ምስጋና ለማቅረብ እንወዳለን፡፡ ሁለተኛውም በቅዱስ ሲኖዶስ ተቋሙሞ ቅዱስነትዎን ያስገኘልንን የአስመራጭ ኮሚቴም ለከፈሉት ታላቅ መስዋዕትነት የምናመሰግን ሲሆን በሦስተኛ ደረጃ ደግሞ መላው የቤተ ክርስቲያናችን ካህናትና ምዕመናን ፈጣሪያቸውን በምሕላ፣ በጾምና በፀሎት የጠየቁበትን ረዥም የፀሎት ጊዜያት ባሰብን ቁጥር በዚህ የምርጫ ሂደት የአንበሳውን ድርሻ የሚወስዱት እነርሱ ናቸውና ለእነርሱ ያለንን ክበረና አድናቆት ልናቀርብ እንወዳለን፡፡

በመጨረሻም ብርሃኑ ዓለም ቅዱስ ጳውሎስ ወደ ቆሮንቶስ በላከው 2ኛ መልዕክት ም.13 ቁ11 ላይ “ተፈሥሑ እንከሰ አኃዊነ አጥብዑ ወተዓገሡ ወተሰናአው ወአምላክ ሰላም ወፍቅር የሃሉ ምስሌክሙ፤ በቀረውስ ወንድሞች ሆይ በአንድ ልብ ሁኑ በሰላም ኑሩ የፍቅርና የሰላም አምላክ ከእናንተ ጋር ይሆናል” ብሎ እንደተናገረው እኛም የአዲስ አበባ ገዳማትና አድባራት አስተዳዳሪዎች ቅዱስነትዎ ያልዎትን ዓለም አቀፍ እና ጥልቅ እውቀት በጠቀም ቤተክረስቲያን ዛሬ ከምትገኝበት ታላቅ ደረጃ ከፍ ለማድረግ በሚተጉበት ማንኛውም ሥራና በየአህጉሩ በመዘዋወር እንደየሰው ቋንቋ (ልሳን) በመናገር ለሚከውኑት ታላቅ የቤተ ክረስቲያን ሥራ ከእግርዎ ሥር በመሆን ልንታዘዝዎትና ልናገለግልዎት በቁርጠኝነት መቆማችን ስንገልፅልዎ እጅግ ጥልቅ በሆነ ደስታና ስሜት ሲሆን ልዑል እግዚአብሔርን አጋዥ አድርገው የላቀ ሥራም እንደሚፈፅሙ እምነታችን የፀና ነው፡፡

 ወስብሐት ለእግዚአብሔር

የቅዳስነትዎ ቡራኬ ይድረሰን የአዲስ አበባ ገዳማትና አድባራት አስተዳዳሪዎች

በሌላ ዜና የኢትዮጵያ ኦርቶዶክስ ተዋህዶ ቤተክርስትያን በሀገሪቱ የሰላም፣የልማትና የዕድገት ጉዞ እያደረገች ያለችውን እንቅስቃሴ አጠናክራ እንደምትቀጥል ብፁእ ወቅዱስ አቡነ ማቲያስ ቀዳማዊ ርዕሰ ሊቃነ ጳጳስ ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት ገልፀዋል፡፡

ቅዱስነታቸው ከኢትዮጵያ ፌድራላዊ ሪፐብሊክ መንግስት ፕሬዚዳንት ከክቡር አቶ ግርማ ወ/ጊዮርጊስና ከኢፌዲሪ ጠቅላይ ሚኒስትር ከአቶ ኃይለማርያም ጋር ባደረጉት ውውይት ቤተክርስትያኗ በሀገሪቱ የልማት ጉዞ በመሳተፍ ለሰላምና ለዕድገት የምታበረክተውን አስተዋፅኦ አጠናክራ ትቀጥላለች ብለዋል፡፡

ምዕመናኑም ከመላው የኢትዮጵያ ህዝብ ጋር በመሆንና በመከባበር በሀገሪቱ የልማት ተግባራት ላይ ተሳትፎውን እንዲቀጥል ጠይቀዋል፡፡

የኢፌዲሪ ጠቅላይ ሚኒስትር ኃይለማርያም ደሳለኝ በበኩላቸው የኢትዮጵያ ኦርቶዶክስ ተዋህዶ ቤተክርስትያን በልማታዊ እንቅስቃሴዎች ላይ ያላትን አስተዋፅኦ እንደምትቀጥል እምነታቸው መሆኑን ተናግረዋል፡፡

ወጣቱን በልማት ስራው በማሳተፍ እንዲሁም ከሀገር ወጥተው ወደ ዓረብ ሀገራት የሚሰደዱ ዜጎችን በማስተማር በኩል ትኩረት መሰጠት አለበትም ብለዋል፡፡ መንግስት ከቤተክርስትያኗ ጎን መሆኑንም ጠቅላይ ሚኒስትሩ ለፓትሪያሪኩ ገልፀውላቸዋል፡፡

c

በመንበረ ጸባዖት ቅድስት ሥላሴ ካቴድራል ለሚጦሩ 15 አረጋወያን ለ5ኛ ጊዜ እረዳታ ተሰጠ

                                              በመ/ር ዘሩ ብርሃኔ

“ለችግረኛና ለምስኪን የሚያስብ ምስጉን ነው፡፡” መዝ. 40÷1

“እግዚአብሔር በደስታ የሚሰጠውን ይወዳልና እያንዳንዱ በልቡ እንዳሰበ ይስጥ”2ኛ ቆሮ. 9÷7

c

ከአሁን በፊት በዌብሳይታችን አማካኝነት ወጣት ብሩክ አስራት ከዛሬ 5 ወር በፊት ጀምሮ ለካቴድራሉ አረጋውያን የሚሆን በየወሩ ለአረጋውያኑ የሚያስፈልጋቸውን የምግብ እርዳታ እያደረገላቸው መሆኑን ስንዘግብ መቆየታችን የሚታወስ ሲሆን አሁንም እንደተለመደው 5ኛ ጊዜ ለ1 ወር አስቤዛ የሚሆን ከዚህ ቀጠሎ የተዘረዘሩትን ልኳል፡፡

100 ኪሎ ጤፍ

25 ሌትር ጋዝ፤

15 ሌትር ዘይት

15 ኪሎ ስኳር፤

15 ኪሎ በርበሬ፤

15 ኪሎ ሽሮ፤

5 ፓኬት ሻይ ቅጠል ፤5 ኪሎ ጨው እና 20 ሰሙና በእነ ወ/ሮ ማርታ ወርቄ፤በወንድሙ፤በወጣት ዳዊት መስፍን እና በጓደኞቹ አማካኝነት እርዳታውን የላከ ሲሆን ከ2 ወር በፊት በወ/ሮ ማርታ ወረቄ፤በወ/ሮ ሮማን እሸቴ፤በወ/ሮ የምስራች አበበና በወጣት ዳግማዊ መስፍን አማካኝነት የአረጋውያኑ መኖሪያ ቤት የሆነውን የንግስት ዘውዲቱ መታሰቢያ ቤት አንድ ቀን ማጽዳታቸው ይታወቀል፡፡

አሁንም ከአገር ቤት ተመልሶ ወደ አሜሪካ ከሄደ በኋላ ቀደም ሲል ቃል በገባው መሰረት 5ኛ ጊዜ ለአንድ ወር የሚሆን የወር አስቤዛ በወንደሙና በጓደኞቹ አማካኝነት እርዳታ ልኳል፡፡ በመጨረሻም በአባ ገ/ማሪያም ወ/ ሳሙኤል አማካኝነት ለወጣት ብሩክ አስራትና ለቤተ ሰዎቹ ጸሎትና ምስጋና ተደርጓል፡፡